1 REYES 16 - Quichua Chimborazo Bible

1Mandaj Diosca Hananipaj churi Jehutaca, Baasa runata llaquichinatami cashna huillachirca:

2“Cantaca ñutu allpamanta jatarichishpami, ñuca agllashca israelcunata mandaj cachun churarcani. Ashtahuanpish canca Jeroboampaj ñanta purishpami, ñuca agllashca israelcunata juchallichingui. Chashnami canca cambaj juchacunahuan ñucataca p'iñachingui.

3Baasa cantaca Nabatpaj churi Jeroboamta ima shinami paipaj huasi familiandij tucuchircani, chai shinallatajmi cantapish cambaj tucui huasi familiandij p'ichajta chingachigrini.

4Baasapaj familiacuna pueblopi huañujpica allcucunami micunga. Pueblomanta carupi huañujpica ullahuangacunami micunga” nircami.

5Baasa ashtahuan imalla rurashcata, pai imalla rurashcata, pai ima shina mandashcata, ashtahuan yachasha nishpaca israelcunata jatun mandajcuna imallata rurashcacunata quillcashca libropimi ricuna.

6Baasa paipaj ñaupa yayacunahuan dormijpica, Tirsa pueblopimi pambarcacuna. Paipaj randica paipaj churi Elami mandarca.

7Mandaj Diosca Hananipaj churi profeta Jehumanmi Baasapish, paipaj huasi familiapish ima tucunata huillachirca. Baasaca mana allicunata rurashpami, Mandaj Diostaca yallitaj p'iñachirca. Chaimantami Jeroboampaj huasi familiata tucui chingachishca shinallataj tucui chingachirca.

Israel llajtataca Elata huañuchishpa Zimri mandashcami

8Jatun mandaj Asa Judá llajtata ña ishqui chunga sujta huatata mandacujpimi, Baasapaj churi Elaca Israel llajtataca mandai callarirca. Paica ishqui huatatami, Tirsa pueblopi mandarca.

9Ela runapaj carrocunapi purij chaupi soldadocunata mandaj paipajta ruraj Zimrica paita c'ariyanatami yuyarirca. Jatun mandaj Elaca, Tirsa pueblopi cashpami, paipaj mayordomo Arsa runapaj huasipi ubyashpa machashca cajpi,

10Zimri shamushpaca paita chugrichishpa huañuchishpa paipaj randi mandarca. Jatun mandaj Asa ishqui chunga canchis huatata Judá llajtata mandacujpimi chashna tucurca.

11Zimrica, jatun tiyanapi tiyarishpa mandai callarishpaca, Baasapaj huasi familiacunatapish, paihuan alli apanacujcunatapish shujllatapish mana saquishpami tucuicunata huañuchirca.

12Zimrica chashnami Baasapaj tucui familiacunataca chingachirca. Mandaj Dios profeta Jehuman Baasa ima shina tucunata huillachishca shinallatajmi,

13Baasapaj tucui juchacunamantapish, paipaj churi Elapaj juchacunamantapish chashna tucurca. Paicuna ima shinami juchallin chashnallatajmi israelcunatapish juchallichirca. Paicunaca manapish dios caj yangalla dioscunata adorashpami israelcunata Mandaj Diostaca p'iñachircacuna.

14Ela ashtahuan imallata rurashcata, tucui pai imallata rurashcata ashtahuan yachasha nishpaca, israelcunata jatun mandajcuna imalla rurashcata quillcashca libropimi ricuna.

15Jatun mandaj Asa, Judá llajtata ña ishqui chunga canchis huatata mandacujpimi, Zimrica Israel llajtata mandai callarirca. Paica canchis punllallatami Tirsa pueblopi mandarca. Israelcunaca filisteocunapaj llajtapi caj Gibetonpi causajcunahuan macanacungapaj rishpami, chaipi carpa huasicunata shayachishpa tiyacurcacuna.

16Chaipi carpa huasicunata shayachishpa tiyacujcunaca: Zimrica jatun mandajta c'ariyashpa huañuchishcatami uyarcacuna. Chaimi chai punllallataj tucui Israel soldadocunaca macanacuna pamballapitaj soldadocunata mandaj Omrita israelcunata mandaj cachun churarcacuna.

17Jatun mandaj Omrica Gibetonmanta tucui israelcunandij huichi rishpami, Tirsa pueblopi muyushpa shayarircacuna.

