2 REYES 16 - Quichua Chimborazo Bible

Judá llajtata Acaz mandashcami(2 Cr 28.1-27)

1Remaliaspaj churi Peka, Israel llajtata chunga canchis huatata ña mandacujpimi, Jotampaj churi Acazca, Judá llajtata mandai callarirca.

2Acazca mandai callarinapajca ishqui chunga huatayujmi carca. Paica Jerusalenpimi chunga sujta huatata mandarca. Paica Mandaj paipaj Diospaj ñaupajpica, paipaj ñaupa yaya David shina ima pandata mana rurajca mana carcachu.

3Ashtahuanpish Israel llajtata jatun mandajcuna millaita rurashcallatatajmi rurarca. Ashtahuantajcarin israelcunata cai llajtapi churangapaj Mandaj Dios cai llajtamanta anchuchishca gentecuna millanana ruranacunata ruraj cashca shina rurashpami paipaj churita rurashcalla diosman cushpa rupachirca.

4Shinallataj Acazca lomacunapi tiyaj altarcunapipish, urcucunapipish, uchilla lomacunapi tiyaj altarcunapipish, tucui p'angasapa yura ucucunapi tiyaj altarcunapipishmi sacrificiota cushpa inciensotapish rupachirca.

5Siria llajtata jatun mandaj Rezinpish, Remaliaspaj churi Israel llajtata jatun mandaj Pekapish, Jerusalenpi causajcunahuan macanacungapaj huichiyashpami, Acazta japingapaj pueblo muyundijta shayarircacuna. Chashna rurashpapish chai pueblotaca mana japi tucurcacunachu.

6Chai huatacunallatajmi, Edom llajtata jatun mandajca, Elat pueblota Edom llajtapajllataj cachun tigra japirca. Chaimi edomitacunaca Judá llajta runacunata Elatmanta llujshichishpa cachashpa, chaipi causangapaj shamushpa cunan punllacama chaipi causacuncuna.

7Chaimi Acazca, Asiria llajtata jatun mandaj Tiglat-pilesertaca: “Cambajta ruraj ñucaca cambaj churi shinami cani. Shina cashcamanta Siria llajtata jatun mandajpaj maquimanta, Israel llajtata jatun mandajpaj maquimantapish mitsanaman huichiyamupai. Paicunami ñucahuan macanacungapaj jatarishcacuna” nichunmi paipaj randi parlanacujcunata cacharca.

8Acazca Mandaj Diospaj huasipi tiyaj cullquita, curita, mandana huasipi tiyaj achca valijcunatapish japishpami, Asiria llajtata jatun mandajman cuchun cacharca.

9Asiria llajtata jatun mandajca, Acaz mañashcata ari nishpami, Damascopi causajcunahuan macanacungapaj huichiyashpaca chai pueblota pai japishpa chaipi causajcunatapish Kirman prezu apashpa jatun mandaj Rezinta huañuchirca.

10Jatun mandaj Acazca, Asiria llajtata jatun mandaj Tiglat-pileserhuan tupangapajmi Damascoman rirca. Chaipica jatun mandaj Acazca Damascopi tiyaj altarta ricushpaca, chai shinallatataj rurachun chai altar ima shina cashcata, ima shina rurashcata quillcashpami Urías curaman cuchun cacharca.

11Urías curaca Damascopi caj altar ima shina cashcataca jatun mandaj Acaz, ima shina ruranata cachashca shinallatajmi rurarca. Jatun mandaj Acaz Damascomanta shamunapajca Urías curaca ñami tucuchirca.

12Jatun mandajca, Damascomanta chayamushpa chai altarta ricushpa c'uchuyashpami, Diosman cushpa tucui rupachinataca chai altarpi Diosman curca.

13Diosman cushca tucui rupachinatapish, chaquishca granota cushcatapish chaipimi rupachirca. Vinotapish chai altar jahuapimi tallirca. Dioshuan alli cangapaj cushca animalcunapaj yahuartapish chai altar jahuatami tsiraparca.

14Mandaj Diospaj huasi ñaupajpica, bronce altarmi tiyarca. Chai altartaca Acazca, Mandaj Diospaj huasihuan, pai rurachishca mushuj altarhuan chaupipi cajpimi, mushuj altar janaj ladoman churarca.

15Chaipimi jatun mandaj Acazca, Urías curataca: “Tutamantaman tucui rupachingapaj Diosman cushcatapish, chishipi Diosman cushca granocunatapish, jatun mandajpajta Diosman cushpa tucui rupachinatapish, Diosman jatun mandaj cushca chaquishca granocunatapish, tucui cai llajtapi causajcuna Diosman cushpa tucui rupachinatapish, paicuna cushca chaquishca granocunatapish chai altarpi rupachingui. Paicuna cushca vinocunatapish cai jatun altar jahuapi tallingui. Diosman cushpa tucui rupachishca animalpaj yahuartapish, sacrificiota cushca animalpaj yahuartapish cai altarllapitaj tsirapangui. Bronce altarca, Mandaj Diosta ñuca tapungapajllami canga” nirca.

16Urías curaca, jatun mandaj Acaz mandashca shinallatajmi tucuita rurarca.

17Chai q'uipaca jatun mandaj Acazca, carretapi yacu tanqueta huichi charicujcunata p'itishpami, chai tanquecunataca chaimanta anchuchirca. Shinallataj bronce huagracunapaj jahuapi tiyacuj bronce pailatapish anchuchishpami pambapi rumicuna jahuallapi churarca.

18Asiria llajtata jatun mandaj mandashcata cazushpami, samana punllapi tandanacungapaj Diospaj huasi canlla ladoman shayachishca huasitapish, jatun mandajlla yaicuna ñantapish anchuchirca.

19Acaz ashtahuan imalla rurashcata, ashtahuan yachasha nishpaca Judá llajtata jatun mandajcuna imallata rurashcata quillcashca libropimi ricuna.

20Jatun mandaj Acaz paipaj ñaupa yayacunahuan dormijpica, ñaupa yayacunata churashcallapitaj Davidpaj pueblopimi churarcacuna. Paipaj randica paipaj churi Ezequiasmi mandarca.