EZEQUIEL 44 - Quichua Chimborazo Bible

1Shinallataj inti llujshin ladomanta Diospajlla huasiman yaicuna pungumanmi pusharca. Chai punguca huichcashcami cashca carca.

2Chaimantaca Mandaj Diosca ñucataca cashnami nirca: “Cai pungutaca israelcunata Mandaj Dios yaicushcamantami pi mana yaicui tucunga, pi mana pascai tucunga. Chaimantami cai punguca huichcashcalla tiyanga.

3Shuj mandajmi pai mandaj cashcamantaca, Mandaj Diospaj micunata micungapaj chaipi tiyaringa. Paica corredor punguta yaicushpaca, chaillatatajmi llujshinga” nircami.

4Chai q'uipaca, Diospaj huasi ch'imbapurapi caj ura lado pungumanmi pusharca. Chaipica Mandaj Diospaj huasipica, paipaj achij nicuj jundashcatami ricurcani. Chaita ricushpaca, pambaman tupajtami cumurircani.

5Chaimantaca Mandaj Diosca ñucataca cashnami nirca: “Huañujlla aichayuj runalla, ñuca huasipi tiyacun mandashcacunapi imalla nicushcata ñuca huillashcataca cambaj rinrincunahuantaj alli uyashpa, cambaj ñahuicunahuantaj alli ricushpa yuyaita japiyari. Cai huasimanca pilla yaicunata, pilla llujshinatapish alli entendiyari.

6Chai mana cazuj israelcunamanca cashna huillai: Mandaj Jatun Diosca cashnami nin: Israelcunalla, ña chailla millaitaca ruraichigari.

7Cancunaca shungumanta millai yuyaita mana anchuchishcacunata, c'aricuna charishca aicha mirga caratapish mana p'itishca shujtaj runacunata ñuca huasiman yaicuchishpamari, ñuca huasitaca mapayachishcanguichij. Cancunaca ñucamanca huiratapish, yahuartapishmi curcanguichij. Ñucahuan ari ninacushcata yangata rurashpamari, cancunaca yallitaj millaita rurashcanguichij.

8Shinallataj imalla ñucapajlla cashcacunatapish, manamari ñucapajlla cashcataca yuyashpa huaquichircanguichijchu. Ashtahuanpish ñucapajlla huasipi ñuca mandashcacunata pajtachichunca shujtaj runacunatamari churarcanguichij ninmi ni” nircami.

9Mandaj Jatun Diosca cashnapishmi nin: Israelcunapurapi causacuj shujtaj llajta runacunaca shungumantapish millai yuyaita mana anchuchishca. Paicuna charishca aicha mirga caratapish mana p'itichishca cashpaca, ñuca huasimanca manataj yaicui tucungacunachu.

10Shinallataj israelcuna paicunapaj rurashcalla dioscunata adorashpa ñucamanta caruyajta ricushpaca, levitacunapishmi ñucamanta caruyarcacuna. Chashna rurashcamantaca, paicunapishmi llaquita apangacuna.

11Paicunaca ñuca huasipica pungucunapi cuidashpalla, ñuca huasipi imata rurashpallami causangacuna. Paicunami Diosman cushpa tucuita rupachina animalcunatapish, israelcuna ñucaman cushca animalcunatapish huañuchingacuna. Israelcuna imatapish rurachun nishcatami pajtachingacuna.

12Paicunaca rurashcalla dioscunallata servishpami, israelcunataca millaita rurachishpa pandachircacuna. Chashna millaita rurachichishcamantaca, llaquita apangacunami. Mandaj Jatun Dios ñucatajmi, ñuca maquita huichi alzashpa chashna nini.

13Chai levitacunaca mana ñucata servij curacuna shina ñucata servi tucungacunachu. Imalla ñucapajlla cashcatapish, imalla ñucapajlla ch'icanyachishcacunatapish manataj tupari tucungacunachu. Millaita rurashcamantaca, pingachishcami cangacuna.

14Paicunataca ñuca huasita cuidaj soldadocuna cachun, ñuca huasipi imalla rurana cashcata rurajcuna cachunmi, mingashpa chaipi churasha.

