GÁLATAS 1 - Quichua Chimborazo Bible

Allillachu canguichij nishcami

1Pabloca (mana runacuna mandashcamanta, mana runacuna agllashcamantachu, ashtahuanpish huañushcacunapaj chaupimanta Dios Yaya causachishca Jesucristomantami) apóstol cani.

2Ñucahuan caj tucui huauquicunandijmi, Galaciapi tandanacushca crijcunamanca:

3Dios Yayapaj, ñucanchijta Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchij.

4Ñucanchij Dios Yayapaj munaita rurashpami, cai millai pachamanta llujshichingapaj ñucanchij juchacunamanta paillataj curirca.

5Chaimanta Diostaca, huiñai huiñaita jatunyachishca cachun. Chashna cachun.

Shujtaj alli huillaica mana tiyanchu

6Mana c'uyaipajta c'uyaj Cristomanta Dios cayashcamantaca, ña maita anchurishpa alli huillaitaca shujtaj shina caticujpimi mancharini.

7Shujtaj alli huillaica mana tiyanchu. Ashtahuanpish maijancunaca, Cristopaj alli huillaitami shujtajyachishpa pandachisha nicuncuna.

8Ashtahuanpish cancunaman alli huillaita ñucanchij huillashca shina mana huillashpa, alli huillaita shujtaj shina huillajpica ñucanchijllatataj cashpa, jahua pachamanta angelta cashpapish llaquichinapaj cachun.

9Ñaupaman ña nishca shinallatajmi, cunanpish cutin nini: Cancuna chasquishca alli huillaita mana huillashpa, alli huillaita shujtaj shina huillajca llaquichinapaj cachun.

Pabloca Diospajta rurajmi cani nishcami

10Chashna nishpaca ¿runacuna alli nishcata, mana cashpaca Dios alli nishca canatachu mashcacuni? Mana cashpaca ¿runacunatachu cushichisha nicuni? Runacunallata cushichicushpaca, mana Cristopajta rurajchu caiman.

11Ashtahuanpish huauquicuna, cancunamanca caitami yachaj chayachini. Ñuca huillashca alli huillaica, mana runacunapaj yuyaimantachu.

12Caitaca mana maijan runamanta ñucaca chasquircanichu, yacharcanichu. Ashtahuanpish Jesucristo ricuchijpimi chasquircani.

13Judiocuna yachachishcata caticushpa, ñaupa ñuca ima shina cashcataca, ñami uyashcanguichij. Ñucaca Diospaj tandanacushca crijcunata chingachisha nishpami, yallitaj catirashpa llaquichij carcani.

14Ñuca mama llajtapi judiocuna yachachishcata yachacushpaca, ñuca huiñaicunatapish achcacunata yallimi yachaj carcani. Ñucanchij yayacunapaj ruraicunatapish pajtachina yuyailla tucushpa pajtachijtajmi carcani.

15Ashtahuanpish mamapaj huijsapi cajpirajmi, Diosca pai munashcamanta ch'icanchirca. Paipaj mana c'uyaipajta c'uyaihuanmi ñucataca cayarca.

16Mana judiocunapurapi huillachunmi, paipaj Churita ñucaman ricuchirca. Chaimi pita mana tapurcani.

17Ñucapaj ñaupa apostolcunata ricungapajllapish Jerusalenmanca mana huichiyarcanichu. Chaipaj randica Arabiaman rishpami, Damascoman cutin tigrarcani.

18Quimsa huata q'uipami, Pedrota ricungapaj Jerusalenman huichiyarcani. Paihuanca chunga pichca punllacunatami chaipi carcani.

19Apostolcunamanta pi shujtajtaca mana ricurcanichu. Mandaj Jesuspaj huauqui Jacobollatami ricurcani.

20Caipi cancunaman quillcashpaca, Diospaj ñaupajpi manataj llullanichu.

21Chai q'uipaca Siriapi, Ciliciapi caj llajtacunamanmi rircani.

22Ashtahuanpish Cristohuan shujlla tucushca Judeapi tandanacushca crijcunaca, ñucatatajca mana rijsircacunachu.

23Paicunaca: “Ñaupa punllacuna ñucanchijta catirashpa llaquichijpish, pai chingachisha nicushca crinallatatajmi cunanca huillacun” nijllatami uyashcacuna carca.

24Chaimi ñucamantaca, Diosta jatunyachircacuna.