NÚMEROS 35 - Quichua Chimborazo Bible

Levitacunaman cushca pueblocunami

1Mandaj Diosca Jericó ch'imbapurapi caj Jordán yacu c'uchupi caj Moab pambapi Moisesta mandashpaca cashnami nirca:

2“Israelcunataca cashna mandai: Cancuna japina cashca allpata japishpaca, levitacunamanca paicuna causachunca pueblocunallata, chai pueblo muyundij michina allpacunallata cunguichij.

3Paicunaca causana pueblocunallata, paicunapaj animalcunata, paicunapaj huagracunata, tucui animalcunata michinapaj muyundij allpacunallata charichun.

4Michina allpacunataca, paicuna causacun pueblo muyundijta pircashca pata c'uchumanta canllamanca, 450 metro anchota muyundijta cunguichij.

5Chai q'uipaca pueblo canlla ladoman caj allpa uritaca inti llujshin ladomanpish 900 metrota, ura ladomanpish 900 metrota, inti huashicun ladomanpish 900 metrota, janaj ladomanpish 900 metrota medinguichij. Chashna rurajpimi puebloca chaupipi saquiringa, muyundijta michina allpacunayuj canga.

6Levitacunaman cushca sujta pueblocunaca mana huañuchina yuyaihuan cashpapish, huañuchishpa miticunapajmi canga. Chai jahuapish paicunamanca chuscu chunga ishqui pueblocunata cunguichij.

7Levitacunamanca tucuimantaca chuscu chunga pusaj pueblocunata michina allpacunandij cunguichij.

8Israelcuna japishca pueblocunata levitacunaman cungapajca achca allpata japijcunapajtaca achca pueblocunata japinguichij. Ashalla allpata japijcunapajtaca ashalla pueblocunata japinguichij. Cada quiquin allpata ima shina japishca shinallataj pueblocunatapish levitacunamanca cunguichij” nircami.

Miticuna pueblocuna maillapi cashcami(Dt 19.1-13; Jos 20.1-9)

9Mandaj Dios Moisesta mandashpaca cashnami nirca:

10“Israelcunata mandashpa cashna ni: Jordán yacuta ch'imbashpa Canaanman ña yaicushpaca,

11mana huañuchina yuyaihuan cashpapish, huañuchijcuna miticuchun pueblocunata agllanguichij.

12Chai pueblocunaca, manapish huañuchina yuyaihuan cashpa huañuchishcamanta paitapish huañuchisha nijpi miticunapajmi canga. Huañuchij runaca chashna miticushpami ima shina chai runata huañuchishcata tandanacushca israelcunapaj ñaupajpi huillangacama mana huañunga.

13Levitacunaman cushca pueblocunamanta sujta pueblocunataca miticunapajmi charina canguichij.

14Miticunapaj caj pueblocunataca, Jordán yacumanta inti llujshin ladoman quimsa pueblocunata cunguichij. Quimsa pueblocunataca Canaán llajtapi cunguichij.

15Chai sujta pueblocunaca israelcuna cashpa, mana israelcuna cashpa, pasacujllacuna cashpapish israelcunapurapi cajcuna manapish huañuchina yuyaihuan cashpa huañuchishcamanta chaicunaman rishpa miticunapajmi canga.

16Fierromanta rurashca imacunahuan huañuchijca, huañuchina yuyaihuantaj huañuchijmi canga. Paipish huañunatajmi can.

17Rumihuan huañuchijpish, huañuchina yuyaihuantaj huañuchijmi canga. Paipish huañunatajmi can.

18Jatun caspihuan huañuchijpish, huañuchina yuyaihuan huañuchijmi canga. Paipish huañunatajmi can.

19Huañuchijtaca, huañujpaj familia maipi tupashpapish huañuchichunlla.

20Maijancunaca llaquichina yuyaihuan p'iñashcamanta t'angashpa shitangachari, mana cashpaca imahuan shitajpi huañungachari.

21Mana cashpaca p'iñanacushca cashcamanta macanacucushpa huañuchingachari. Chai runaca huañuchijmi canga. Paipish huañunatajmi can. Huañuchijtaca huañujpaj familia maipi tupashpapish huañuchichunlla.

22Ashtahuanpish manapish p'iñanacushca cashpa t'angarijpi urmashpa huañungachari. Mana cashpaca manapish paita shitacujpi imata shitajpi paipi urmajpi huañungachari.

23Mana cashpaca jatun rumita shitacushpa mana ricushcamanta paipaj jahuapi shitajpi huañungachari. Paica paihuan mana p'iñanacushca cashca cashpa, ima mana alli yuyaihuan mana cashca cajpica,

24chai huañuchijtaca paitapish huañuchisha nicuj ama huañuchichunca tandanacushca israelcunaca cai mandashcapi nishca shinallataj tapushpa allichichun.

25Tandanacushca israelcunaca chashna rurashpa huañuchijtaca huañuchishcamanta paitapish huañuchisha nicujpaj maquimanta quishpichichun. Chai huañuchijtaca tandanacushca israelcunaca pai miticushpa tiyacushca llajtaman tigrachichun. Chai huañuchijca, Diospajlla aceitehuan churashpa curacunata mandaj cachun churashca cura huañungacama chai pueblollapitaj causachun.

26Ashtahuanpish huañuchij runaca, miticushpa causacun pueblomanta llujshishpa maicamalla purichun nishcata pasangachari.

27Miticushpa causacushca pueblomanta llujshishpa maicamalla purina cashcata pasashpa puricujpi, paitapish huañuchisha nicuj huañuchishpaca chai huañuchijca mana juchachishca cangachu.

28Huañuchij runaca miticushpa tiyacun pueblopica, curacunata mandaj cura huañungacama causachun. Curacunata mandaj cura huañushca q'uipaca, chai runaca paipaj llajtallamantaj tigrachunlla.

29Caicunaca cancunapajpish, cancunapaj huahua huahuacunapajpish cancuna causacun llajtapica, maipi cashpapish chaitataj pajtachichun mandashcami.

Ricushpa huillajcunapish, huañuchijcunata imata ruranapish

30Maijanta huañuchishca cajpica, ima shinalla huañuchishcata huillajcuna tiyajllapi huañuchijtapish huañuchichun. Shujlla huillaj tiyajpica ama huañuchichun.

31Maijanta huañuchijca paitapish huañuchishun nijpi, cullquita pagasha nijpica ama japinguichij. Huañuchina yuyaihuantaj huañuchishcamanta paitaca huañuchinguichijtaj.

32Miticushpa causana pueblopi miticushpa causacujca, curacunata mandaj cura manaraj huañujpi paipaj llajtaman tigrasha nishpa cullquita pagasha nijpipish ama japinguichij.

33Cancuna causacun llajtataca ama mapayachinguichijchu. Yahuarta jichachishpa chai llajtata mapayachijpica, llajtaca yahuarta jichashpa mapayachishcamantaca mapa illajca mana cai tucunchu. Huañuchijtapish huañuchijllapimi mapa illajlla tucunga.

34Cancuna causacun llajtataca ama mapayachinguichijchu. Chai llajta chaupipimi, ñucaca causani. Mandaj Dios ñucaca israelcunapaj chaupipimi causani” nircami.