1Mandaj Jatun Diosca cashnatami muscuipi shina ñucamanca ricuchirca: Jatun mandaj tucui cuzichashca q'uipami, q'uipa tarpushca granocuna ña huiñai callaricujpi, achca langosta c'urucunata Mandaj Diosca huiñachirca.
2Chai langostacuna ñalla tucuita micucujta ricushpami ñucaca:
–¡Mandaj Jatun Dioslla, perdonahuailla! Yaya Jacobopaj huahua huahuacunaca ashallamari ¿pitaj ayudai tucungari?– nishpami mañarcani.
3Chashna mañajpica, Mandaj Diosca achcata llaquirishpami:
–Shinashpaca mana llaquichigrinichu– nirca.
Ninahuan llaquichinata ricuchishcamanta4Mandaj Jatun Diosca cashnatapishmi ñucamanca ricuchirca: Mandaj Jatun Diosca jatunta llaquichingapajmi ninata cacharca. Chai ninami achca yacucunatapish rupachishpa chaquichirca. Shinallataj chagracunatapish rupachicujtami ricurcani.
5Chashna llaquichicujta ricushpami ñucaca:
–¡Mandaj Jatun Dioslla, cai ninataca huañuchipailla! Yaya Jacobopaj huahua huahuacunaca ashallamari, ¿pitaj ayudai tucungari?– nishpa mañarcani.
6Chashna mañajpica, Mandaj Jatun Diosca achcata llaquirishpami:
–Shinashpaca mana llaquichigrinichu– nirca.
Plomadacujta ricushcamanta7Mandaj Jatun Diosca cashnatapishmi ñucamanca ricuchirca: Mandaj Jatun Diosca plomadahuan pircashca pata jahuapimi shayarirca. Paica pircaj runapaj plomadata maquipi aisashcami shayacurca.
8Chaimantaca Mandaj Diosca ñucataca cashnami nirca:
–Amós, caipica ¿imatataj ricungui?– nijpi ñucaca:
–Pircaj runapaj plomadatami ricuni– nircani.
Chashna nijpimi Mandaj Diosca:
–Pircaj runapaj cai plomadahuanmi ñuca agllashca israelcunata ricugrini. Paicunataca ña mana ashtahuan ricucuilla tucunichu.
9Isaacpaj huahua huahua israelcunapaj, lomacunapi tiyaj altarcunatapish tucuitami urmachisha. Paicunapaj dioscunata yuyarina huasicunatapish tucuitami chingachisha. Shinallataj israelcunata jatun mandaj Jeroboamtaca, paipaj huahuacunandijmi espadahuan huañuchishpa chingachisha– nircami.
Amasías curata Dios llaquichinata Amós huillashcamanta10Bet-el pueblopi causaj Amasías curaca, israelcunata jatun mandaj Jeroboammanca, cashna nishpami huillanaman cacharca: “Jatun mandajlla, Amosca cai llajtapi causajcunamanca canta p'iñashpami huillashpa puricun. Pai huillashcataca cai llajtapi causajcunaca, ña mana uyai tucuncunachu.
11Chai Amós runaca cashnami huillacun: Jeroboamca espadapimi huañunga. Israelcunaca, huatashca shina causanapajmi quiquin llajtamantaca prezu apashca canga nishpami puricun” nichunmi cacharca.
12Chashna huillachun cachashca q'uipami, Amasías curaca, Amostaca cashna nirca:
–¡Dios ricuchishcata huillaj runa, ri caimanta! Huillashpalla micushpa causasha nishpaca, cambaj Judá llajtallamantaj tigrashpa chaipi huillagrilla.
13Bet-el pueblopica ama ashtahuan huillaichu. Cai pueblopica jatun mandaj causanami. Bet-elpimi jatun mandajpish Diosta adoran– nircami.
14Amasías cura chashna rimajpimi, Amosca cashna nirca:
–Ñucaca mana Dios ima nishcata huillajchu cani, Dios ima nishcata huillajpaj churillapish mana canichu. Ashtahuanpish huagracunata michijllami cani. Sacha higocunata pallashpa purijmi cani.
15Shina cajpipish Mandaj Diosmari ñucataca huagrata michicujta japishpaca: Ñuca imalla nishcata ñuca agllashca israelcunaman ri huillagri nirca.
16Cunanca Mandaj Dios imalla nishcata alli uyai. Canca ñucataca: Isaacpaj huahua huahua israelcunata llaquichina cashcataca ama huillaichu nishpami jarcangui.
17Shina cajpipish, Mandaj Diosca cashnami nin: Cambaj huarmica cai pueblo chaupipimi huainayanga. Cambaj churicunatapish, ushushicunatapish espadahuanmi huañuchingacuna. Cambaj allpacunatapish suerteta rurashpami chaupinacungacuna. Canca mapa llajtapimi huañungui. Israelcunapish paicunapaj llajtamantaca carumanmi prezu ringacuna ninmi– nircami.
Who We AreWhat We EelieveWhat We Do
2025 by iamachristian.org,Inc All rights reserved.