PROVERBIOS 4 - Quichua Chimborazo Bible

Alli causachun cunashcami

1Huahuacuna, cancunapaj yaya

yachachishcata uyaichij.

Tucui yuyaihuan uyashpami, alli

yuyaiyuj canataca yachanguichij.

2Ñucaca allitami yachachini.

Ñuca mandashcataca ama mana

yachashpa saquirichijchu.

3Ñucapish cancuna shinallataj

huambrami carcani.

Ñuca yaya mamapajca, ñucalla huahua

tiyashca shina, yallitaj c'uyashcami

carcani.

4Chaimantami ñuca yayaca cashna

yachachij carca: “Ñuca cushca

yuyaicunataca cambaj shungupi charingui.

Ñuca mandashcacunata cazushpami,

sumajta causangui.

5Ñuca yachachishcacunataca amataj

cungaringuichu, amataj saquinguichu.

Chashnami alli yachaitapish, alli

yuyaitapish ashtahuan japingui.

6Can mana saquijpica, cantapish

huaquichingami.

Can c'uyajpica, cantapish allipimi

charinga.

7Tucui imata rurangapajpish alli

yachaitaraj mashcangui.

Cambaj ima charinacunamanta puntaca,

alli yuyaitaraj japingui.

8Cai yachashcata can jatunyachijpica,

cantapish jatunyachingami.

Paipi can ugllarijpica, cantapish

alli nishcatami ruranga.

9Cambaj umapipish, sumaj ricunatami

churachinga.

Sumaj ricurina coronatami cunga”

nishpami yachachij carca.

10Ñuca huahualla uyayari, ñuca

cushca yuyaicunataca chasquiyari.

Chaimari canmanca uni huatacama

causaita cunga.

11Ñucaca allita yachana ñanpimi

cantaca churani.

Allita rurashpa causana ñantami

pushacuni.

12Cai ñanpica can purinataca

ima mana jarcangachu.

Callpashpa purishpapish, mana

ñitcaringuichu.

13Ñuca cunashcataca alli charishpa,

chai yuyai cangui.

Chaitaca huaquichinguitaj, chaimari

canmanca causaita cunga.

14Diosta mana manchajcunapaj

ñanpica, ama yaicunguichu.

Millaicunapaj ñantaca amataj

catinguichu.

15Chai ñanmanca ama yaicuichu,

saquilla.

Chaimanta anchurishpa shujman tucuilla.

16Paicunaca ima millaita mana rurashpaca,

mana dormincunachu.

Pita mana urmachishpaca, dormitapish

mana japincunachu.

17Millaita rurashcallahuanmi micuncuna,

vinotapish shuhuashcallatami ubyancuna.

18Ashtahuanpish cashcata rurajcunapaj

causaica, pacarijpi achijlla inti

llujshishpa, chaupi punllayajpi

ashtahuan achijlla tucuj shinami.

19Diosta mana manchajcunapaj

ñanca amsa tuta shinami, imapi

tsagnaricushcatapish mana yachancunachu.

20Ñuca huahualla, ñuca shimicunataca

yuyaipi uyayari.

Ñuca yuyaicunataca rinrinta

mañachishpa uyayari.

21Cambaj ñahuicunatapish ama

anchuchinguichu.

Cambaj ucu shungupi huaquichishpa

charingui.

22Cai shimicunata japijmanca causaita

cunmi, aichatapish jambinmi.

23Tucuimanta yallica cambaj shunguta

huaquichingui.

Shungupi yuyashcami causaipica ricurin.

24Cambaj shimihuanca ama millaita

rimanguichu.

Llullaj canatapish jarcarishpa causangui.

25Cambaj ñahuihuanpish allita ricungui,

ñaupajman charicushcata chapangui.

26Cambaj chaquihuan maipi sarucushcata

alli ricungui.

Tucui imata rurashcapish, alli

cachun ricungui.

27Alli ñanmantaca, alli maquimanpish,

lluqui maquimanpish ama anchuringuichu.

Mana allimantaca cambaj chaquita

anchuchilla.