HECHOS 22 - Quichua Chimborazo Bible

1“Huauquicuna, yayacuna, cunanca cancunapaj ñaupajpi ñuca ima shina cashcata huillasha, uyapaichij” nircami.

2Hebreo rimaipi rimajta uyashpacarin, tucuicunami upallarcacuna. Chaimi, cashna nirca:

3Ñucaca, Ciliciapi caj Tarsopi huacharishca judiotajmi cani. Ashtahuanpish cai Jerusalenpimi huiñarcani. Ñucaca ñaupa yayacunata Mandashcapi nishcacunata Gamaliel callarishpa tucuita alli yachachishcami cani. Chaimi cunan cancuna shinallataj Taita Diospajta pajtachina yuyailla huañucuj carcani.

4Chashna cashpami ñucaca alli huillaita caticujcunataca huañuchichun c'aricunatapish, huarmicunatapish carcelman pushaj carcani.

5Chaitaca curacunata mandajpish, cunaj yuyajcunapish allimi yachan. Damascopi caj crijcunata prezu apamuchunpish paicunallatajmi ñucamanca quillcata curcacuna. Chaimantami chaiman rishpa paicunata chaipi mashcashpa cai Jerusalenpi llaquichingapaj prezu apanaman rircani.

Taita Diospajman ima shina cutirishcata Pablo huillashcami(Hch 9.1-19; 26.12-18)

6Damascoman ñuca chayagricujpica, chaupi punlla shinatami, jahua pachamanta ñapish achij nishpa ricurircalla.

7Chashna achij nijpi pambaman urmashpaca: “Saulo, Saulo, ¿ima nishpataj ñucataca p'iñashpa llaquichina yuyailla llaquichicungui?” nijtami uyarcani.

8Chaimi ñucaca: “Amito ¿pitaj cangui?” nijpi chai rimajca: “Ñucaca, can p'iñashpa llaquichina yuyailla llaquichicun Nazaretmanta Jesusmi cani” nirca.

9Ñucahuan cajcunaca achij nijta ricushpami, achcata mancharircacuna. Ashtahuanpish ñucaman rimaj imata nishcataca mana entendircacunachu.

10Chaimi ñucaca: “¿Imatataj rurana cani? nijpi Mandaj Jesusca” “Jatarishpa, can ricushca Damascoman ri. Chaipimi can imata rurana cashcata ña mandashcataca tucuita huillanga” nircami.

11Chai achij nicuj, achij nishcamantami, ñucaca imata mana ricurcani. Chaimantami ñucahuan cajcuna maquimanta aisajllapi, Damascoman chayarcani.

12Chaipica Ananías shuti runami causashca carca. Paica mandashcapi nishcata tucuita pajtachishpa Taita Dios yuyailla causajmi carca. Chaimantami tucui judiocunapish alli nishca carca.

13Pai ñucapajman shamushpa c'uchuyashpaca: “Huauqui Saulo, cutin canca ricujmi tucungui” nincami, ña cutin ricui tucurcani.

14Chaimi paica cashna nirca: “Ñucanchij ñaupa yayacunapaj Taita Diosmi pai munashcata rijsichun, pai cachashca Cashcata Ruraj rimashcatapish uyachun cantaca ñaupaman agllashca.

15Chaimanta canca imallata ricushcata, imallata uyashcataca tucui gentecunaman huillajmi cangui.

16Chaimanta cunanca imata ama shuyashpa jatarishpa bautizari. Jesuspaj shutipi rogashpa cambaj juchacunata maillachi” nircami.

Pabloca ñucataca mana judiocunapajmanmi cacharca nishcami

17Jerusalenman tigramushpa, Taita Diospaj huasipi mañacushpami muscuipi shinata ricurcani.

18Chaipica Mandaj Jesusmi ñucaman ricurishpaca: “Cai Jerusalenmanta utca llujshishpa ri. Ñucamanta can huillashcataca caipica mana chasquingacunachu” nirca.

19Chaimi ñucaca: “Mandaj Jesús, canta crijcunataca sinagogacunaman rishpa carcelman apaj, azotijmi carcani. Chaitaca paicunaca yachanmi.

20Shinallataj canmanta huillaj Estebanta yahuarsapata rurashpa huañuchicujpipish allimi nishpa, huañuchijcunapaj churanacunatapish cuidashpami ñucaca shayacurcani” nircanimi.

21Chashna nijpimi Jesusca: “Ri, ñucami cantaca caru llajtacunapi caj mana judiocunapajman cachagrini” nircami nishpami parlarca.

Huaranga soldadocunata mandajpajpi Pablo cashcami

22Chai tucuita Pablo parlangacamaca allimi uyarcacuna. Mana judiocunapajman cachashcami cani nijta uyashpaca:

–¡Cai runaca cai pachamantaca anchunami can, pai cai pachapi causanaca mana allichu!– nishpami sinchita caparircacuna.

23Chashna caparishpaca paicunapaj churanacunata pambapi shitashpami, allpatapish jahuata shitarcacuna.

24Chaimi huaranga soldadocunata mandajca:

–Cuartel ucuman Pablota yaicuchichij, imamanta chashna paita p'iñashpa caparicushcata yachangapaj azotishpa tapuichij– nishpa mandarca.

25Chaipi paita macangapaj huatacujpimi, Pabloca patsaj soldadocunata mandajtaca:

–¿Romano runataca, imata manaraj alli tapushpaca azotinalla ninchari?– nircami.

26Chaita patsaj soldadocunata mandaj uyashpaca:

–¿Imatataj ruragringui? Cai runaca romano runami cashca– nishpa, huaranga soldadocunata mandajman huillajpi,

27huaranga soldadocunata mandaj c'uchuyashpaca:

–¿Canca romano runachu cangui?– nijpi, Pabloca:

–Ari– nircami.

28Chaimi huaranga soldadocunata mandajca:

–Ñucaca romano tucungapajca achca cullquitami curcani– nijpi Pabloca:

–Ñucacarin, huachari pachamantami romano runa cani– nirca.

29Shina nincami, macashun nicujcunaca Pablomanta anchurircacuna. Shinallataj huaranga soldadocunata mandajpish romano runa cashcata yachashpami, paita huatachishcamantaca achca manchaihuan carca.

Mandajcunapuralla tandanacushcapaj ñaupajpi Pablo cashcami

30Cayandij punllaca huaranga soldadocunata mandajca, imamanta Pablota judiocuna huañuchishun nishcata yachashataj nishpami, curacunata mandajcunatapish, mandajcunapuralla tandacushcatapish tucuicunata tandachirca. Chaipica Pablotaca cadenacunahuan huatashcamanta cacharichishpami, paicunapaj ñaupajman pusharca.