2 CRÓNICAS 29 - Quichua Chimborazo Bible

Judá llajtata Ezequías mandashcami(2 R 18.1-3)

1Ezequiasca, mandai callarinapajca ishqui chunga pichca huatayujmi carca. Paica ishqui chunga iscun huatatami Jerusalenpi mandarca. Paipaj mamaca, Zacariaspaj ushushi Abiasmi carca.

2Ezequiasca, paipaj ñaupa yaya David tucui imatapish rurashca shinallatajmi, Mandaj Diospaj ñaupajpica ima pandata mana rurarca.

3Paica mandai callarishca huata punta quillapimi, Mandaj Diospaj huasi pungucunata pascashpa tucuita allichirca.

4Chai q'uipaca curacunata, levitacunata cayashpami, inti llujshin ladoman caj tandanacuna pambapi tandachirca.

5Chaipimi cashna nirca: “Jalachij levitacuna, cancunapaj ñaupa yayacunata Mandaj Diospajta rurangapaj allichirichij, paipaj huasitapish tucui mapata llujshichishpa Diospajllata ruraichij. Diospaj ucumantaca, juchahuan mapa cajtaca tucui llujshichishpa shitaichij.

6Ñucanchij yayacunaca paita mana cazushpa c'ariyarcacunami. Paicunaca ñucanchijta Mandaj Diosmanta anchurishpami, paipaj ñaupajpica millaita rurarcacuna. Mandaj Diospaj cai huasimantaca ñahuita shujman churashpami, paimanpish huashata ricuchircacuna.

7Shinallataj Diospaj huasi ñaupaj ucu pungutapish huichcarcacunami. Lamparacunatapish huañuchircacunami. Inciensota Diosman cushpa rupachinatapish saquircacunami. Ñucanchij israelcunapaj Diosman sacrificiocunata cushpa paipaj huasipi tucui rupachinatapish saquircacunami.

8Chaimantami Mandaj Dios p'iñarishpaca, Judapi Jerusalenpi causajcunataca, mancharina jatun llaquipi churashca. Cunanca shujtajcunaca chaita ricushpa asicujtaca, cancunallataj quiquin ñahuihuan allimi ricucunguichij.

9Ñucanchij yayacunaca paicunallataj mana cazushcamantami, jatun macanacuipi huañurcacuna. Chaillamantatajmi ñucanchij churicunatapish, ushushicunatapish, ñucanchij huarmicunatapish chai mishajcunaca prezu aparcacuna.

10Chaimantami cunanca ñucanchij israelcunata Mandaj Dios ñucanchijhuan ama ashtahuan p'iña cachun, paita cazunata ari ninatami yuyarircani.

11Chashna cashcamantaca, Mandaj Diospajta ruranataca ama q'uillacuichijchu, huahuacuna. Paica cancunataca paipajta chai yuyai rurachunpish, inciensota paiman cushpa rupachichunpishmi agllarca” nircami.

12Chashna nishcata uyashcahuanmi, levitacunaca pai nishcata rurai callarircacuna. Chaicunaca caicunami: Coatpaj huahua huahuacunapuramantaca, Amasaipaj churi Mahathuan, Azariaspaj churi Joelhuanmi carca. Meraripaj huahua huahuacunamantaca, Abdipaj churi Cishuan, Jehalelelpaj churi Azariashuanmi carca. Gersonpaj huahua huahuacunamantaca, Zimapaj churi Joapish, Joapaj churi Edenpishmi carca.

13Elizafanpaj huahuacunamantaca Simrihuan, Jeielhuanmi carca. Asafpaj huahua huahuacunamantaca Zacariashuan, Mataniashuanmi carca.

14Hemanpaj huahua huahuacunamantaca Jehielhuan, Simeihuanmi carca. Jedutunpaj huahua huahuacunamantaca Semaiashuan, Uzielhuanmi carca.

15Tucui paicunaca paicunapaj familiapura levitacunataraj tandachishpami, Diospajta rurangapaj allichirircacuna. Chai q'uipaca, Mandaj Diospaj huasiman yaicushpami, jatun mandaj nishca shinapish, Mandaj Dios nishca shinapish chai ucumantaca mana Diospaj cashcataca tucuita llujshichircacuna.

