1Mandaj Dioslla, tucui ñuca shunguhuanmi canta alabasha.
Mancharinacunata can rurashcataca, tucuitami parlasha.
2Cushicushami, canpimi jatunta cushicusha.
Jahua pachapi caj, cambaj shutitami cantasha.
3Ñucata p'iñajcunaca can ricurijpica huashaman tigranllacunami, urmashpa chingarinllacunami.
4Ñucataca mitsanataj cashcamantaca mitsashcanguimi.
Can tiyanapi tiyarishpami, ima shina cashcatataj ricushpa cashcatataj rurashcangui.
5Llajtacunapi causaj canta mana manchajcunataca, sinchitami rimarcangui.
Millaitaca chingachircanguimi.
Paicunapaj shutitapish huiñai huiñaipajmi p'icharcangui.
6Ñucata p'iñajcunaca chingarishcamari.
Paicuna causana pueblocunapish huiñaipajmi shitashca saquirishca.
Chai pueblocunataca canmari ñutuchishcangui.
Yuyarinapaj cachunllapish mana saquishcanguichu.
7Mandaj Diosca huiñaitami mandanga.
Paica imalla rurashcata ricuchingapaj tiyarinatapish ñami allichishca.
8Cai pachapi causajcunataca cashcatataj rurashpami mandanga.
Paica mana ñahuita ricushpalla mandangachu.
9Mandaj Diosca huajchacuna miticunami.
Llaqui punllacunapi paca tucunami.
10Mandaj Dioslla, cambaj shutita rijsijcunaca, canpimi shunguta churangacuna.
Canta mashcajcunataca manataj shitashcata saquinguichu.
11Sionpi causaj Mandaj Diosta cantaichij.
Pai imalla rurashcataca shujtajcunamanpish huillaichij.
12Diosca huañuchishcamanta paitapish llaquichinataca mana cungarircachu.
Llaquihuan cajcuna caparishpa mañashcatapish, mana cungarircachu.
13Mandaj Dioslla, ñucata llaquihuayari.
Ñucata p'iñajcuna llaquichicujpi llaquita apacujtaca ricuhuayari.
Ñuca huañui pungullapi cajpipish canmi quishpichingui.
14Cantaca alabanataj cashcata Sionpi causajcunapaj pungucunapi huillachunmi quishpichingui.
Can quishpichishcamantaca, jatuntami cushicuni.
15Shujtaj llajtacunapi causajcunaca, paicunallataj rurashca jutcupimi huashicurcacuna.
Paicunallataj pacashpa churashca linchillapitajmi chaquicuna churarishpa urmashcacuna.
16Mandaj Diosca paicunataca paicuna ima shina cashcatataj ricuchishpami llaquichin.
Chashnami paica Diostaj cashcata ricuchin.
Millaicunaca shujtajcunata urmachingapaj paicunapaj maquihuan churashcallapitajmi urmancuna. Higaión. Selah
17Diosta cungarij llajtacunata, paita p'iñaj millaicunataca Seolmanmari tucuicunata shitanga.
18Huajchacunataca huiñaipajtajca mana cungashcachu.
Paicuna shuyacushcataca mana yanga shuyacungallachu.
19Mandaj Dioslla, shayariyari.
Runacuna jatun tucuchunca ama saquichu.
Llajtacuna ima shinalla rurashcataca, cambaj ñaupajpi ricuchishca cachun.
20Mandaj Dioslla, manchana yuyaita paicunapi churayari, tucui llajtapi causajcunataca runacunalla cashcata, paicunaca manapish ima cashcata ricuchiyari. Selah
Who We AreWhat We EelieveWhat We Do
2025 by iamachristian.org,Inc All rights reserved.
