1Ashtahuanca huauquicuna, Mandaj Jesuspaj shutipimi cancunataca yuyachishpa animachishun ninchij. Ima shina causashpa Taita Diosta cushichinatami yachachircanchij. Chai shinami causacunguichij. Chashna causashpami ashtahuan ashtahuan yallitaj alli catinguichij.
2Mandaj Jesús ñucanchijta imallata yachachichun nishcacunataca, yachachijpi ñami cancunaca yachanguichij.
3Taita Diosca cancunataca jucha illajlla causachunmi munan: Huainayanamanta anchurichij.
4Tucuicuna, quiquin huarmillata jucha illajta, alli nishpa charinata yachaichij.
5Taita Diosta mana rijsijcuna shina, millai munaicunahuan maipish cachun ama causaichijchu.
6Maijanpish paipaj huauquita umashpa imapipish ama llaquichichun. Ña cancunaman nishca, huillashca shinallataj chashna rurajcunataca Mandaj Jesusmi paicunatapish llaquichinga.
7Taita Diosca ñucanchijtaca, mapallapitaj causachunca mana cayarcachu, ashtahuanpish jucha illaj causachunmi cayarca.
8Maijanpish cai yachachishcata mana uyasha nijca, mana runallatachu mana uyasha nin. Ashtahuanpish jucha illaj Espirituta cuj Taita Diostamari mana uyasha nin.
9Taita Dios yachachijpimi cancunallataj caishuj chaishuj c'uyanacunataca yacharcanguichij. Chaimi cancunamanca, huauquicunapura c'uyanacunami canguichij nishpaca mana quillcani.
10Macedoniapi caj tucui huauquicunahuanmi, chai shinallataj c'uyanacucunguichij. Shina cajpipish huauquicuna, cancunataca ashtahuan ashtahuan yallijta c'uyanacuichij nipanchijmi.
11Ñucanchij cancunata mandashca shinallataj shujtajcunapaj rurashcapi ama satirishpa, imatapish quiquin maquihuan trabajashpa tucuicunahuan sumajta causaichij.
12Mana crijcunapish alli nishca cangapaj, imapish mana illaj cangapajmi chashna cana canguichij.
Mandaj Jesús ima shina shamunami13Huauquicuna, huañushcacuna ima tucuna cashcata mana yachaj caishujcuna shina llaquilla cachunca mana munanchijchu. Ashtahuanpish yachajcuna cachunmi munanchij.
14Jesús huañushpa causarishcatami ñucanchijca crinchij. Chai shinallatajmi Jesusta crij huañushcacunatapish Taita Diosca causachinga.
15Chaimantami Mandaj Jesús shamungacama ñucanchij causacujcunaca huañushcacunataca mana ñaupashpa rishunchu nishpaca, Mandaj Jesús nishca shinallataj ninchij.
16Mandaj Jesusllatajmi cazuchij caparishcahuan, angelcunata mandaj caparishcahuan, Taita Diospaj trompeta uyarishcahuanpish jahua pachamanta uriyamunga. Chaipica, Cristota crij huañushcacunarajmi causaringa.
17Chai q'uipami ñucanchij caipiraj saquirishca causacujcunaca, Mandaj Jesusta huairapi tupangapaj paicunahuan tandalla p'uyupi apashca cashun. Chaipimi Mandaj Jesushuan huiñaita cashun.
18Chaimanta chai shimicunahuan caishuj chaishuj cushichinacuichij.
Who We AreWhat We EelieveWhat We Do
2025 by iamachristian.org,Inc All rights reserved.
