1Chaimanta jucha illaj huauquicuna, paipajlla cachun Dios cayashcacunami canguichij. Cristo Jesustaca apóstol, curacunata jatun pushaj, ñucanchij crishpa catina cashcata yuyaichij.
2Diospaj huasiucupurapi Moisés tucuita pajtachij cashca shinallatajmi, Jesuspish Dios imallata rurachun nishcataca tucuita pajtachirca.
3Huasichij runataca, pai rurashca huasitapish yallimi alli nin. Chai shinallatajmi Jesuspish, Moisesta yalli ashtahuan alli nishca canata charin.
4Tucui huasicunaca gentecuna rurashcallami. Ashtahuanpish tucui imalla tiyajcunata rurajca Diosmi.
5Moisesca Diospajta ruraj cashpami, Diospaj huasi ucupi imalla rurana cashcataca tucuita alli pajtachijtaj carca. Paica q'uipata Dios imallata rimana cashcata ricuchingapajmi chashna rurarca.
6Ashtahuanpish Cristoca, Diospaj Churi cashpami, Diospaj huasi ucupurataca tucuita mandacun. Chaimanta tucuringacama sinchi, chai yuyailla cushicuihuan catishpaca, chai huasica ñucanchijmi canchij.
Diospaj huahuacuna samarinami7Chaimanta, jucha illaj Espíritu nishca shinaca:
“Dios rimashcata cunan uyashpaca,
8shitashca pambapi ahuantaj mana ahuantajta ricuna llaqui shamujpi, Diosta paicuna p'iñachishca shina cancunapaj shungucunataca ama sinchiyachichijchu.
9Shitashca pambapica cancunapaj ñaupa yayacunaca, chuscu chunga huatacunata ñuca ima shina rurashcacunata ricushpapish, ñucataca caita chaita rurai nishpami p'iñachircacuna.
10Chaimantami, chai punllapi causajcunahuanca p'iñarircani.
Paicunaca: “Yuyaita chingachishca shina tucushpami, ñuca ricuchishca ñanpica mana catishun nircacuna” nircami.
11Chaimanta jatunta p'iñarishpami:
“Ñucahuan samarinamanca manataj yaicunguichijchu” nircani” ninmi.
12Riquichij huauquicuna, cancunapurapica millai shungu tucushpa, mana crishpa, causaj Diosmanta anchurijcunaca amataj tiyachun.
13Chaipaj randica ima millaita rurana yuyaicuna cancunata umashpa, mana uyasha nijta ama rurachun cunan causacushparaj punllanta caishuj chaishuj yuyachinacuichij.
14Cristohuan japijcunata rurashcacunami canchij. Chaimanta callaripi shunguta churashpa sinchi, caticushcataca tucuringacama caticunallami canchij.
15Quillcachishcapica:
“Dios rimashcata cunan uyashpaca, paita p'iñachijcuna shina cancunapaj shungucunataca ama sinchiyachichijchu” ninmi.
16¿Picunataj Dios rimashcata uyashca jahua, paita p'iñachijcunaca carca? ¿Manachu Moisés Egiptomanta tucui llujshichimushcacuna carca?
17Diosca ¿picunahuantaj chuscu chunga huatacunata p'iñarishca carca? ¿Manachu juchallishcamanta, shitashca pambapi huañujcunahuan p'iñarishca carca?
18¿Picunatataj ñucahuan samarinamanca manataj yaicungacunachu nirca? Paita mana cazujcunatami chashna nishca carca.
19Paicunaca, mana crijcuna cashcamanta mana yaicui tucushcatami ricunchij.
Who We AreWhat We EelieveWhat We Do
2025 by iamachristian.org,Inc All rights reserved.
