1-2Amasías huañujpica, Judá llajtapi causajcunaca tucuicuna shuj yuyailla tucushpa, paipaj churi Uziastami paipaj randi jatun mandaj cachun churarcacuna. Uziasca chunga sujta huatayujllami carca. Uziasca paipaj yaya huañushca q'uipa mandai callarishpaca, Judá llajtapajllataj cachunmi Elot shuti pueblota allichirca.
3Uziasca mandai callarinapajca chunga sujta huatayujmi carca. Pichca chunga ishqui huatatami Jerusalenpi mandarca. Paipaj mamaca Jerusalenllamantataj Jecoliasmi carca.
4Uziasca tucui imapipish paipaj yaya Amasías shinallatajmi, Mandaj Diospaj ñaupajpica, ima pandata mana rurarca.
5Zacariasca causashcacamaca, Taita Dios yuyaillami causarca. Zacariasca, muscuipi shina Taita Dios ricuchishcata alli yachajmi carca. Shinallataj Mandaj Diospish, Uzías paillata mañajpica, tucuipimi alli pusharca.
6Uziasca, filisteocunahuan macanacugrishpaca Gat, Jabnia, Asdod shuti pueblocuna muyundij jatun pircacunatami urmachirca. Chaimantaca Asdod pueblo c'uchupipish, filisteocunapajllataj caj caishuj llajtacunapipishmi pueblocunata rurarca.
7Taita Diosca, Uziastaca filisteocunahuan macanacuipipish, Gur-baal pueblopi causaj arabecunahuan macanacuipipish, amonitacunahuan macanacuipipishmi mishachirca.
8Amonitacunaca, Uziasmanmi convidanacunata cujcuna carca. Uzías chai llajtacunacama mandashpa cazuchij cajtaca, Egiptohuan tupanacunpi caj llajtacamami yachaj chayarcacuna.
9Jerusalenpica, esquinapi caj pungupipish, pugru pambaman llujshina pungupipish, caishuj esquinapipishmi torrecunata rurarca. Tucui muyundij jatun pircatapishmi ashtahuan sinchita rurarca.
10Shitashca pambapipishmi torrecunata rurarca. Achca animalcunata charishcamantami, Sefela pambacunapipish, caishuj pambacunapipish achca pugyucunata rurashpa yacutapish surcurca. Shinallataj urcucunapipish, alli p'ucuj pamba allpacunapipishmi uva chagracunatapish, shujtaj chagracunatapish achcata charirca. Paica chagracunata ruranata achcata munashcamantami, chashna rurarca.
11Uziasca jatun macanacuipajca, achca soldadocunatami charirca. Chai soldadocunaca macanacuimanca, jatun mandajpaj quillcaj Jeielpish, Maasías mandajpish mandashpa quillcashca shinallatajmi, mirga mirga llujshijcuna carca. Chai soldadocunataca, jatun mandajllataj churashca mandajcunapuramanta Hananías mandajmi mandaj carca.
12Tucui soldadocunata mandaj, ashtahuan c'ari c'ari caj soldadocunaca, 2.600 soldadocunami carca.
13Chai soldadocunaca: Alli macanacunata yachaj, 307.500 c'ari c'ari soldadocunatami mandajcuna carca. Chaicunami p'iñajcunahuanca, jatun mandaj Uziasmanta macanacujcuna carca.
14Uziasca, chai tucui soldadocunapajmi escudocunatapish lanzacunatapish umapi churarina fierro cascocunatapish, cuerpopi churarina fierro churanacunatapish, arcocunatapish, rumicunata shitangapaj huaracacunatapish rurachirca.
15Shinallataj Jerusalenpipish, macanacuipajmi alli yachajcunahuan jatun macanacunacunata rurachirca. Chai macanacunacunataca, torrecunapimi churarca. Shinallataj baluartecunatapishmi churarca. Chaicunahuanmi chai jahuamantaca puntajlla caspicunatapish, jatun rumicunatapish shitashpa macanacuj carca. Pai chashna yachaj cashcataca, caru llajtacunapi causajcunapishmi yachaj chayarcacuna. Taita Diosmi paitaca, tucuipi alli pushashpa chashna jatunta rurarca.
16Uziasca, ña tucuita mandai callarishpaca, jatun tucushpami llaqui tucurca. Paita Mandaj Taita Diosta c'ariyashpami, Mandaj Diospaj huasi ucuman yaicushpaca inciensota rupachina altarpi inciensota rupachirca.
17Chashna ruranaman yaicujpica paita catishpami, Mandaj Diospajta ruraj Azarías curaca c'ari c'ari pusaj chunga curacunahuan yaicurca.
18Paicunami jatun mandaj Uziastaca, p'iñarishpataj cashna nircacuna: “Uzías, Mandaj Diosman inciensota cushpa rupachinaca mana cambaj ruranachu. Aaronpaj huahua huahua curacunallami caitaca rurai tucun. Paicunaca caita ruranapajtaj Diospajlla ch'icanyachishca cashpallami, caitaca rurancuna. Diospajlla ucumanta llujshi. ¿Ima nishpataj chashna mana allita rurashpaca, canta Mandaj Diosta p'iñachinaman shamunguiyari? Chashna rurashcamantaca, Diosca mana alli ningachu” nircacunami.
19Chashna nijpica Uziasca, curacunahuanca yallitajmi p'iñarirca. Paica Mandaj Diospaj huasi ucupica inciensota rupachina altar ñaupajpimi, inciensota rupachinapi inciensota aisashca shayacurca. Chaipi shayacushpa curacunahuan p'iñarijpica, tucui curacunapaj ñaupajpimi, paipaj frentepi lepra ungüi llujshirca.
20Curacunata Mandaj Azariaspish, caishuj curacunapish, paipaj ñahuita ricushpaca, frentepi lepra llujshishcatami ricurcacuna. Chaimantami chai ucumanta llujshichircacuna. Uziasca Mandaj Dios llaquichishcamantami, chai ucumantaca paillatajpish utca llujshirca.
21Jatun mandaj Uziasca huañungacamami, chai lepra ungüihuan causarca. Chaimantami pai jatun mandajca, lepra ungüi japishcacuna shinallataj shuj ucupi pailla causarca. Mandaj Diospaj huasiman cutin yaicuchunpish, ña mana saquircacunachu. Pai chashna ungushca cajpica, Jotam shuti paipaj churimi Judá llajtataca paipaj randi mandarca.
22Uzías ashtahuan imallata rurashcataca, Amozpaj churi profeta Isaiasmi callarimanta tucuricama quillcarca.
23Uzías paipaj ñaupa yayacunahuan dormijpica: “Caica lepra ungüihuanmi carca” nishpami, paipaj yayacunata pambashca c'uchulla jutcupi pambarcacuna. Paipaj randica paipaj churi Jotammi mandarca.
Who We AreWhat We EelieveWhat We Do
2025 by iamachristian.org,Inc All rights reserved.