16Chai q'uipaca curacunaca, Diospaj huasimantaca mana Diospaj cashcata llujshichishpa, Diospajllata rurangapajmi chai ucuman yaicurcacuna. Chaimantaca mana Diospaj cashcataca tucuitami canllaman llujshichircacuna. Chaimantaca levitacunami Cedrón huaicuman aparcacuna.

17Huata callari quillapaj punta punllapimi Diospajlla tucungapaj allichiri callarircacuna. Ña allichirishca cashpami, chai quillapaj pusaj punllapica Mandaj Diospaj huasi muyundij ucucunaman yaicurcacuna. Chaimantaca pusaj punllacunapimi Diospaj huasitaca tucui mapata anchuchishpa Diospajllata rurarcacuna. Tucuitaca chai quillapajllataj chunga sujta punllapimi tucuchircacuna.

18Chai q'uipaca, jatun mandaj Ezequiaspajman yaicushpami cashna nircacuna: “Diospaj huasitaca ñami tucuita Diospajllata ruranchij. Animalcunata Diosman cushpa tucui rupachina altartapish, Diospajta rurana tucui charinacunandij, Diospajlla tandata churana mezatapish, chaipi tiyaj tucui charinacunandijtami Diospajlla cachun allichircanchij.

19Shinallataj jatun mandaj Acaz, mandacushpa chai ucumanta llujshichishpa shitashca charinacunatapishmi Diospajllata rurashpa allichishpa churanchij. Chai charinacunataca jatun mandaj Acazca, Mandaj Diosmanta anchurishpami, tucui llujshichishpa shitarca. Cunanca ñami Mandaj Diospaj altar ñaupajllapitaj churanchij” nircacunami.

20Chaita huillajpica, jatun mandaj Ezequiasca utca jatarishpami, pueblopi causajcunata mandachun churashca mandajcunata tandachishpaca, Mandaj Diospaj huasiman huichiyarca.

21Chaiman rishpaca jatun mandajpaj juchacunatapish, paipaj tucui familiapaj juchacunatapish anchuchichun, shinallataj Diospaj huasimanta juchata anchuchichunpish, tucui Judá llajtapi causajcunapaj juchata anchuchichunpishmi canchis huagracunata, canchis carnerocunata, canchis malta ovejacunata, canchis c'ari chivocunata Diosman cungapaj aparcacuna. Jatun mandajca Aaronpaj huahua huahua curacunatami: “Mandaj Diosman cai animalcunata, cushpa paipaj altarpi rupachichij” nirca.

22Chashna mandajpica, curacunaca c'ari huagracunata huañuchishpami, yahuarta tandarcacuna. Chai yahuartaca altar huashapimi tsiraparcacuna. Chai q'uipaca, carnerocunata huañuchishpapish, yahuartaca altar jahuapimi tsiraparcacuna. Malta ovejacunata huañuchishpapish, chashnallatajmi rurarcacuna.

23Chai q'uipaca, juchacunata anchuchichun Diosman cungapaj apashca chivocunatami, jatun mandajpaj ñaupajman tucui chaipi cajcunapaj ñaupajman c'uchuyachircacuna. Chashna c'uchuyachijpica, paicunaca chai chivocunapaj uma jahuapimi maquita churarcacuna.

24Chai q'uipaca, curacunaca chai chivocunata huañuchishpami, juchacunata Dios anchuchichunca yahuarta altar jahuapi tsiraparcacuna. Tucui israelcunapaj juchacunata Dios anchuchichunmi chashna rurarcacuna. Jatun mandajllatajmi, tucui israelcunapaj juchacunata anchuchichun, chai animalcunata Diosman cushpa tucui rupachichun mandashca carca.

