APOCALIPSIS 13 - Quichua Chimborazo Bible

Manchanana ishqui animalcunata ricushcami

1Mama cucha c'uchu t'iyu allpapica dragón shayacujtami ricurcani. Chai q'uipaca mama cucha chaupimantaca canchis umacunayuj, chunga gachucunayuj animal llujshicujtami ricurcani: Chai gachucunapica, chunga coronacunatami churashca carca. Chai canchis umacunapica Diosta c'amishpa rimashca shutitami quillcashca carca.

2Ñuca ricushca animalca, leopardoman rijchajmi carca. Paipaj chaquicunaca, osopaj shinami carca. Paipaj shimica leonpaj shimi shinami carca. Dragonca chai animalmanca pai rurai tucunata, paipaj jatun tiyarinata, jatun mandaj canatapishmi curca.

3Paipaj shuj umataca, huañunalla chugrihuan cajtami ricurcani. Ashtahuanpish chai chugrica alliyarcallami. Ña alliyajpica, allpa pachapi causajcunaca mancharishpami tucuicuna chai animalta catircacuna.

4Paicunaca, animalman mandanata cuj dragonta, chai animaltapishmi: “Cai animal shinaca, pi mana tiyanchu. Paihuanca ¿pitaj macanacui tucungari?” nishpami adorarcacuna.

5Paimanca, jatun tucushpa c'amishpa rimanata, chuscu chunga ishqui quillacunata mandai tucunatapishmi curca.

6Chaimantami Diostapish, paipaj shutitapish, paipaj carpa huasitapish, cielopi causajcunatapish p'iñashpa c'amirca.

7Paitaca Diospajlla cajcunahuan jatun macanacuita rurashpa, pai mishachunpishmi saquirca. Shinallataj ch'ican ch'ican aillucunata, tucui pueblocunata, tucui laya rimajcunata, tucui llajtacunatapish tucuita mandanatami curca.

8Chai animaltaca cai pachata manaraj rurajpi paicunapaj shutita libropi mana quillcashca tucui cai pachapi causajcunami adorarcacuna. Chai libroca huañuchishca caj Ovejapaj libromi.

9Maijanpish rinrinta charijca, caita uyaichij:

10“Maijanpish prezu apashca cana cajca, prezu apashcami canga.

Maijanpish espadahuan huañuna cajca, espadahuan huañuchishcami canga”.

Chaimantami jucha illajcunaca, mana p'iñarij alli shungu, crij caticunalla.

11Chai q'uipaca, shujtaj animal allpamanta llujshicujtami ricurcani. Chaica, ovejapaj gachucunaman rijchaj ishqui gachutami charirca. Shina cashpapish dragón shinami rimarca.

12Paica, punta animal shinallataj mandaj cashcataca chai animalpaj ñaupajpimi mandashpa ricuchirca. Chaimi allpa pachatapish, chaipi causajcunatapish huañunalla chugrihuan cashpa alliyaj punta animalta adorachirca.

13Jatun mancharinacunata rurashpami, cielomantaca allpa pachaman gentecuna ricucunpi ninata tamyachirca.

14Punta animal jatun mancharinacunata rurai tucunata q'uipa animalman cujpimi, chaita rurashpa allpa pachapi causajcunataca umarca. Chaimantami q'uipa animalca allpa pachapi causajcunataca, espadahuan huañujta chugrichishca cashpapish causacuj animalman rijchajta ruraichij nirca.

15Q'uipata ricurij animalmanca punta ricuj animalman rijchajta rurashcalla animalman causaita cuchunmi Diosca saquirca. Chai rurashcalla animalca ña rimashpaca paita tucui mana adorajcunataca huañuchichunmi mandarca.

16Shinallataj uchillacunata, jatuncunata, charijcunata, huajchacunata, amopajta rurajcunata, amopajta mana rurajcunatapish tucuicunata alli lado maquipi cashpa, frentepi cashpapish, ricuna sellota churachunmi mandarca.

17Chaimanta animalta ricuchij sellota cashpa, paipaj shutita cashpa, animalpaj shutipaj numerota cashpapish mana charijca, pi mana c'atui tucurcachu. Imata mana randi tucurcachu.

18Cancuna yachaj cashpaca, caita yachai tucunguichijmi. Maijanpish alli entendij cashpaca, animalpaj numerota yupachun. Chai numeroca, 666mi. Chai numeroca shuj runapaj shutimi.