2 CRÓNICAS 1 - Quichua Chimborazo Bible

Salomonca yachaisapa canata cuchun Taita Diosta mañashcami(1 R 3.3-15)

1Davidpaj churi Salomonca, paita Mandaj Dios paihuan cajpimi, tucuita mandai callarirca. Mandaj Diosmi paitaca mandanapica, pi mana cuyuchipajta shina rurarca.

2Chaimi Salomonca tucui israelcunata Jerusalenman cayarca. 1.000 soldadocunata mandajcunata, patsaj soldadocunata mandajcunata, juezcunata, tucui Israel aillucunata mandajcunata, quiquin familiacunata mandajcunatapishmi tandachirca.

3Chashna tandachishpaca, tucui chaicunahuanmi Gabaonpi caj lomapi tiyaj altarman rirca. Dioshuan tupana carpa huasi chaipi tiyacujpimi, chaiman rirca. Chai carpa huasitaca Diospajta ruraj Moisesmi, shitashca pambapi rurashca carca.

4Taita Diospaj arcataca Davidmi, Quiriat-jearimmanta Jerusalenman apamushca carca. Chai arcata churangapajca, Jerusalenpimi shuj carpa huasita shayachishca carca.

5Bronce altartaca, Hurpaj churi Uripaj churi Bezaleelmi rurashca carca. Chai altarpishmi Gabaonpi carca. Mandaj Diospaj carpa huasi ñaupajpimi tiyacurca. Diosta tapungapajmi Salomonca, tucui tandanacushcacunandij Gabaonman rirca.

6Salomón chaiman chayashpaca, Mandaj Dioshuan tupana carpa huasi ñaupajpi caj altarman huichiyashpami, huaranga animalcunata Mandaj Diosman cushpa tucuita rupachirca.

7Chai tutallatajmi Taita Diosca, Salomonman muscuipi ricurishpaca: “Can imata nishcata mañailla, ñucaca cushallami” nirca.

8Shina nijpi Salomonca, Taita Diostaca: “Canca ñuca yaya Davidtaca, yallitajmi c'uyashcangui. Chaimi ñucataca, paipaj randi mandachun churashcangui.

9Mandaj Taita Dioslla cunanca ñuca yaya Davidman nishcata pajtachipayari. Ñuca mandachun can cushcacunaca, t'iyu allpa shina yallitaj achcacunamari. Canmari chai tucuicunapaj jatun mandaj cachun churahuashcangui.

10Cai tucuicunapaj ñaupajpi tiyashpa mandai tucungapajca canllataj yachaisapa cantapish, alli yuyaitapish cuhuaiyari. Can agllashca yallitaj achcacunataca pitaj mandai tucungari” nircami.

11Shina nijpi Taita Diosca, Salomontaca: “Canca chaillatami munashcangui. Achcata charij canatapish, ima allicunatapish, alli nishca canatapish, canta p'iñajcunata chingachichunpish, canman uni causaita cuchunpish mana mañashcanguichu. Ashtahuanpish can mandachun cushca ñuca agllashcacunata mandai tucungapaj yachaisapa canata, alli yuyaita cuchunllami mañashcangui.

12Chashna cashcamantaca yachaisapa canatapish, alli yuyaitapish cunimi. Chai jahuami achca allicunata cushpa charijta rurasha, alli nishcatapishmi rurasha. Can japinapaj tiyacuj shinataca, cambaj ñaupa tiyaj jatun mandajcunapish pi mana charircachu. Cambaj q'uipapish pi mana charingachu” nircami.

13Chai q'uipaca Gabaonmantaca, Dioshuan tupana carpa huasimanta Jerusalenman tigramushpami israelcunataca mandai callarirca.

Salomonca carrocunata caballocunata randijpish c'atujpish cashcami(1 R 10.26-29; 2 Cr 9.25-28)

14Salomonca carrocunata, caballopi tiyarij gentecunatapish ashtahuanmi tandachirca. Paica 1.400 carrocunata, caballopi tiyajcunatapish 12.000 gentecunatami charirca. Chaicunamanta shujcunataca, carrocunata maillapi huaquichishca pueblocunapimi churarca. Caishujcunataca Jerusalenpimi pai jatun mandajta cuidachun churarca.

15Jatun mandajca Jerusalenpica yallitaj cullquiyuj curiyujmi tucushpa catirca. Paipajca cullquipish curipish rumicuna shina yallirajmi tiyarca. Cedro caspicunatapish, Sefela pambapi tiyaj sacha higo yuracuna shina yallitaj achcatami charirca.

16Salomonpajca caballocunatapish, ashtahuan alli linsocunatapish paipaj randijcunami Egiptomantaca ñaupaman mañashpa randimujcuna carca.

17Egipto llajtapica carrotaca 600 cullquipimi randijcuna carca. Caballotaca, 150 cullquipimi randijcuna carca. Chaicunataca Salomonpaj randishpa c'atushpa purijcunamanmi Egiptomanta apamujpi heteocunata, siriocunata jatun mandajcunaca paicunaman randijcuna carca.