15Ashtahuanpish Sadocpaj huahua huahua levita curacunaca, israelcuna ñucamanta anchurijpipish, ñucapajlla huasipi imallata rurachun mandashcacunataca rurashpa catircacunallami. Chaimantami ñucapaj imatapish ruranaman c'uchuyangacuna. Paicunami ñucaman cushca huiratapish, yahuartapish cungapaj c'uchuyangacuna. Mandaj Jatun Dios ñucatajmi chashna nini.

16Paicunami ñucapajlla huasiman yaicushpa ñucaman cushcacunataca rupachingacuna, ñuca mandashcacunatapishmi pajtachingacuna.

17Ñuca huasiman yaicuna, huasi canllapi tiyaj pungucunata yaicungapajpish, ñucapajlla huasipi imata rurangapajpish lino churanata churarichuncuna, millma churanataca ama churarichuncuna.

18Shinallataj umapica, lino turbanteta churarichuncuna. Lino calzoncillotapish churarichun. Cinturapica ima chumbichinahuanca ama chumbillirichuncuna.

19Diospaj huasipi imatapish rurashca q'uipaca churanacunataca llujshichishpa, Diospajlla huasipi tiyaj uchilla ucucunapi huaquichichuncuna. Jatun huasi canllaman llujshishpa, chaipi cajcunahuan tupangapajca shujtaj churanata churarichuncuna. Chai churanallahuantaj llujshishpaca, huasi canllapi cajcunataca ñucapajllatami rurangacuna.

20Umataca ama lluchuta rutuchichun, yallitaj ajchatapish ama charichuncuna. Ashtahuanpish ashallata p'itirichuncuna.

21Curacunaca ñuca huasiman yaicuna, huasi canllaman yaicungapajca vinota ama ubyachuncuna.

22Shinallataj viudatapish, cusa shitashcatapish ama casarachun. Ashtahuanpish israelcunapaj aillupuramanta c'arihuan manaraj chayarinacushca huarmita cashpa, mana cashpaca cura huañujpi viuda saquirishca huarmita cashpa casarachun.

23Ñuca agllashcacunamanca imalla ñucapaj ch'icanchishca cashcatapish, imalla yanga cashcatapish yachachichun. Shinallataj imalla mapa cashcatapish, imalla mana mapa cashcatapish yachachun yachachinguichij.

24P'iñanacushcacunatapish chai curacunami allichingacuna. Ñuca llaquichichun nishca shinami llaquichingacuna. Ñucata yuyarishpa jatun fiestata rurai punllacunaca ñuca mandashcacunata, ñuca huillachishcacunata rurashpa pajtachichuncuna. Ñuca cushca samana punllacunatapish ama yanga punllacuna shina cashcata yuyachuncuna.

25Ama mapayangapajca, huañushca runapaj aichapipish ama tuparichun. Yayamanta cashpa, mamamanta cashpa, mana cashpaca churimanta cashpa, ushushimanta cashpa, mana cashpaca huauquimanta cashpa, panimanta cashpa, manaraj cusayuj cashpa huañujpica, tuparishpa mapayai tucunmi.

26Mapayashcamanta armashpa mapa illaj tucushcamantaca, canchis punllata shuyachun.

27Ñucata servingapaj ñucapajlla huasiman yaicuna huasi canllaman yaicushpaca, juchamanta animalta ñucaman cuchun. Mandaj Jatun Diostajmi chashna nini.

28Ñucami paicuna japina allpaca casha. Israel llajtapi tiyaj allpacunataca mana japingacunachu, ñucami paicuna japina allpaca casha.

29Chai curacunami ñucamanca imalla cuna cashcata cushcacunatapish, juchamanta animalta cushcatapish, ñucaman animalta cushpa huañuchishcatapish micungacuna. Tucui israelcuna imatapish ñucapajlla cachun cushcacunapish chai curacunapajmi canga.

30Shinallataj tucui punta p'ucushca granocunapish, tucui imalla cuna cashcata cushcacunapish tucuimi curacunapaj canga. Cancunapaj huasicunapi bendicion tiyachunca, punta p'ucushca granomanta rurashca tucui laya tandatami curacunamanca cuna canguichij.

31Curacunaca alasyuj animalcunatapish, shujtaj animalcunatapish mapami nishcacuna huañushcacunataca ama micuchun.