ROMANOS 11 - Quichua Chimborazo Bible

Israeltaj cajcunallami quishpiringa

1Caitapish tapusha: ¿Diosca paipaj cajcunataca shitashcatajchu canga? ¡Manataj chashnachu! Ñucapish israelmi cani, Abrahampaj huahua huahua, Benjaminpaj aillumantami cani.

2Diosca, ñaupaman agllashca paipaj cajcunataca mana shitashcatajchu. Quillcachishcapi Eliasmanta parlashcataca ¿manachu yachanguichij? Paica israelcuna mana alli cashcata Diospaj ñaupajpi huillacushpaca cashnami nirca:

3“Jatun Dios, cambaj profetacunataca huañuchishcacunami, cambaj altarcunatapish urmachishcacunami. Ñucallami saquirishcani, ñucatapish huañuchishun nincunami” nircami.

4Chashna nijpica Diosca “Baalpaj ñaupajpi mana cungurijcunataca, canchis huaranga gentecunatami ch'icanchishpa charicuni” nishpami cutichirca.

5Chashnallatajmi cunan punllacunapish tucun. Dios paipaj mana c'uyaipajta c'uyashpa agllashcataj caj saquirishca israelcunallatami quishpichirca.

6Imata mana rurajpipish, mana c'uyaipajta c'uyashpami agllan. Rurashcacunamanta agllashca cajpica, mana c'uyaipajta c'uyashpa agllashca mana canmanchu. Rurashcacunamanta agllashca cajpica, mana c'uyaipaj cajpipish c'uyashcaca mana canmanchu. Chashna cajpica rurashcacunahuan mana c'uyaipajta c'uyaihuanca mana chai shinallatajchu.

7Shina cajpica ¿ima nishuntaj? Israelcuna cashpapish mashcacushcataca mana japircacunachu, Dios agllashcataj cajcunallami japircacuna. Ashtahuanpish caishujcunataca, sinchi shungutami rurarca.

8Cashnami quillcashca tiyacun: “Dios, paicunaman ch'ahuanyachij espirituta cushcamantami, cunan punllacama mana ricuj ñahui, mana uyaj rinrin tucuncuna” ninmi.

9Davidpish cashnami nin:

“Paicunapaj jatun micuicunaca tsagnarishpa urmana shina, linchi shina tucuchun.

Chaicunaca ñitcachij, llaquichij cachun.

10Ñahuipish imata ama ricuchun amsayachishca, paicunapaj huashapish huiñaipaj curcuyachishca cachun” ninmi.

Mana judiocunami quishpirishca

11Ashtahuanpish caita tapusha: Israelcunaca ñitcashpa urmashcamantaca ¿manatajchu jataringacuna? ¡Manataj chashnachu! Ashtahuanpish paicuna mana cazushcamantami, quishpirinaca mana judiocunapajman shamurca. Ñucanchijpish paicuna shina tucushun nichunmi chashna tucurca.

12Israelcuna mana cazushpa urmashcaca, cai pachapi causaj mana judiocunata charijyachinapaj alli cajpica, tucui israelcunata Dios cutin allichijpicarin ¿manachu chaita yalli ashtahuan alli canga?

13Mana judiocuna cancunamanmi rimagrini. Ñucaca, mana judiocunapaj apostolmi cani. Diospajta ñuca ruracushcataca allimi ninimi.

14Ñuca yahuarpuramanta cajcunapish cancuna shina cashun nishpallapish maijancuna quishpirichunmi chai yuyailla cani.

15Israelcunata Dios anchuchishcaca mana israelcunata chasquingapajmi cashca. Shina cajpica israelcunata Dios cutin chasquijpica ¿manachu huañushcacunapuramanta causarishca shina canga?

16Masamanta punta tandata Diospajraj ch'icanchijpica, tucui masami Diospajlla. Shinallataj sapi Diospajlla cajpica, ramacunapish Diospajllami.

