1 REYES 11 - Quichua Chimborazo Bible

Salomonca rurashcalla dioscunata adorashcami

1Jatun mandaj Salomonca, faraonpaj ushushihuan cazarashca jahuami Moabmanta, Amonmanta, Edommanta, Sidonmanta, heteo mana Israel caj huarmicunatapish c'uyarca.

2Mandaj Diosca israelcunataca: “Chai mana Israel huarmicunahuanca ama shujlla tucunguichij. Paicunapish cancunahuanca ama shujlla tucuchun, paicunaca paicunapaj dioscunapajman rishpa chai dioscunata adorana yuyaita cushpatajmi alli cangacuna” nishpami mandashca carca. Chashna nishca cajpipish Salomonca chai huarmicunata c'uyashpami paicunahuan tandanacurca.

3Salomonpaj quiquin huarmicunaca 700mi carca. Caishuj huarmicunaca, 300mi carca. Chai huarmicunami Salomonpaj shungutaca, Diosmanta caruyachircacuna.

4Salomón ña yuyaj cajpimi paipaj huarmicunaca shujtaj dioscunata catij tucushpa chai dioscunata adorachun yuyaita curca. Paica paipaj yaya David shina tucui shunguhuan Mandaj Diosman mana curishca cashcamantami chashna tucurca.

5Chaimi Salomonca, Sidón llajtapi causajcunapaj Astoret dios nishca huarmi diosta, amonitacunapaj Milcom shuti millanana manapish diosta catirca.

6Chashnami Salomonca, Mandaj Diospaj ñaupajpi millaita rurashpa, paipaj yaya David pajtachishca shinaca Mandaj Dios nishca shinatajca mana pajtachirca.

7Chashna cashpami Salomonca Jerusalén ch'imbapurapi caj urcupi millanana manapish dios caj Moabitacunapaj Quemos nishca diospaj shuj altarta rurarca. Millanana manapish dios caj amonitacunapaj Moloc nishca diospajpish shuj altartami rurarca.

8Mana Israel caj paipaj huarmicunapajpish tucuicunapajmi altarcunata rurarca. Chai huarmicunaca chai altarcunapimi, paicunapaj dioscunaman cushpa inciensota rupachishpa, sacrificiocunata cujcuna carca.

9Israelcunata Mandaj Diosmanta Salomonpaj shungu anchurishcamantami Mandaj Diosca paihuan p'iñarirca. Salomonmanca ñaupaman ishqui cutin ricurishpami,

10shujtajcunapaj dioscunataca ama catinguichu nishpa mandashca carca. Ashtahuanpish Salomonca, Mandaj Dios mandashcataca mana cazurcachu.

11Chaimi Mandaj Diosca Salomontaca: “Canpi chashna mana alli yuyai tiyashcamantami ñucahuan ari ninacushcatapish p'aquishcangui. Chaitataj pajtachichun nishpa ñuca mandashcacunatapish mana cazushcangui. Chaimanta cunanca can mandanata quichushpami cambajta rurajman cusha.

12Shina cajpipish cambaj yaya Davidta c'uyashcamantami can mandacujpirajca mana quichusha. Cambaj churi mandacujpimi mandanata quichushpa shujtajman cusha.

13Mana tucui mandanatachu quichusha. Ñucapajta ruraj Davidta c'uyashcamanta ñuca agllashca Jerusalén pueblota c'uyashcamantaca shuj ailluta cambaj churi mandachun cushami” nircami.

14Mandaj Diosca, Edom llajtata jatun mandajpaj churi Hadad, Salomonta p'iñaj cachunmi saquirca.

15Edompi causajcunahuan David macanacucujpimi soldadocunata mandaj Joabca, chai macanacuipi huañushca israelcunata pambangapaj huichiyashpaca, edomitacunataca tucui c'aricunata huañuchishca carca.

16Chaipica Joabca tucui edomita c'aricunata huañuchingacamami sujta quillata tucui israelcunandij chai llajtapi causashca.

17Chaipimi Hadadca paipaj yayapajta ruraj edomita maijan c'aricunandij Egiptoman miticushpa rirca. Hadadca chai punllacunapica huambrarajmi carca.

18Paicunaca Madianmanta jatarishpa rishpaca, Paranman shamushpami, chaipi causaj runacunata pushashpa Egiptoman chayarcacuna. Egiptota jatun mandaj faraonpajman chayajpimi, jatun mandajca paicunamanca huasitapish, micushpa causachun micunatapish, allpacunatapish curca.

19Hadadca jatun mandaj Faraonpi alli ricurijpimi, paipaj huarmi Tahpenespaj ñañata Hadadpaj huarmi cachun curca.

20Tahpenespaj ñañaca Genubat shuti churitami huacharca. Chai huahuataca Tahpenesca faraonpaj huasipimi chuchucunmanta raquirca. Genubatca faraonpaj huahuacunahuanmi faraonpaj huasipi causarca.

21Hadadca Egiptopi cashpami, David paipaj ñaupa yayacunahuan ña dormishcata, soldadocunata mandaj Joabpish huañushcata yachaj chayarca. Chaimi faraontaca Hadadca:

–Ñuca llajtamanmi tigrasha nini– nirca.

22Shina nijpi faraonca:

–¿Ima nishpari? Ñucahuan caipi cajpica imataj illan. ¿Ima nishpataj cambaj llajtaman rina tucurcangui?– nijpi Hadadca:

–Ima mana illanchu. Shina cajpipish ñuca llajtamanca rishataj ninimi– nircami.

