NÚMEROS 29 - Quichua Chimborazo Bible

Trompetacunapi tocashpa fiestata ruranami(Lv 23.23-25)

1Canchis quillapaj punta punllapica, tucuicunata cayashpa Diospajlla tandanacuita ruranguichij. Chai punllapica cancuna trompetacunapi tocana punlla cachun. Chai punllapica sinchi trabajocunataca imata ama ruranguichij.

2Mandaj Diospaj mishquijlla ashnacuj cachun cunataca shuj bizita, shuj carnerota, shuj huatayuj canchis c'ari ovejacunata cushpa tucui rupachinguichij. Chai animalcunaca ima mana tucushca cachun.

3Chaicunahuan cuna cutataca, bizihuanca shuj efata chungapi chaupishca quimsa parte ashtahuan alli cutata aceitehuan chapushcahuan cunguichij. Carnerohuanca shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

4Shuj huatayuj c'ari ovejacunahuanca cada ovejahuan shuj efata chungapi chaupishca, shuj parte ashtahuan alli cutata aceitehuan chapushcahuan cunguichij.

5Juchallishcamanta Mandaj Dioshuan alli tucungapajca shuj chivota cunguichij.

6Quillanta cushpa tucui rupachinatapish, punllanta cushpa tucui rupachinatapish, tallina vinotapish chai punllacunapipish cunataca ama saquishpa mandashcapi nishca shinallataj cunguichij. Chai cushcacunaca Mandaj Diospajca mishquiman ashnacujmi canga.

Diosman cutirishpa imallata cunami(Lv 23.26-32)

7Chai canchis quillallapitaj chunga punllapica, tucuicunata cayashpa Diospajlla tandanacuita ruranguichij. Mana alli rurashcata yuyarishpa cancunapaj alma llaquirishpa Diosman cutiringuichij. Chai punllapica ima ruranata ama ruranguichij.

8Mandaj Diospaj mishquijlla ashnacuj cachun cunataca shuj bizita, shuj carnerota, shuj huatayuj canchis c'ari ovejacunata cunguichij. Chai animalcunaca ima mana tucushca cachun.

9Chaicunahuan cuna cutataca cashna cunguichij: Bizihuanca shuj efata chungapi chaupishca quimsa parte ashtahuan alli cutata aceitehuan chapushcahuan cunguichij. Carnerohuanca shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

10Shuj huatayuj c'ari ovejacunahuanca cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cunguichij.

11Juchamanta cunataca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

Ramadacunallapi fiestata ruranami(Lv 23.33-44)

12Chai canchis quillallapitaj chunga pichca punllapica, tucuicunata cayashpa Diospajlla tandanacuita ruranguichij. Chai punllapica sinchi trabajocunataca imata ama ruranguichij. Mandaj Diospaj jatun fiestataca canchis punllacunata ruranguichij.

13Fiesta callari punllapica, Mandaj Diospaj mishquijlla ashnacuj cachun cushpa rupachinataca chunga quimsa bizita, ishqui carnerota, shuj huatayuj chunga chuscu c'ari ovejata cushpa tucui rupachinguichij. Chai animalcunaca ima mana tucushca cachun.

14Chaicunahuan cuna cutataca bizicunahuanca cada bizihuan shuj efata chungapi chaupishca quimsa parte ashtahuan alli cutata aceitehuan chapushcahuan cunguichij. Carnerocunahuanca cada carnerohuan shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

15Shuj huatayuj c'ari ovejacunahuanca cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cunguichij.

16Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

17Cati punllapica chunga ishqui bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

18Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

19Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

20Quimsa punllapica, chunga shuj bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

21Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

22Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

23Chuscu punllapica chunga bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

24Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

25Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

26Pichca punllapica, iscun bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

27Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

28Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

29Sujta punllapica, pusaj bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

30Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

31Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

32Canchis punllapica canchis bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

33Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

34Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

35Pusaj punllapica Mandaj Diospajlla jatun tandanacuita ruranguichij. Chai punllapica sinchi trabajocunataca imata ama ruranguichij.

36Mandaj Diospaj mishquijlla ashnacuj cachun cunataca shuj bizita, shuj carnerota, shuj huatayuj canchis c'ari ovejata cunguichij. Chai animalcunaca ima mana tucushca cachun.

37Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

38Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

39“Jatun fiesta punllacunapica, Mandaj Diosmanca tucui chaicunatami cuna canguichij. Cuna tucushcacunatapish, cuna munaimanta cuna tucushcacunatapish, cushpa tucui rupachinacunatapish, cuna cutatapish, tallina vinotapish, Dioshuan alli tucungapaj cuna cashcacunatapish punllanta cuna cashcacunataca chai punllacunapipish ama saquinguichijchu” nircami.

40Mandaj Dios tucui imallata nishcacunatami Moisesca israelcunaman huillarca.