1 CORINTIOS 4 - Quichua Chimborazo Bible

Apostolcunaca Diospajta rurajcunami cashca

1Chaimanta ñucanchijtaca, Cristopajta rurajcuna cashcata, Diospaj pacallapi cajta alli ricushpa yachachichun mingashcacuna cashcata yuyaichij.

2Maijanmanpish imata rurachun mingashcataca, allita rurashpa pajtachij cashcatami ricusha nin.

3Cancuna cashpa, cai pacha juezcuna cashpapish ñucata juchachishcaca, ima mana canchu. ¡Ñucallatajpish ima shina cashcataca mana ricuri tucunichu!

4Ñuca yuyaipi ima mana allita rurashca mana tiyajpipish, cashcata rurajmi cangui nishcaca manaraj canichu. Ashtahuanpish ñuca ima shinalla cashcata ricuchijca Mandaj Jesusmi.

5Chashna cashcamanta manaraj punlla pajtajpica, ama imata juchachichijchu. Mandaj Jesús shamungacama shuyaichij. Paimi, amsapi pacalla cajtaca achijman llujshichishpa ricuchinga. Shinallataj shungucuna yuyashcatapishmi ricuchinga. Chaipimi Dios alli nishca canataca cada quiquin chasquinga.

6Chaimanta huauquicuna, ñucapish Apolospish ima shina cashcata cancuna ricushpa catichunmi, cancunata c'uyashcamanta chashna nini. Quillcashcata ricushpaca paimi alli caishujca mana allichu nishpa ama shujllata jatunta rurashpa, caishuj chaishuj rimanacuichijchu.

7Chashna cajpica ¿pitaj cantaca caishujta yalli jatunyachin? ¿Can charishcacunataca manachu tucuita Dios cushca? Pai cushcallata charishpaca ¿ima nishpataj canllataj charishca shina jatun tucungui?

8Ña mana nijta micushcacuna shina, ña achcata charijcuna shina, ñucanchij illajlla mandacushcata yuyacujcunami canguichij. ¡Ima shinamanta mandanguichijpishchari, ñucanchijpish cancunahuan tandalla mandangapaj!

9Diosca ñucanchijtaca apostolcuna cajpipish, huañunatajmi canguichij nishcacunata shina huashaman churashcatami yuyani. ¡Chaimantami cai pachapaj, angelcunapaj, gentecunapajpish ricushpa asina tucushcanchij!

10Ñucanchijca Cristopaj c'uyaimantaca yuyai illajcunami canchij, cancunaca Cristopica yuyaiyujcunami canguichij. Ñucanchijca irquicuna, cancunaca sinchicuna, cancunaca alli nishcacuna, ñucanchijca mana ricunachishcacunami canchij.

11Cunan punllacamami yaricaihuan, yacunaihuanpish llaquita apacunchij, churana illaj, pipish macashca, maipi causanapish illajllami canchij.

12Ñucanchij quiquin maquihuanmi shaicuita trabajacunchij. Llaqui tucunman nijcunatapish paicunapish llaqui tucushca canman mana ninchijchu. Ñucanchijta catirashpa llaquichijpipish, apanchijllami.

13Ñucanchijta millaita rimajpipish, c'uyaihuanmi cutichinchij. Ñucanchijca cunancamaca cai pacha ñucu shina, tucuicuna millanami tucumushcanchij.

14Caicunataca mana cancunata pingachingapajchu, ashtahuanpish ñuca c'uyashca huahuacunata shina sinchita cunangapajmi quillcani.

15Cancunaca, Cristomanta chunga huaranga yachachijcunata charishpapish, mana tauca yayacunataca charinguichijchu. Alli huillaita ñuca huillacujpi cancuna Cristo Jesuspi crishcamantaca, ñucallami cancunapaj yaya cani.

16Chashnami cancunataca, ñuca ima shina caj shina cachun rogani.

17Chaipajllatajmi Timoteotaca cancunapajman cacharcani. Paica Mandaj Jesuspajta alli pajtachij, ñuca c'uyashca churimi. Paimi Cristohuan ñuca ima shina cashcata, tandanacushca crijcunaman maipipish ñuca ima shina yachachishcatapish cancunaman yuyachinga.

18Cancunapajman ñuca manataj rina cajpi shinami, maijancunaca jatun tucushcacuna.

19Ashtahuanpish Mandaj Jesús munajpica, ñallami ricunaman shamusha. Chaipica jatun tucushcacunataca mana shimi rimarishcallata uyashachu, ashtahuanpish imata rurai tucushcatami ricusha.

20Diosmi mandacun nishpaca mana rimarinallachu. Ashtahuanpish imatapish rurai tucushcahuanmi ricuchina.

21Ñuca cancunapajman shamushpaca ¿varahuanchu, mana cashpaca c'uyaihuanchu, alli shunguhuanchu, imahuantaj shamuchun ninguichigari?