1Mama cucha c'uchupi causajcuna, caru llajtacunapi causajcuna ñucata uyaichij:
Mamapaj huijsapi cajpirajmi, Mandaj Diosca ñucata cayarca.
Mamapaj huijsamanta pachami ñuca shutitaca paipaj yuyaipi charirca.
2Ñuca shimitaca filosapa espadata shinami rurarca.
Paipaj maqui llanduhuanmi ñucataca taparca.
Ñucataca puntasapa caspita rurashpamari, paipaj huaquichina carapi huaquichirca.
3Ñucataca: “Israel, ñucapajta rurajmi cangui.
Canpimi ñuca jatun cashcataca ricuchisha” nircami.
4Ashtahuanpish ñucaca:
“Yallitajmi trabajashcani.
Ashtahuanpish yangalla imata mana japingapajmi trabajashcani.
Ñuca fuerzapish tucurishcami” yuyarcanimi.
Shina cajpipish ñuca trabajashcaca Mandaj Diospimi.
Ñuca japina cashcaca ñuca Taita Dioshuanmi.
5Ñucataca mamapaj huijsamanta pachami Mandaj Diosca paipajta ruraj cachun rurarca.
Jacobta paipajman tigrachingapajmi ñucataca agllarca.
Israelcunata tandachichunmi chashna rurarca.
Mandaj Diospajca c'uyashcami casha.
Taita Diosmi ñuca fuerzaca.
6Paimi cashna nin: “Jacobpaj huahua huahuacunata jatarichij, mana huañushca israelcunata tigrachimuj, ñucapajta ruraj cachunllaca mana churanichu.
Ashtahuanpish tucui mama llajtacunapaj luz cachun, tucui cai pachapi causajcunata quishpichij cachunmi churani” ninmi.
7Gentecuna yanganchishca, llajtacuna millashca millai mandajcunapajta rurajtaca, Mandaj Dios Israelta quishpichij cambaj jucha illaj Diosca:
“Jatun mandajcuna ricushpa, q'uipa mandajcuna jatarishpaca cantaca cambaj ñaupajpimi cungurishpa adorangacuna” ninmi.
Paica canta agllaj, israelcunapaj jucha illaj tucuita pajtachij Diosmi.
Jerusalén pueblotaca cutin allichishami nishcami8Mandaj Diosca cashnami nin: Uyana punllapica uyarcanimi.
Quishpichina punllapica ayudarcanimi.
Cantaca ñucami huaquichisha.
Israelcunahuan ari ninacushcata pajtachingapajmi cantaca cachasha.
Llajtata cutin shayachichun, shitashca allpacunata japishpa allichichun,
9prezupi cajcunatapish llujshichij nichun, amsapi cajcunatapish achijman llujshichij nichunmi cantaca cachasha.
Paicunaca tucui ñancunapimi michinacunata charingacuna.
Mai urcucunapi cashpapish, paicunapaj animalcunapajca alli micunatami charingacuna.
10Chaipica yaricaipish, yacunaipish mana japingachu.
Intipish mana t'itashpa llaquichingachu.
Paicunata llaquij Diosmari tucuimanta huaquichinga.
Pajchacuj yacucunamanmi pushanga.
11Ñuca urcucunataca ñantami rurasha.
Rumi rumi ñancunapish llambujllata rurashcami canga.
12Riqui, caicunaca carumantami shamungacuna.
Shujcunaca janaj ladomanta, chaishujcunaca inti huashicuna ladomantami shamungacuna.
Shujtajcunaca Sinim llajtamantami shamungacuna.
13Mandaj Dios pai agllashcacunata cushichishcamanta, Diospaj huajchacunaca llaquishca cana cashcamanta jahua pacha alabashpa cantanacunata cantaichij.
Cai pacha cushicui.
Urcucuna caparirishpa alabaichigari.
14Ashtahuanpish Sionca: Mandaj Diosca ñucataca saquinmi.
