1Caitapishmi yachana cangui, cai punllacuna tucurinapajca llaqui punllacunami shamunga.
2Chai punllacunapica quiquinlla alli canata munajcuna, quiquinpajlla charinata munajcuna, jatun tucushcacuna, valishca tucujcuna, Taita Diosta c'amijcuna, yaya mamata mana cazujcuna, mana pagui nijcuna, Taita Diosta mana rijsijcuna,
3rumi shungucuna, p'iñarishpapish manataj cungarijcuna, yangamanta juchachijcuna, mana jarcari tucujcuna, p'iña millaicuna, allita p'iñajcuna,
4quiquinpurallatataj llaquipi churajcuna, jahualla p'iñarijcuna, imapish mana caipajta yuyajcuna, Taita Diosta mashcanapaj randica aicha munaipi cushicunallatami c'uyangacuna.
5Ricuipica Dios yuyailla caj shinami cangacuna. Ashtahuanpish paicuna rurashcahuanca Diosca mana tiyashca cashcatami ricuchingacuna. Chaicunamantaca anchuringui.
6Chaicunaca huasicunaman yaicushpa, ima millaitapish ruraj, juchasapa, umarijlla huarmicunatami umancuna.
7Chai huarmicunaca yachanataca mana saquishpa yachacunllacunami. Ashtahuanpish mana llulla ima shina cashcatatajca manataj entendingacunachu.
8Janes, Jambres yumbucunapish Moisestaca mana cazurcacunachu. Chai shinallatajmi paicunapish mana llulla shimitaca mana cazuncuna. Paicunaca yuyai ismushca, mana crij cashcatami ricuchincuna.
9Ashtahuanpish chaicunaca mana unitachu umashpa causangacuna. Moisesta mana cazuj ch'ahuancunata shinallatajmi, paicuna umacushcataca tucuicuna yachaj chayangacuna.
10Ashtahuanpish canca ñuca yachachishcata catij, ñuca causashca shina causaj, ñuca yuyashca shinallataj yuyaj, ñuca shinallataj crij, ñuca shinallataj chaipitaj catiraj, ñuca shinallataj c'uyaj, ñuca shinallataj mana p'iñarij,
11ñucata shinallataj catirashpa llaquichishca, ñuca shinallataj llaquita apajmi cangui. Antioquiapi, Iconiopi, Listrapi llaquicunata ñuca apashca shinallatajmi apaj cangui. Tucui chaicunamantaca ñucataca Mandaj Jesusmi quishpichirca.
12Cristo Jesushuan shujlla tucushpa pai yuyailla causasha nijcunaca tucuicunallatajmi catirashpa llaquichishca canga.
13Ashtahuanpish millaicuna, umajcunaca, ashtahuan ashtahuan millai tucushpami, umajcuna umashcacunapish tucushpa catingacuna.
14Chashna cajpipish, canca imata yachashcataca chashnataj cashca yuyailla cangui. Maijanlla yachachishca cashcataca yachanguimi.
15Canca huahuamanta pachami, Diospaj Quillcacunataca yachangui. Chaicunami Cristo Jesusta crishpa quishpirichun, cantaca yachajta rurai tucun.
16Diospaj shimica, paillataj Quillcachishca cashcamantami yachachingapaj, ima shina cashcatataj rimangapaj, cunangapaj, cashcata ruraj cachun yachachingapajpish alli.
17Diospajta ruraj runaca tucuita allita ruranapajca alli allichishca allitaj yachajtaj cachunmi cashna yachachinga.
Who We AreWhat We EelieveWhat We Do
2025 by iamachristian.org,Inc All rights reserved.
