JUECES 13 - Quichua Chimborazo Bible

Sansón huacharishcami

1Israelcunaca Mandaj Diospaj ñaupajpica cuntinllatajmi millaita rurarcacuna. Paicunataca Mandaj Diosca chuscu chunga huatacama llaquichichunmi filisteocunapaj maquipi churarca.

2Dan aillupuramanta caj Manoa runami Zora pueblopi, causarca. Paipaj huarmica mana huachaj cashcamantami, shuj huahuallatapish mana charirca.

3Mandaj Diospaj ángel chai huarmiman ricurishpami: “Canca mana huachajmi cangui. Chaimantami shuj huahuallatapish mana charingui. Cunanca chichushpa shuj c'ari huahuatami huachangui.

4Cunanmantaca vinotapish, sidratapish ama ubyangui. Imapish mapami nishcatapish ama micungui.

5Chichushpa shuj c'ari huahuatami huachangui. Paica huachari pachamanta Diospaj nazareomi canga. Chaimanta paipaj uma ajchataca mana p'itichishcami canga. Paimi israelcunataca filisteocunapaj maquimanta quishpichinga” nirca.

6Chaimi chai huarmica, paipaj cusapajman shamushpaca: “Diospaj shuj runami ñucapajman shamurca. Paica Diospaj angelman rijchaj, jatun mancharinami carca. Pai pi cashcatapish, maimanta cashcatapish mana tapurcanichu. Paipish paipaj shutitaca mana huillarcachu.

7Paica ñucataca: Riqui, canca chichushpa shuj c'ari huahuatami huachangui. Cunanmantapacha vinotapish, sidratapish ama ubyangui. Imapish mapami nishcataca ama micungui, paica huacharipachamanta huañungacama Diospaj nazareomi canga nircami” nishpami huillarca.

8Chaimi Manoa runaca: “Aij, ñuca Jatun Dioslla, can cachashca runata ñucanchijpajman cutin cachahuai nishpami rogani. Pai shamushpa chai huahua huacharijpica ima shina huiñachinata ñucanchijman yachachichun” nishpami Mandaj Diosta mañarca.

9Jatun Diosca Manoa mañashcata uyashpami, Manoapaj huarmi chagrapi cajpi, Diospaj angelca cutin paipajman shamurca. Ashtahuanpish paipaj cusa Manoaca mana chaipichu carca.

10Chaimi chai huarmica, paipaj cusa Manoapajman callpashpaca:

–Riqui, sarun ñucapajman shamuj runamari cutin ricurin– nishpa huillarca.

11Chaimi Manoaca, paipaj huarmindij chai runa maipi canman rishpaca:

–¿Canchu ñuca huarmihuan parlaj runa cangui?– nijpi, chai runaca:

–Ñucallatajmi cani– nirca.

12Manoaca:

–Can nishca shina pajtajpica, chai huahuaca ¿ima shinataj causana can? Ñucanchijpish paihuanca ¿ima shinataj cana canchij?– nishpami tapurca.

13Chaimi Diospaj angelca Manoataca:

–Cambaj huarmimi ñuca tucui imalla nishca caicunata mana rurana can:

14Uvamanta imata rurashcatapish, vinotapish, sidratapish mana ubyanachu. Imapish mapami nishcatapish mana micunachu. Tucui ñuca mandashcacunataca pajtachichun– nircami.

15Chaimi Manoaca, Mandaj Diospaj angeltaca:

–Ñucanchij shuj malta chivota huañuchishpa micunata allichingacama shuyapai– nirca.

16Mandaj Diospaj angelca Manoataca:

–Ñucaca micunata allichingacama shuyashpapish mana micushachu. Ashtahuanpish can cusha nishpaca chai aichataca Mandaj Diosman cushpa tucui rupachi– nircami.

Chai runataca Mandaj Diospaj ángel cashcataca Manoaca mana yacharcachu.

17Chaimi Manoaca Mandaj Diospaj angeltaca:

–Can nishca shina pajtajpi, canta alli ningapajca ¿ima shutitaj cangui?– nirca.

18Mandaj Diospaj angelca:

–Ñuca shutitaca ¿imapajtaj tapungui? Ñuca shutica mancharinamari– nircami.

19Chaimi Manoaca, malta chivotapish asha granotapish japishpa, shuj rumi jahuapi Mandaj Diosman cushpa rupachirca. Chaipimi Manoapish paipaj huarmipish ricucujpi angelca shuj milagrota rurarca.

20Chai altarpi rupacuj ninaca jahua pachamanmi huichiyarca. Manoapish, paipaj huarmipish altarpi rupacuj ninapi Mandaj Diospaj ángel huichiyajta ricushpami, pambaman tupajta cumurircacuna.

21Chaipimi Manoaca, chai runataca Mandaj Diospaj ángel cashcata yacharca. Chai angelca Manoamanpish, paipaj huarmimanpish ña mana ashtahuan ricurircachu.

22Manoaca paipaj huarmitaca:

–Diostamari ricushcanchij cunantajca huañushunmari– nircami.

23Chaimi paipaj huarmica:

–Mandaj Diosca ñucanchijta huañuchisha nishca cashpaca, chivota cushpa tucui rupachishcatapish, granota cushcatapish manamari chasquinmanchu carca. Cai tucui sumajtapish mana ricuchinmanchu carca. Ñucanchij imallata tapushcatapish mana huillanmanchu carca– nirca.

24Manoapaj huarmica shuj c'ari huahuatami huacharca. Chai huahuataca Sansontami shutichirca. Chai huahuaca huiñarcami. Mandaj Diosca alli cashca cachun nircami.

25Zora, Estaol shuti pueblocuna chaupipimi, Danpaj ailluca carpa huasicunapi causarca. Chaipimi Mandaj Diospaj Espirituca Sansonpi cashca ricurirca.