23Taita Diosca, Eliadapaj churi Rezonmanpish Salomonta p'iñaj cana yuyaitami curca. Rezonca Soba llajtata jatun mandaj paipaj amo Hadad-ezerta miticushpami rishca carca.

24Paica Hadad-ezerta c'ariyangapajmi gentecunata tandachirca. Shuhuacunata mandajpishmi tucushca carca. Chaicunata David huañuchijpimi, Rezonca Damascopi causagrirca. Chaipimi paitaca jatun mandaj cachun churarcacuna.

25Siria llajtata mandaj Hadad llaquichishca jahuami, Rezonca Salomonpaj tucui causaipi israelcunataca p'iñarca. Siria llajtata mandajpish tucurcami.

26Efraín llajtapi caj Sereda pueblomanta caj Nabatpaj churi Jeroboampish, Salomonta llaquichingapajmi jatarirca. Jeroboamca Salomonpajta rurajmi carca. Paipaj mamaca Zerúa shuti viuda huarmimi carca.

27Salomón paipaj yaya Davidpaj pueblopi pugru pugrupi allpata jundachishpa, chai pueblo muyundijta pircachishcamantami Jeroboamca jatun mandaj Salomonhuanca p'iñarirca.

28Jeroboamca c'ari c'ari imatapish rurashpataj alli caj runami carca. Salomonca Jeroboamtaca ima ruranapipish chai yuyailla tucuchingacamataj ruraj cajta ricushpami Josepaj huahua huahuacunapaj mandaj cachun mingarca.

29Chai punllacunallatajmi Jeroboamca, Jerusalenmanta llujshicushpaca, Silo pueblomanta caj profeta Ahiashuan ñanpi tuparca. Ahiasca jahuata churarina mushuj churanahuan taparishcami carca. Paicuna ishquillami ñanpi carcacuna.

30Chaipimi Ahiasca, pai taparishca mushuj churanata llujshichishcahuan chunga ishqui mirgata rurashpa,

31Jeroboamtaca: “Cai chunga mirgaca cambajmi japi” nirca. Israelcunata Mandaj Taita Diosca: Salomón mandacunmanta chunga aillucunata quichushpami canman cushca.

32Paica ñucapajta ruraj Davidta c'uyashcamanta, tucui Israel aillucunamanta ñuca agllashca Jerusalenta c'uyashcamantapish pai mandachunca shuj aillullatami saquini ninmi.

33Salomonca sidoniocunapaj Astoret huarmi diosta, moabitacunapaj Quemos diosta, amonitacunapaj Moloc diosta adorashpami ñuca chaitataj pajtachichun nishcata mana pajtachishpa, pajtachinguitaj nishcatapish mana pajtachirca. Paipaj yaya David maiman mana anchurishpa, purishca shinaca mana ñuca ñanpi purishpami ñucamanta anchurirca.

34Ñuca agllashca ñucapajta ruraj David ñuca mandashcacunata huaquichishcamanta, chaitataj pajtachichun nishcata huaquichishcamanta, paita c'uyashcamantami, Salomonpaj tucui causaipi pai mandachun saquisha.

35Ashtahuanpish pai huañujpica paipaj churi mandacujpimi, chunga aillucunata quichushpa can mandachun cusha.

36Ñuca shuti chaipi cachun, ñuca agllashca Jerusalenpi ñucapajta ruraj Davidpaj lámpara ñuca ñaupajmanta ama chingarichunmi, Salomonpaj churimanca shuj aillullata mandachun cugrini.

37Cantaca ñucami mandaj cachun churasha. Canca israelcunata jatun mandajmi tucungui. Canca cambaj shungupi yuyashca shinami mandangui.

38Canca ñuca imallata mandashcacunata uyashpa, ñuca ñanpi purijpi, ñucapajta ruraj David rurashca shina chaitataj pajtachichun nishcata, ñuca mandashcacunata huaquichishpa, mana maiman ch'icanyashpa chaitataj rurajpica, ñucaca canhuanmi casha. Davidpaj huahua huahuacunapaj mandanata pi mana cuyuchipajta churashca shinallatajmi, cambaj huahua huahuacunapaj mandanatapish pi mana cuyuchipajta churashpa israelcunataca cambaj maquipi churasha.

39Salomón millaita rurashcamantami, Davidpaj huahua huahuacunataca llaquichigrini. Shina cashpapish, mana huiñaita llaquichicushallachu ninmi nircami.

40Chaita yachashpami Salomonca Jeroboamta huañuchinata yuyaricujpi, Jeroboamca Egipto llajtata mandacun Sisacpajpi miticugrirca. Paica Salomón huañungacamami chaipi causarca.

Salomón huañushcami(2 Cr 9.29-31)

41Salomón ashtahuan imallata rurashcata, tucui imallata rurashcata, pai yachaj cashcata ashtahuan yachasha nishpaca Salomón imallata rurashcata quillcashca libropimi ricuna.

42Salomonca Jerusalenpica tucui israelcunataca chuscu chunga huatacunatami mandarca.

43Salomón ña paipaj ñaupa yayacunahuan dormijpica, paipaj yaya Davidpaj pueblollapitajmi pambarcacuna. Paipaj randica, paipaj churi Roboammi mandarca.