1Jobca cashna nishpami cutichirca:
2Ñucaca chashna cana cashcataca
yachanillatajmi.
¿Ima shinataj runaca Taita Diospaj
ñaupajpica, alli ricuringari?
3Paihuan rimanacushpapish, huaranga
shimicunamantaca shujllatapish
mana cutichi tucungachu.
4Paica tucuita yachajmi, imatapish
rurai tucujmi.
Maijanpish paita c'ariyashpa
shayarijtaca chingachinllami.
5Pai p'iñarishpaca, urcucunatapish
tugyachinllami.
Chashna llaquichishcataca, pi mana
yachanchu.
6Paica allpataca, maipi
tiyacushcamantaca cuyuchinllami.
Allpata aparicuj pilarcunatapish
chujchuchinllami.
7Intita ama llujshichun nishpa pai
mandajpica, mana llujshinchu.
Luzerocunatapish sellashca shinami pacan.
8Paillami jahua pachataca, linsota
chutaj shina churarca.
Paica caiman chaiman cuyucuj mama
cucha jahuata purijmi.
9Osa shuti, Orión shuti, Pléyades shuti
luzerocunatapish paimi rurarca.
Shinallataj uraman tiyaj
pacallacunatapishmi rurarca.
10Paica pipish mana entendipaj
imallatajshi jatuncunata rurajmi.
Mana yupai tucuipaj achca
allicunatapish rurajmi.
11Riqui, pai ñuca ñaupajta rijpipish,
paitaca manamari ricunichu.
Pai pasajpipish, manamari entendinichu.
12Pai imata quichujpica, ¿pitaj
cutin tigra quichui tucungari?
¿Pitaj imatataj ruracungui ningallapishri?
13Taita Diosca, pai p'iñarinataca
mana saquingachu.
Jatun tucushcacunata ayudajcunapish,
paipaj chaqui ucupimi sarurincuna.
14¿Ñucacarin paimanca imatataj cutichishari?
¿Mashna agllashca shimicunatataj
paihuanca rimashari?
15Ñucaca cashcata ruraj cashpapish,
mana imata cutichi tucuimanchu.
Ashtahuanpish ñuca jueztaca rogarimanllami.
16Ñuca mañashcata uyashpa pai
cutichijpipish, ñuca rimashcata
uyashcataca manaraj crimanchu.
17Paica ñucamanca, jatun mancharina
llaquicunatami curca.
Yangamantamari ñuca chugricunataca,
ashtahuan mirachirca.
18Cushicuita charichunpish, mana saquinchu.
Ashtahuanpish jatun llaquicunallatamari
apachihuarca.
19Pai imata rurai tucuj cashcata
rimajpica, tucuita rurai tucujmi.
Ima rurashcata ricui callarijpica,
¿pitaj ñucapaj randica, shayari tucungari?
20Ñucaca cashcata rurajmi cani nirishpaca,
ñuca quiquin shimillahuantajmi
llaquipi yaicuiman.
Ñucaca ima pandata mana ruraj canichu
nirishpapish, millai runami caiman.
21Ñucaca ima juchachina illajlla cashpaca,
ñucallatajmi mana cazuriman.
Ñuca causaitapish p'iñaimanmi.
22Caillatami nisha nini: Paica allita
rurajtapish, paita mana manchajtapish
chingachinllami.
23Azotishpapish huañuchinllami.
Ima juchachina illaj runa llaquihuan
cajpipish, asinllami.
24Cai pachataca, Diosta mana
manchajcunamanmi curca.
Paicunapaj juezcunapaj ñahuicunatapish tapanmi.
Mana paillataj tucuita ruracujpica,
¿pitaj canga, maipitaj canga?
25Ñuca causai punllacunaca, quillcata
apajtapish yalli utcamari callpashca.
Ima allitapish manaraj ricujpimari miticushca.
26Callpaj barcocuna shinamari callpashca.
Aichata micunaman uriyacuj águila
shinamari callpashca.
27Ñucaca: Llaquicunata cungarishpa,
llaquijlla ñahuita mana ricuchishpa,
cushijlla cashcata ricuchisha yuyanimi.
28Shina cajpipish, cai tucui
nanaicunaca muspachicunmari.
Ñucataca manamari ima juchachina illajlla
cashcata yuyanguichu.
29Ñucaca Diosta mana manchajmi cani.
¿Imapajtaj yangaca imatapish rurashari?
30Ñucataca rasu yacucunahuan armarishca
cajpipish, maquicunata rasu shinallataj
yurajllata maillarishca cajpipish,
31jutcupimari shitahuashcangui.
Chaipica ñuca quiquin churanacunapish,
ñucataca millanachingacunami.
32Paica manamari ñuca shina runallachu.
Chaimantami paitaca mana c'ariyai tucuni.
Paihuan ñucahuan parlanacushpaca,
alli tucuimanchari.
33Ñucanchij jahuapi maquicunata churashpa
allichij juezca, pi mana tiyanchu.
34Paipaj varata ñuca jahuamanta
anchuchishpachari alli canman.
Pai cachashca manchaipish ñucataca,
ama manchachishca cachun.
35Chashna cajpica, mana manchashpa
rimashami.
Cunanca cashnaca mana ñucachu cani.
Who We AreWhat We EelieveWhat We Do
2025 by iamachristian.org,Inc All rights reserved.
