DEUTERONOMIO 18 - Quichua Chimborazo Bible

Levitacuna imallata japina cashcami

1Cura cashpapish mana cura cashpapish Levi ailluca tucuicuna israelpica ima japinatapish, allpatapish mana charinchu. Paicunaca Mandaj Diosman cushpa rupachishcacunata paiman cushcacunallatami micungacuna.

2Paicunapaj huauquicunapurapica, ima japinata mana charingacunachu. Mandaj Dios nishca shinallataj paicunapaj japinaca Mandaj Diosmi.

3Shuj huagrata cashpa, ovejata cashpa israelcuna Mandaj Diosman cushcata curacuna japinaca caicunami: Changa aicha, jashlin, puzunmi canga.

4Punta p'ucushca trigotapish, punta rurashca vinotapish, punta rurashca aceitetapish, ovejacunata punta rutushca millmatapish cunguichij.

5Mandaj Diosca tucui aillucunamantaca levitacunatami agllarca. Paicunataca paipaj imalla rurana cashcata Mandaj Diospaj shutipi huahua huahua paicunalla rurashpa catichunmi agllarca.

6Cancunapaj llajtapi causaj levitaca maijan pueblopi causacushca cashpapish paipaj shungupi Mandaj Dios agllashca pueblopi causagrina munaita charishpaca chaiman rishpa,

7Mandaj Dios paipaj Taita Diospaj shutipi chaipi caj paipaj huauqui caishuj levitacuna shinallataj Mandaj Diospaj ñaupajpi paipaj imalla rurana cashcata rurashpa causachunlla.

8Micunatapish caishujcuna shinallatajmi japinga. Yayapajta imallata japishca jahuami chashna japinga.

Ama shujtaj runacuna shina causanguichij nishcami

9Cancunaca Mandaj Dios cancunapaj Taita Dios cushca llajtaman chayashpaca, chai llajtapi causajcuna rurashca shina millananacunataca ama ruranguichijchu.

10Cancunapuramanta maijanpish rurashcalla dioscunaman paipaj churita cashpa, ushushita cashpa cushpa rupachijca ama tiyachun. Shinallataj adivinaj canata, brujo canata, yumbu canata, muspachij canata yachashpa rurajcunaca ama tiyachun.

11Muspachij yumbupish, adivinajpish, ima shinapish muspachijpish, huañushcacunata tapujpish ama tiyachun.

12Maijanpish chashna rurajcunaca Mandaj Diospajca millananami. Paicunaca chashna millananacunata rurajcuna cashcamantami, Mandaj Dios cancunapaj Taita Diosca chai llajtapi causajcunataca cancunapaj ñaupajmanta llujshichishpa cachagrin.

13Chaimanta canca imata mana pandashpa Mandaj Dios cambaj Taita Dios yuyailla cangui.

14Cancunapaj cachun japigricun llajtapi causajcunaca brujocunata, adivinocunatami tapuncuna. Ashtahuanpish cancunataca Mandaj Dios cancunapaj Taita Diosca manataj chaita rurachun saquingachu.

Taita Diosca Moisés shina pai ima nishcata huillajta cachasha nishcami

15Mandaj Dios cancunapaj Taita Diosca cancunapuramanta cancunapaj huauquicunatami ñuca shinallataj huillajta shujtajta jatarichinga. Paita uyanguichij.

16Horeb urcupi cancuna tandanacushca cashpa Mandaj Dios cancunapaj Taita Diostaca: Ñucanchijta Mandaj Dios rimashcataca mana ashtahuan uyashun ninchijchu, ama huañungapaj cai nina lunyacujtapish mana ashtahuan ricushun ninchijchu nircanguichijmi.

17Chaimantami Mandaj Diosca ñucataca: Paicuna nishcaca allimari.

18Paicunapaj huauquicunapuramanta ñuca ima nishcata huillajtami jatarichisha. Paica can shinallatajmi canga. Ñuca shimicunataca paipaj shimipimi churasha. Tucui ñuca imata mandashcatami paica huillanga.

19Ñuca huillachishcata ñuca shutipi huillajta mana uyajtaca, ñucami paitaca imamanta mana uyasha nishcata tapusha.

20Maijanpish manapish ñuca huillachijpi Mandaj Diosmi huillachin nishpa huillajca huañuchishcami canga. Shinallataj shujtaj dioscunapaj shutipi huillajpish huañuchishcami canga nircami.

21Cancunapaj shungupica: Mandaj Dios manapish huillachijpi huillaj cajtaca ¿ima shinataj yachashunri? ninguichijmi.

22Chai huillajca Mandaj Dios huillachijpimi huillani nishpa huillashca pai nishca shina mana pajtajpi, pai nishca shina mana tucujpica manapish Mandaj Dios huillachishcami canga. Chaica paipaj yuyaillamanta huillashcami canga. Paitaca ama manchanguichu.