NÚMEROS 2 - Quichua Chimborazo Bible

Carpa huasicunata maillapi shayachishcapish, cada ailluta pushajcunapish

1Mandaj Diosca Moisestapish, Aarontapish cashna nishpami mandarca:

2“Israelcunaca Dioshuan tupanacuna carpa huasimanta carullapi carpa huasicunata shayachishpa quiquin bandera c'uchupi tiyarichun. Chaipica paicunapaj cada familiata ricuchicuj ucupi tiyarichun.

3Judá ailluca Diospaj carpa huasi ñaupaj ladoman, inti llujshin ladoman paicunapaj carpa huasicunata shayachishpa tiyarichun. Quiquin bandera c'uchupi paicunapaj soldadocuna maipi canpi tiyarichun. Judá ailluta mandajca, Aminadabpaj churi Naasonmi.

4Judapaj soldadocunata yupashcaca, 74.600 c'aricunami.

5Judapaj c'uchupica, Isacarpaj aillu soldadocuna carpa huasicunata shayachishpa tiyarichun. Isacarpaj soldadocunata mandajca Zuarpaj churi Natanaelmi.

6Isacarpaj soldadocunata yupashcaca, 54.400 c'aricunami.

7Judapaj caishuj ladopica, Zabulón aillu soldadocuna carpa huasicunata shayachishpa tiyarichun. Zabulonpaj soldadocunata mandajca Helonpaj churi Eliabmi.

8Zabulonpaj soldadocunata yupashcaca, 57.400 c'aricunami.

9Judapaj soldadocunahuan, caishuj ishqui aillucunahuan tandachishpa yupajpica, 186.400 c'aricunami. Paicunaca cada aillu, huashan huashan llujshishpa puntapi richun.

10Rubén aillupaj soldadocunaca ura ladoman tiyarichun. Paicunapaj banderapish chai c'uchullapitaj cachun. Rubenpaj soldadocunata mandajca Sedeurpaj churi Elisurmi.

11Rubenpaj soldadocunata yupashcaca, 46.500 c'aricunami.

12Rubenpaj c'uchupica Simeón aillupaj soldadocuna carpa huasicunata shayachishpa tiyarichun. Simeonpaj soldadocunata mandajca, Zurisadaipaj churi Selumielmi.

13Simeonpaj soldadocunata yupashcaca, 59.300 c'aricunami.

14Rubenpaj caishuj ladopica, Gad aillupaj soldadocuna carpa huasicunata shayachishpa tiyarichun. Gadpaj soldadocunata mandajca, Reuelpaj churi Eliasafmi.

15Gadpaj soldadocunata yupashcaca, 45.650 c'aricunami.

16Rubenpaj soldadocunahuan, caishuj ishqui aillucunahuan tandachishpa yupajpica, 151.450 c'aricunami. Paicunapish puntapi ricuj aillucunata catishca, cada aillu huashan huashan catishpa richun.

17Chai q'uipaca, levitacuna Dioshuan tupanacuna carpa huasita apashca richun. Paicunaca Diospaj carpa huasi muyundijpi ima shina tiyacushca shinallataj, paicunapaj carpacunata apacujcunapaj chaupipi apashca richun. Levitacunapish cada quiquin bandera ucupi huashan huashan richun.

18Efraín aillupaj soldadocunaca inti huashicun ladoman tiyarichun. Paicunapaj banderapish chai c'uchullapitaj cachun. Efraín aillupaj soldadocunata mandajca, Amiudpaj churi Elisamami.

19Efrainpaj soldadocunata yupashcaca, 40.500 c'aricunami.

20Efrainpaj c'uchupica Manasés aillupaj soldadocuna carpa huasicunata shayachishpa tiyarichun. Manasespaj soldadocunata mandajca Pedasurpaj churi Gamalielmi.

21Manasespaj soldadocunata yupashcaca, 32.200 c'aricunami.

22Efrainpaj caishuj ladopica, Benjamín aillupaj soldadocuna carpa huasicunata shayachishpa tiyarichun. Benjaminpaj soldadocunata mandajca Gedeonipaj churi Abidanmi.

23Benjaminpaj soldadocunata yupashcaca, 35.400 c'aricunami.

24Efraínpaj soldadocunahuan, caishuj ishqui aillucunahuan tandachishpa yupajpica, 108.100 c'aricunami. Paicunaca Dioshuan tupanacuna carpa huasita apacujcunapaj huashata, cada aillucuna huashan huashan catishpa richun.

25Dan aillupaj soldadocunaca janaj ladoman tiyarichun. Paicunapaj banderapish chai c'uchullapitaj cachun. Danpaj soldadocunata mandajca, Amisadaipaj churi Ahiezermi.

26Danpaj soldadocunata yupashcaca, 62.700 c'aricunami.

27Danpaj c'uchupica Aser aillupaj soldadocuna carpa huasicunata shayachishpa tiyarichun. Aserpaj soldadocunata mandajca Ocranpaj churi Pagielmi.

28Aserpaj soldadocunata yupashcaca, 41.500 c'aricunami.

29Dan aillupaj caishuj ladopica, Neftalí aillupaj soldadocuna carpa huasicunata shayachishpa tiyarichun. Neftalipaj soldadocunata mandajca, Enanpaj churi Ahirami.

30Neftalipaj soldadocunata yupashcaca, 53.400 c'aricunami.

31Danpaj soldadocunahuan, caishuj ishqui aillucunahuan tandachishpa yupajpica, 157.600 c'aricunami. Paicunaca tucuicunapaj catita paicunapaj banderapaj huashapi richun” nircami.

32Israelpaj huahua huahuacunaca cada yayamanta mirarishcacunata cada huasi familiata ima shina cashcata quillcashpa yupashcaca cashnami. Tucui chaicunata cada aillupi caj soldadocuna ima shina cashca shinallatataj tucuita yupajpica, 603.550 soldadocunami.

33Levitacunataca Mandaj Dios Moisesta mandashca shinallataj caishuj israelcunahuanca mana tandachishpa yupashcachu carca.

34Israelcunaca Mandaj Dios Moisesta mandashca shinallatajmi tucuita rurarca. Paicunaca cada ñaupa yayamanta ima shina mirarimushca shinallatajmi, cada familia quiquin bandera c'uchupi carpa huasicunata shayachishpa causajcuna carca. Puri callarishpapish chashnallatajmi rijcuna carca.