PROVERBIOS 12 - Quichua Chimborazo Bible

1Alli yachaita munajca, yachachichun

munanmi.

Alli yuyaita mana charijcunaca jarcashpa

yachachijpipish, p'iñarishpa mana

uyancunachu.

2Alli shungu runamanca, Mandaj

Diosllataj allicunata cunmi.

Ashtahuanpish millai yuyaihuan causajtaca,

jatun llaquiman cachangami.

3Pipish millaita rurashcahuanca

mana sinchita shayangachu.

Ashtahuanpish cashcata rurajcunaca, alli

sapiyashca yura shina pi mana cuyuchipajmi.

4Yuyaisapa c'uyaj huarmica cusapajca,

coronata churashca shinami.

Ashtahuanpish mana alli huarmica,

tulluta ismuchij ungüi shinami.

5Cashcata rurajcunaca, alli

yuyaitami cuncuna.

Ashtahuanpish mana manchajcuna

cunashcaca umajllami.

6Diosta mana manchajcunaca, huañuchinatami

yuyarinacushpa parlanacuncuna.

Ashtahuanpish allita rurajcunapaj shimica,

huañuimanta quishpichinmi.

7Mana manchajcunaca Taita Dios chingachijpica, ña mana jataringachu.

Ashtahuanpish cashcata rurajcunapaj huasipica,

ima llaqui mana tiyangachu.

8Alli yachajcunataca pipish alli ninmari.

Ashtahuanpish millai shungucunataca

tucuicunami p'iñancuna.

9Micunallapish illaj, jatun tucushca

runapaj randica, yangalla cashpapish

servijcunata charij runarajmi alli.

10Cashcata ruraj runaca animalcunatapish,

mana yaricaihuan charinchu.

Ashtahuanpish mana manchajcunaca rumi

shungu cashpami, mana llaquincuna.

11Chagrata ruraj runaca sajsajta

micungapajllapish charinmi.

Ashtahuanpish yuyaita mana japijllami,

puricujllacunataca catincuna.

12Diosta mana manchaj runaca, millaicuna

urmashca linchillapitaj urmanatami munan.

Ashtahuanpish cashcata rurajcunaca

sapiyashca, alli p'ucuj yura shinami.

13Diosta mana manchaj runaca,

cacharishca shimi cashcamantami

llaqui tucun.

Ashtahuanpish cashcata ruraj runaca,

llaquimantaca llujshingallami.

14Maijanpish allita rimashpaca

allillatatajmi japin, imata rurashpapish,

rurashca shinallatajmi tandanga.

15Rumi shungu runaca paipaj yuyaipica,

alli ñantami puricuni yuyanmi.

Ashtahuanpish cunashcata cazujca yachajtajmi.

16Rumi shungu runaca p'iñarijlla cashcataca,

jahuallami ricuchin.

Ashtahuanpish alli yuyaiyujcunallami

p'iñachijpipish, shungupi chingachincuna.

17Mana llullaj runaca imata ricushpapish,

cashcallatami huillan.

Ashtahuanpish llullaj runaca,

llullashpallami huillan.

18Maijancunaca imata rimashpapish,

espadahuan chugrichishca shinami saquincuna.

Ashtahuanpish yachaisapacunaca sumaj

shimicunahuan jambincunami.

19Imatapish cashcata rimaj runaca

causacungallami.

Ashtahuanpish llulla runaca asha

punllacunapajllami.

20Allita yuyajcunapaj shungupica

cushicuimi tiyan.

Ashtahuanpish millaita yuyajcunapaj

shungupica, umana yuyaillami tiyan.

21Mana manchaj runapajca, llaquicunallami

jahuanpi jahuanpi shamunga.

Ashtahuanpish cashcata rurajcunataca,

ima llaqui mana japingachu.

22Mandaj Diosca cashcata

rurajcunamantami cushicun.

Ashtahuanpish llullajcunataca,

manataj ricunachinchu.

23Alli yuyaiyuj runaca allita

yachashcatapish shungupimi huaquichin.

Ashtahuanpish rumi shungu cajcunaca,

rumi shungu cashcallatami ricuchincuna.

24Alli trabajaj runaca, mandashpami causanga.

Ashtahuanpish q'uilla runaca,

mandashcallami causanga.

25Ima llaquimanta shungu p'aquirijpica,

ima yuyaipish chingarinmi.

Shina cajpipish c'uyaihuan rimashca

shimicunaca cushichinmari.

26Cashcata rurajca shujtajcunapish

catichun alli ñantami ricuchin.

Ashtahuanpish Diosta mana

manchajcunaca pandachincunami.

27Q'uilla runaca ima animalta urcupi,

japishcatapish mana cusashpa micunchu.

Ashtahuanpish mana q'uilla runaca,

sumaj charinayuj shinamari.

28Cashcata ruranaca, causaiman

pushaj ñanmi.

Chai ñanca huañuipica mana churanchu.