18Zimrica chai pueblota ña japijta ricushpami, mandashpa tiyana huasiman yaicushpa chai huasitaca ninata japichishpa chai ucupi paipish huañurca.

19Zimrica Mandaj Diospaj ñaupajpi millaita rurashpa juchallishcamanta, Jeroboam purishca ñancunapi purishcamanta, chashna pai juchallishpa israelcunata juchallichishcamantami chashna huañurca.

20Zimri ashtahuan imalla rurashcata, jatun mandajta c'ariyashpa ima shina jatarishcata ashtahuan yachasha nishpaca, Israel llajtata jatun mandajcuna imallata rurashcata quillcashca libropimi ricuna.

Israel llajtata Omri mandashcami

21Israel llajtaca ishquipimi chaupirirca. Shuj chaupica Ginatpaj churi Tibnita catij tucushpami paita jatun mandaj cachun churashun nircacuna. Caishuj chaupica, Omrita catijmi tucurcacuna.

22Omrita catijcunaca Ginatpaj churi Tibnita catijcunatami ashtahuan ashtahuan mishashpa catircacuna. Tibnica huañurcami. Omrica jatun mandajmi tucurca.

23Jatun mandaj Asa Judá llajtata ña quimsa chunga shuj huatata mandacujpimi, Omrica israelcunata mandai callarirca. Sujta huatataca Tirsapimi mandarca. Tucuimantaca chunga ishqui huatatami mandarca.

24Omrica, Semer shuti runamanmi, Samaria urcuta ishqui talento cullquipi randishpa, chai urcupica, shuj pueblota rurarca. Chai urcuta c'atuj runa Semer shuti cashcamantami, chai pueblotaca Samariata shutichirca.

25Omrica, Mandaj Diospaj ñaupajpica, millaitami rurarca. Paipaj ñaupa jatun mandajcuna millaita rurashcatapish yalli millaitami rurarca.

26Omrica Nabatpaj churi Jeroboam purishca ñancunapi purishpa, pai mana allita rurashca shinallataj mana allita rurashpa, Jeroboam israelcunata juchallichishca shinallataj israelcunata juchallichishpami, paicunapaj rurashcalla dioscunata adorashpa israelcunata Mandaj Taita Diostaca p'iñachirca.

27Omri ashtahuan imalla rurashcata, tucui imallata rurashcata, c'ari c'ari cashcata, ashtahuan yachasha nishpaca, israelcunata jatun mandajcuna imalla rurashcata quillcashca libropimi ricuna.

28Omri paipaj ñaupa yayacunahuan dormijpica Samariapimi pambarcacuna. Paipaj randica paipaj churi Acabmi mandarca.

Israel llajtata Acab mandashcami

29Jatun mandaj Asa, Judá llajtata ña quimsa chunga pusaj huatata mandacujpimi, Omripaj churi Acabca, Israel llajtata mandai callarirca.

30Omripaj churi Acabca, israelcunataca ishqui chunga ishqui huatatami mandarca. Pai mandanaca Samariapimi carca. Omripaj churi Acabca, Mandaj Diospaj ñaupajpica, paipaj ñaupa jatun mandajcuna millaita rurashcatapish yalli millaitami rurarca.

31Acabpaj yuyaipica Nabatpaj churi Jeroboam rurashca shinallataj millaita rurashcapish ima mana cashca shinami carca. Sidón llajtata jatun mandaj Et-baalpaj ushushi Jezabeltapish paipaj huarmi cachunmi japirca. Baal nishca diosta adorashpa paipajta rurajmi tucurca.

32Samariapi Baalpaj huasita pai rurashcapipish Baalpaj shuj altartami rurarca.

33Acabca Asera huarmi diostajllatapishmi rurarca. Chashna rurashpaca, israelcunata paipaj ñaupa jatun mandajcuna israelcunata Mandaj Taita Diosta p'iñachingapaj juchallishcatapish yallimi juchallirca.

34Acab mandacui huatacunami, Bet-elpi causaj Hiel runaca, Jericó pueblota cutin shayachirca. Chai pueblota cutin shayachi callaricushpa punta rumita churacujpica, paipaj punta churi Abirampaj causaimi valirca. Chai pircapi pungucunata churacujpica, paipaj q'uipa churi Segubmi huañurca. Mandaj Dios Nunpaj churi Josuehuan huillachishcami pajtarca.