Jatun Diosca ñucataca cungarinmi nishcami.
15Shuj huarmica pai huachashca huahuataca ¿cungaringachu?
Paipaj huijsamanta llujshishca huahuataca ¿manataj llaquingapaj p'iñangachari?
Huahuata chai huarmi cungarijpipish ñucaca cantaca manataj cungarishachu.
16Riqui can ima shina cashcataca ñuca maqui shungupimi quillcashcata charicuni.
Cambaj muyundij pircacunataca ñuca ñaupajpimi charicuni.
17Canta cutin shayachijcunaca callpashpami shamungacuna.
Canta urmachijcunapish, chingachijcunapish huashan huashanmi ringacuna.
18Cambaj umata alzashpa muyundijta ricuyari.
Tucui caicunamari tandanacushpa cambajman shamushcacuna.
Mandaj Diosca ñucaca causacunimi ninmi.
Paicunahuanca alli nishca canapaj churanata churarishca shinami cangui.
Paicunahuanca novia allichirishca shina allichirishcami cangui.
19Cambaj llajtaca llaquichishca, urmachishca shitashcami.
Chashna cashpapish cunanca tucui chaicuna causanaman shamujpica quichqui maipi mana causaipajmi canga.
Cancunata chingachijcunaca caruta cachashcami canga.
20Cai llajtamantaca ña chingarishcami nishcacuna tigramushpaca:
“Cai llajtaca maipi mana causaipaj quichquimari ñuca causangapaj caimanta anchui” nijtami uyangui.
21Chaipica cambaj shungupica:
Cai huahuacunataca ¿pitaj ñucapaj huacharcari?
Ñucaca mana huachajmari carcani.
Huahuacuna illajllamari carcani.
Shujtaj llajtaman cachashca puricujllami carcani.
Cai huahuacunataca ¿pitaj huiñachircari?
Riqui ñucaca ñucallamari saquirishcani.
Caicunaca ¿maipitaj carcacunari?
22Mandaj Jatun Diosca cashnapishmi nin: “Riqui, llajtacunapica ñuca maquitami chutasha.
Pueblocunapica ñuca banderahuanmi mandagrini.
Chaipica cambaj churicunataca marcashpami apamungacuna.
Cambaj ushushicunataca rigra jahuapimi pushamungacuna.
23Jatun mandajcunami cancunataca huahuata cuidaj shina cuidanga.
Jatun mandaj huarmicunami cancunapajca huiñachij mama shina canga.
Cambaj ñaupajpi cungurishpami pambaman tupajta cumuringacuna.
Cambaj chaquipi caj ñutu allpatami lambingacuna.
Chaipimi ñucataca Mandaj Diostaj cashcata yachangui.
Ñucapi shunguta churashpa shuyajcunaca, manataj pingai tucungacunachu” ninmi.
24¿C'ari c'ari runataca macanacuipi pai imalla japishcataca, quichui tucungachu?
¿Millai mandaj macanacuipi mishashpa prezu apashca runataca jahualla cacharichi tucunchu?
25Ashtahuanpish Mandaj Diosca cashnami nin:
“Macanacuita mishashpa prezu apashca runataca c'ari c'ari runapaj maquimanta cacharichishcami canga.
Macanacuipi mishashpa imalla japishcataca millai runapaj maquimanta quichushcami canga.
Canta llaquichicujcunahuanca ñucami ch'imbapura shayarisha.
Cambaj huahuacunataca ñucami quishpichisha.
26Can imalla charishcacunata quichujcunataca, paicunapaj quiquin aichallatatajmi micuchisha.
Paicunapaj yahuarhuanca vinohuan shinami machangacuna.
Chaipimi tucuicuna Mandaj Dios ñucataca canta Quishpichij cashcata, canta cacharichij cashcata, Jacobpaj Tucuita Rurai tucuj Dios cashcata yachangacuna” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
