COLOSENSES 3 - Quichua Chimborazo Bible

1Cancuna Cristohuan causarishca cashpaca, jahua pachapi tiyajcunallata mashcaichij. Chaipica Cristomi Diospaj alli ladopi tiyacun.

2Jahua pachapi tiyajcunallata yuyaichij. Cai pachapi tiyajcunataca ama yuyaichijchu.

3Cristohuan huañushcami carcanguichij. Cancunapaj causaica, Cristohuanmi Diospi pacashca tiyacun.

4Cancunaman causaita cuj Cristo ricurijpica, cancunapish pai sumaj cashca shinallatajmi ricuringuichij.

Ñaupa causaipish mushuj causaipish

5Chaimanta cancunapi tiyaj cai pachapaj yuyaicunataca: Apanacushpa causanata, mapa causaita, mana alli ruraicunata, millai munaicunata, quiquinpajlla ashtahuan charij canatapish huañuchichij. Chaicunaca rurashcalla Diosta adorashca shinallatajmi.

6Chaicunamantami mana cazujcunata Dios p'iñarishpa jatunta llaquichinaca shamunga.

7Ñaupaca, cancunapish chashnallataj rurashpa causajcunami carcanguichij.

8Ashtahuanpish cunanca, cancunaca: P'iñarinata, p'iña canata, millai yuyailla canata, p'iñashpa c'aminata, mapa shimita rimanata, tucui chaicunata saquichij.

9Caishuj, chaishuj ama llullanacuichijchu. Cancunapaj mauca causaitaca, rurashcacunandij anchuchishpa,

10mushuj runata rurashcami canguichij. Dios shina cachun mushujyachishcami canguichij. Paica paita alli rijsichun mushujyachicunllami.

11Chaimanta griegopish, judiopish, circunsicionta rurachishcapish, mana rurachishcapish, urcu runapish, shujtaj llajtamanta cajpish, amopajta rurajpish, amopajta mana rurajpish mana tiyanchu. Ashtahuanpish Cristoca tucuicunapajmi, tucui paipi crijcunapimi.

12Dios agllashca jucha illajcuna, pai c'uyashcacuna cashcamanta shungumanta llaquij canata, cuj canata, mana jatun tucushca canata, manso shungu canata, mana p'iñarij canata churarichij.

13Maijan caishujta p'iñashpa juchachijpica, caishuj chaishuj ahuantanacushpa, ima shinami cancunata Cristo perdonarca, chai shinallataj caishuj chaishuj perdonanacuichij.

14Tucuimanta yallica c'uyaj canata churarichij. C'uyaimi tucuicunata shujllata rurajtajca.

15Cristomanta Dioshuan sumaj causaica cancunapaj shungucunapi mandachun. Chashna cachun cayashpa shujlla cuerpota rurashcacunami carcanguichij. Chaimanta pagui nijcuna caichij.

16Cancunapaj shungupica, Cristo rimashca shimicuna junda tiyachun. Tucui yachashcahuan, caishuj chaishuj yachachinacuichij animachinacuichij. Cancunaca shungumanta salmocunata, himnocunata, Diospaj cantocunata Mandaj Jesusta pagui nishpa cantaichij.

17Tucui imata rimashpapish, rurashpapish Mandaj Jesuspaj shutipi tucuita ruraichij. Paillamantataj Dios Yayataca pagui nichij.

Mushuj causaiyujcuna shujtajcunapaj imata ruranami

18Cazadacuna Mandaj Jesús munashca shina, cancunapaj cusacunata cazuichij.

19Cusacuna, cancunapaj huarmicunata c'uyaichij. Paicunahuanca ama millaicuna caichijchu.

20Huahuacuna, cancunapaj yaya mamacunata tucuipi cazuichij. Mandaj Jesusca chaitami munan.

21Yaya mamacuna, cancunapaj huahuacuna ama mana uyasha nichunca, ama p'iñachichijchu.

22Amopajta rurajcuna cai pacha cancunapaj amocunata tucuipi cazuichij. Ama paicuna ricucujllapi, alli ricuringaraiculla alli ruraj tucuichijchu. Ashtahuanpish Diosta manchashpa, tucui shunguhuan alli ruraichij.

23Tucui imata rurashpapish, runacunapajta shinallaca ama ruraichijchu. Ashtahuanpish Mandaj Jesuspajta shina shungumanta ruraichij.

24Chashna rurashcamantaca Mandaj Jesús cushca herenciata chasquina cashcataca yachanguichijmi. Cancunapaj Mandaj Jesusca Cristomi paipajtami ruracunguichij.

25Ashtahuanpish mana cashcata rurajca, pai rurashca shinallatajmi chasquinga. Diosca mana ñahuita ricushpalla alli ninchu.