17Alli olivos yuramanta maijan ramacunata p'itishcapimi, cantaca sacha olivos rama cajpipish, chai alli olivos ramacunapaj randi churashcalla cangui. Chashna rurashca cashpami, canca alli olivos yura sapipaj sumaj yacullamanta causangui.

18Alli olivos ramacunata p'iñashpa ama jatun tucungui. Jatun tucucushpaca yuyaringui. Mana canchu sapitaca charicungui, ashtahuanpish sapimi cantaca charicun.

19“Chai ramacunataca, ñucata chaipi churangapajmi p'itishca” nicunguichari.

20Ari, chashnatajmari. Israelcunaca mana crishcamantami, p'itishca carcacuna. Ashtahuanpish canca, crishcallamantami chai yurapi shayacungui. Chaimanta ama jatun tucunguichu, ashtahuanpish manchangui.

21Yurapitaj caj ramacunatapish mana saquishpa p'itij Diosca, cantapish p'itingallatajmari.

22Diosca alli cashcatapish, sinchita llaquichij cashcatapish yuyaringui. Paipi mana catirajpica, sinchita llaquichijtajmi, ashtahuanpish canhuan alli cashcata mana cungarijpica canhuanmi. Mana chashna cashpaca canpish anchuchishcami cangui.

23Israelcunapish mana crij canata saquishpa crijpica, Diosca poderyuj cashcamanta, chai yurallapitaj cutin churangallami.

24Canca sacha olivos yuramantataj p'itishcami carcangui. Chashna p'itishpami, manapish churana alli olivos yurapi churashca cangui. Olivos yurapajtaj ramacunatacarin, paicuna maipi cashcallapitaj ¿manachu cutin churangalla?

Tucui israelcunatami quishpichinga

25Huauquicuna, pacalla cashcata yachachunmi munani. Cancunallataj ama yalli jatun tucuchunmi cashna nini: Crij tucuna caj mana israelcuna tucuicuna crij tucungacamami, maijan israelcunaca mana crishpa sinchi shungu cangacuna.

26Chai q'uipaca, tucui israelcunatami quishpichishca canga. Cashnami quillcashca tiyacun:

“Quishpichijca Sionmantami shamunga.

Paica, Jacobpaj huahua huahuacunamantami, millaita ruraj canata anchuchinga.

27Paicunapaj juchacunata ñuca anchuchijpimi, paicunahuan ñuca ari ninacushcaca pajtanga” ninmi.

28Cancunapaj allipajmi israelcunaca alli huillaita mana crishpa, Dios p'iñashcacuna tucushca. Ashtahuanpish paicunapaj yayacunata agllashcamantaca, Dios c'uyashcacunallatajmi.

29Diosca pai cushcacunataca manataj quichunchu, pai cayashcatapish manataj anchuchinchu.

30Cancunapish ñaupaca, Diosta mana cazujcunami carcanguichij. Ashtahuanpish cunanca israelcuna mana cazushcamantami, Dios llaquishca canaman chayashcanguichij.

31Cancuna mana cazuj cashca shinallatajmi, cunanca israelcunapish mana cazujcuna. Diospaj llaquina cancunapaj cachunmi chashna tucushca. Paicunapish cutinllataj Dios llaquishca canaman chayangacunami.

32Diosca tucuicunallatataj llaquingapajmi, tucuicunallatataj mana cazuj canapi churashca.

Diospaj jatun yachaitami alli nishca

33¡Diosca tucuita yalli yachaj canata, yuyaiyuj canata yallitaj charijmari!

¡Pai imata yuyacushcatapish, pi mana yachai tucunchu!

¡Pai imata ruracushcatapish,

pi mana entendi tucunchu!

34Chaimanta ¿pitaj Jatun Diospaj yuyaitaca entendirca?

Mana cashpaca ¿pitaj paipaj cunajca cashca canga?

35Q'uipata paiman cuchunca ¿pitaj ñaupaman Diosmanca curcari?

36Tucuimi paipaj, pai rurashcamantami tiyan, paipajmi rurarca, chaimanta tucui imapish paipajmi.

Paitaca, huiñai huiñaita jatunyachishca cachun. Chashnataj cachun.