PROVERBIOS 18 - Quichua Chimborazo Bible

1Pandarishpa causajcunaca quiquin

yuyashcallatami rurashpa causan.

Tucui imapipish satirishpami purin.

2Rumi shungu runaca, alli yuyaita

cuchunca mana munanchu.

Ashtahuanpish paipaj shungu yuyashcallatami

uyachun munan.

3Diosta mana manchajca, shujtajcunatapish

yangapi churanllami.

Yangalla juchachijpish, pingaipi

churanllami.

4Runacunapaj shimimanta llujshij

shimicunaca, mama cucha yacu

ucucuna shinami.

Alli yachaica, yacu llujshishpa larcata

puricuj shinami.

5Cashcata ruraj runamanta mana imata

ricushpa, Diosta mana manchaj runataraj

alli ninaca manataj allichu.

6Rumi shungu runaca, quiquin

shimillahuantajmi p'iñanacuipi yaicun.

Paipaj shimillamantatajmi azotishca

causan.

7Rumi shungu runaca, quiquin

shimillamantatajmi p'iñai tucun.

Paillatajmi huascata cungapi churarin.

8Huashalla parlarishca shimicunaca,

jillu micui shina shungucama catijmi.

9Q'uilla runaca imatapish tucuchij

runahuanca, quiquin huauquindij

shinallatajmi.

10Mandaj Diosca jatun torre shinami.

Cashcata ruraj runaca paipajman

callpashpaca, quishpichishca cangami.

11Charij runaca achcata charishcataca,

muyundijta jatun pircayuj pueblo shina,

jatun torre shina huaquichij cashcatami

yuyan.

12Jatun tucujtaca q'uipataca,

llaquicunallami japin.

Mana jatun tucujmari q'uipataca,

alli nishca tucun.

13Manaraj uyashpa imatapish

cutichijca, upa cashca ricurishpa

pingai tucunllami.

14Causaihuan cushicujca ungüitapish

mishanmi.

Ashtahuanpish shungu p'aquirishca caj

runaca, ña mana jatari tucunchu.

15Yuyaisapa runaca alli yachaitaca,

ashtahuanmi yachashpa catin.

Yachaisapacunaca yachanataca,

ashtahuanmi uyanachin.

16Imallahuanpish rijpica, pungutaca

pascanllami.

Mandajcunapajmanpish jahualla

yaicuchinllami.

17Alli llujshingapaj punta huillajca,

mana llullashca shinami ricurin.

Ashtahuanpish paihuan p'iñanacuj

shamushpaca, llullacushcata ricuchinllami.

18Suerteta rurajpica, p'iñanacuica p'itirinmi.

Jatuncunapurapi ima tiyashcatapish allichinmi.

19Huauqui llaquichishcamanta shungu

chugririshca runaca, pueblo muyundij

jatun pircatapish yalli sinchi shungumi

tucun.

P'iñanacushca huauquindijpaj shunguca,

fierro aldabahuan huichcashca pungu

shinami.

20Maijanpish shimihuan imata tarpushca

cashpaca, chaillatatajmi japishpa micunga.

Shimimanta llujshij, imata p'ucushca

cajpipish, chaillatatajmi huijsapi

jundachinga.

21Quiquin c'allullatajmi causaipipish,

mana cashpaca huañuipipish churan.

Shimimanta ima llujshichun munashpapish,

chaillatatajmi micunga.

22Maijanpish casarashpa huarmiyuj

tucujca, ima charinacunayuj

tucushcatapish yallimi.

Taita Dios c'uyashpa cushcatamari chasquin.

23Huajcha runa ishqui maquita churashpa

sumajta mingajpipish, charij runaca

sinchi shimicunahuanmi cutichin.

24Maijanpish paihuan apanacujcunamanca,

apanacujtaj cashcata ricuchichun.

Maijancunaca quiquin huauquindijtapish

yallimi apanacuncuna.