25Ezequiasca, Mandaj Diospaj huasipica maijan levitacunataca cimbalocunapi, salteriocunapi, arpacunapi tocachunmi churarca. Diospaj huasipi cajcunata imalla ruranacunapi churanataca jatun mandaj Davidpish, Dios ricuchishca huillaj Gadpish, profeta Natanpishmi mandashcacuna carca. Ezequiasca paicuna mandashcata ricushpa, chashnatajmi levitacunata churarca. Mandaj Diosllataj, pai ima nishcata huillajcunata huillachishpa mandashca cashcamantami, Ezequiasca chashna rurarca.

26Levitacunaca, David rurachishpa saquishca tocanacunahuanmi shayacurcacuna. Curacunapish trompetacunahuanmi carca.

27Chashna churashpami Ezequiasca, animalcunata Diosman cushpa altar jahuapi tucui rupachichun mandarca. Animalcunata rupachi callarijpica, cantajcunapishmi Mandaj Diosta jatunyachishpa cantai callarircacuna. Shinallataj ñaupa jatun mandaj David rurachishpa saquishca tocanacunapipishmi tocarcacuna.

28Cantaj levitacunaca cantacurcacunami. Curacunaca trompetacunapimi tocacurcacuna. Paicuna chashna ruracujpica, chaipi caj tucui israelcunaca Diosman animalcunata cushpa tucui rupachingacamami Diosta adoracurcacuna.

29Chai aichacuna ña tucui rupajpica jatun mandajpish, tucui paihuan cajcunapishmi Diosta adorarcacuna.

30Chai q'uipaca, jatun mandaj Ezequiaspish, caishuj mandajcunapishmi levitacunataca: “Mandaj Diostaca, David quillcashca shimicunahuanpish, Dios ricuchishcata huillaj Asaf quillcashca shimicunahuanpish alabaichij” nishpa mandarcacuna. Chashna mandajpica, paicunaca jatunta cushicushpami, chai shimicunahuan cantashpa cungurishpa Diosta alabarcacuna.

31Chai q'uipaca Ezequiasca, tucuicunatami cashna nirca: “Ñami Mandaj Diospajlla cangapaj allichirishca canguichij. Cunanca paita alabangapaj paipaj huasipi paiman cushpa huañuchingapaj animalcunata apashpa paiman c'uchuyamuichij” nircami. Chashna nijpica, tucuicunami Diosta pagui nishpa, paiman cushpa huañuchingapaj animalcunata curcacuna. Maijancunacarin quiquin munaillahuantajmi, Diosman cushpa tucui rupachichun animalcunata curcacuna.

32Diosman cushpa tucui rupachingapajca, paicuna apamushca huagracunaca canchis chungami carca. Patsaj carnerocuna, 200 malta c'ari ovejacunami carca. Chai tucui animalcunatami Mandaj Diosman cushpa tucui rupachircacuna.

33Ashtahuanmi animalcunata Diosman cushpa huañuchircacuna. Chaicunaca, 600 huagracuna, 3.000 ovejacunami carca.

34Ashacunalla cashpami curacunaca, chai tucui animalcunata huañuchishpa lluchunataca mana pajtarcacuna. Chaimantami chai animalcunata lluchushpa tucui rupachinataca tucuringacama, paicunapaj huauqui levitacuna ayudarca. Shinallataj caishuj curacuna Diospajta rurangapaj allichiringacamapishmi ayudajcuna carca. Levitacunarajmi Diospajta rurangapaj shunguhuantaj utca allichirircacuna. Ashtahuanpish curacunaca mana chashna carcachu.

35Chashnami Mandaj Diosmanca achca animalcunata cushpa tucui rupachircacuna. Shinallataj Dioshuan alli cangapaj cushca animalcunapaj huiratapishmi rupachircacuna. Chai animalcunapaj aichataca, ima shina rurana cashca shinallatajmi, Diosman cushpa rupachircacuna. Tallina vinotapish, cada ovejahuanmi curcacuna.

Chashnami Mandaj Diospaj huasipica, cutintaj Diospajta rurai callarircacuna.

36Chashna rurashpami Ezequiaspish, tucui chaipi cajcunapish jatunta cushicurcacuna. Diosllataj tucui paicunata ayudajpimi, tucui imapish utca jahualla rurarishcamanta chashna cushicurcacuna.