LEVÍTICO 18 - Quichua Chimborazo Bible

Quiquin huasi ucupuracunallahuantajca ama chayarinacuchun mandashcami

1Mandaj Diosca Moisesta mandashpaca:

2“Israelcunaman cashna huillai: Ñucaca Mandaj Dios, cancunapaj Diosmi cani.

3Cancuna causacushca Egiptopi causajcuna rurashca shinaca ama ruranguichijchu.

Ñuca cancunata cunan Canaán llajtaman pushacun llajtacuna ruraj cashca shinapish ama ruranguichijchu. Paicunapaj mandashcacunapi nishcacunatapish amataj ruranguichijchu.

4Ñuca mandashcacunata chaitataj pajtachina yuyailla ruranguichij. Ñuca chaitataj pajtachichun nishcacunata huaquichishpa, chaipi nishca shinataj puringuichij. Ñucami Mandaj Dios cancunapaj Taita Dios cani.

5Ñuca chaitataj pajtachichun nishcacunata, mandashcacunatapish pajtachinguichij. Chai mandashcacunata pajtachijcunami causanga. Ñucami Mandaj Dios cani.

6Maijan c'aripish quiquin familiamanta caj huarmihuanca ama chayarinacuchun. Ñucami Mandaj Dios cani.

7Cambaj yayata, mana cashpaca cambaj mamataca ama llatanashpa ricungui. Quiquin mama cashcamanta ama llatanashpa ricungui.

8Cambaj yayapaj huarmitaca ama llatanashpa ricungui. Cambaj yaya llatanashpa ricunami.

9Cambaj quiquin panitaca ama llatanashpa ricungui. Cambaj yayamanta cashpa, cambaj mamamanta cashpa panitaca huasi ucupurapi huacharishca cajpi, mana huasi ucupurapi huacharishca cajpipish ama llatanashpa ricungui.

10Cambaj churipaj ushushita cashpa, cambaj ushushipaj ushushita cashpa ama llatanashpa ricungui. Quiquin aichapura cashcamantami mana llatanashpa ricuna cangui.

11Cambaj yayapaj huarmipaj ushushitaca ama llatanashpa ricungui. Cambaj yayapaj ushushi cashcamanta quiquin pani cashcamanta ama chashna rurangui.

12Cambaj yayapaj panitaca ama llatanashpa ricungui. Paica cambaj yayapaj huasi ucupurami.

13Cambaj mamapaj ñañataca ama llatanashpa ricungui. Paica cambaj mamapaj huasi ucupurami.

14Cambaj yayapaj huauquipaj huarmitaca ama llatanashpa ricungui. Paipaj huarmipajman ama quichquiyangui. Paica cambaj yayapaj huauquipaj huarmimi.

15Cambaj churipaj huarmita ama llatanashpa ricungui. Paica cambaj churipaj huarmimi. Paitaca ama llatanashpa ricungui.

16Cambaj huauquipaj huarmita ama llatanashpa ricungui. Paica cambaj huauqui llatanashpa ricunami.

17Mamandij ushushindijca ama llatanashpa ricungui. Paipaj churipaj ushushitapish, paipaj ushushipaj ushushitapish ama llatanashpa ricungui. Paicunaca quiquin familiapurallataj cashcamanta, chaita rurajpica yallitaj millaimi canga.

18Ñañandijtatajca cambaj huarmi cachun ama japingui. Cambaj huarmi causacujpirajca, ñañallatataj llatanashpa ricushpa ama ñañandijta p'iñanacuchingui.

19Quillanta shamuna yahuar shamucujpi mapalla huarmita llatanashpa ricunapaj ama paipajman c'uchuyanguichu.

20Shujtajcunapaj huarmihuan ama chayarinacunguichu. Paihuan chayarinacushcamanta ama mapayanguichu.

21Cambaj churitaca Moloc nishca rurashcalla diosman cushpa ama rupachinguichu. Chashna rurashpaca, cambaj Taita Diospaj shutitami yanganchingui. Ñucami Mandaj Dios cani.

22Huarmihuan siririj shinallatajca shuj c'arihuanca ama siriringuichu. Chaica yallitaj millananami.

23Animalhuanca ama chayarinacunguichu. Paihuanca ama mapayanguichu. Shinallataj huarmipish animal paipi chayarichun animalpaj ñaupajpi ama ricuchichun. Manapish rurana cashcata ruraj millaimi canga.

24Cai shina manapish ruranacunata rurashpaca ama mapayanguichijchu. Cancunapaj ñaupajmanta ñuca anchuchishpa shitana llajtacunaca tucui cai manapish ruranacunata rurashpa mapayajpimi,

25llajtapish yallitaj millai mapa tucurca. Paicuna millaita rurashcata ñuca ricugrijpica, chai llajtaca chai llajtapi causajcunataca shungu tigrarcami.

26Chaimanta cancunaca ñuca chaitataj pajtachichun nishcacunata, ñuca mandashcacunata huaquichishpa chai llajtapi causajcuna rurashca shina millananacunataca amataj ruranguichijchu. Israelcuna cashpapish, cancunapurapi causaj mana israelcuna cashpapish chai shina millananacunataca amataj ruranguichijchu.

27Chai llajtaman cancuna manaraj chayajpimi, chai llajtapi causajcunaca chai shina millananacunata rurashpa causajpi, chai llajtaca mapayarca.

28Cancuna millananata rurashpa chai llajtata mapayachijpica ñataj cancunatapish cancuna manaraj chayajpi, chaipi causajcunata shungu trigrashca shina cancunatapish shungu tigranman.

29Maijanpish chai shina millananacunata rurajpica, chashna millananata rurajcunataca israelcunapuramanta anchuchishcami canga.

30Cancunaca ñuca mandashcacunata huaquichinguichij. Cancuna manaraj chai llajtaman rijpi, chai llajtapi causajcuna paicunapaj millanana ruranacunata ruraj cashcataca amataj ruranguichijchu. Chai rurashcacunahuan ama mapayangapajmi mana rurana canguichij. Ñucami Mandaj Dios cancunapaj Dios cani” nircami.