JEREMÍAS 38 - Quichua Chimborazo Bible

Jeremiasta jatun jutcupi churashcamanta

1Jerusalenpi cajcunapaj ñaupajpi Jeremías huillajtaca, Matanpaj churi Sefatiaspish, Pasurpaj churi Gedaliaspish, Selemiaspaj churi Jucalpish, Malquiaspaj churi Pasurpishmi uyarcacuna. Jeremiasca cashnami huillarca:

2“Mandaj Diosca cashnami nin: Cai pueblomanta mana llujshijcunaca jatun macanacuipipish, yaricaihuanpish, ungüihuanpish huañungatajmi. Ashtahuanpish caimanta llujshishpa, quiquin chaquihuan caldeocunapaj maquipi yaicugrijcunaca, huañunallamantapish quishpiringacunami.

3Cai puebloca Babilonia llajtata jatun mandajpaj soldadocunapaj maquipi churashca cangatajmi. Paicunami macanacushpa mishanga ninmi Mandaj Diosca” nircami.

4Chashna huillajta uyashpami, mandajcunaca jatun mandajtaca cashna nircacuna:

–Cai runaca cai pueblopi causajcunapaj alli causai tiyachunca mana munanchu, ashtahuanpish llaqui tucushca cachun yuyashpami, cai shimicunata huillan. Chashna huillajpimari saquirishca soldadocunapish, tucui cai pueblopi causajcunapish mana macanacushpa saquina yuyaita japincuna. Chaimanta cai runaca huañunami can– nircacunami.

5Shina nijpica jatun mandaj Sedequiasca:

–Jeremiasca cancunapaj maquipimi, imatapish ruraichijlla. Ñucaca jatun mandaj cashpapish, cancunataca imata mana jarcai tucunichu– nircami.

6Chashna nijpica paicunaca Jeremiasta japishpami, Hamelecpaj churi Malquías rurachishca jatun jutcupi shitachircacuna. Chai jutcuca cárcel huasi canllapimi carca. Chaimanca huascacunahuanmi uriyachircacuna. Chai jutcupica yacu mana tiyashpapish, sangu lodomi tiyarca. Jeremiasca chaipimi pambarirca.

7Etiopía llajtamanta Ebed-melec shuti eunuco runami mandana huasipi jatun mandajta servij carca. Paimi Jeremiasta jatun jutcupi shitashcata yachaj chayashca carca. Jatun mandajca Benjamín shuti pungupimi mandajcunahuan tandanacushpa tiyacurca.

8Ebed-melecca, mandana huasimanta llujshishpa chaiman rishpami, jatun mandajtaca cashna nirca:

9–Jatun mandaj ñuca amitolla, mandajcunaca Dios ima nishcata huillaj Jeremiasta jatun jutcupi shitachishpaca, mana allitamari rurashcacuna. Cai pueblopipish ima micuna illanmari, chai jutcupicarin yaricaihuan huañungamari– nircami.

10Shina nijpimi jatun mandajca, Etiopía llajtamanta caj Ebed-melectaca:

–Caimanta quimsa chunga runacunata pushai. Dios ima nishcata huillaj Jeremiastaca, amaraj huañujpi chai jutcumanta paicunahuan llujshichi– nirca.

11Shina nijpica Ebed-melecca, runacunata pushashpami, mandana huasipi churanacunata huaquichina ucuman yaicurca. Chai ucumanta lliquirishca mauca churanacunata apashpami, Jeremías japichun huascacunapi huatashpa jutcuman shitarcacuna.

12Chashna rurashpami, Etiopía llajtamanta Ebed-melec runaca Jeremiastaca:

–Chai lliquirishca mauca churanacunataca, cambaj ishqui rigra ucucunapi churai. Chashna rurajpimi huascacunaca rigra ucucunataca mana japinga– nirca.

Jeremiasca pai nishca shinallatajmi rurarca.

13Chashnami Jeremiastaca, chai jutcumanta huascacunahuan llujshichircacuna. Chai q'uipaca Jeremiasca, cárcel huasi canllapimi saquirirca.

Jatun mandaj Sedequiasca Jeremiashuan pacallapi rimashcamanta

14Jutcumanta llujshichishca q'uipami, jatun mandaj Sedequiasca, Dios ima nishcata huillaj Jeremiastaca pai tiyacunman pushaj cacharca. Paica Mandaj Diospaj huasiman yaicuna ishqui pungu huashanij pungupimi tiyacurca. Chaipimi jatun mandajca Jeremiastaca:

–Ñucami canta shuj tapunata charini, ama imata pacashpa tucuita huillai– nircami.

15Shina nijpimi Jeremiasca Sedequiastaca:

–Can tapushcata ñuca tucuita huillajpica, ñucataca mana huañuchina cajpi, ñuca ima yuyaita cujpipish canca uyana cajpichu huillashari– nirca.

16Shina nijpica jatun mandaj Sedequiasca, Jeremiastaca pacallapimi cashna nirca:

–Cantapish ñucatapish causaiyujta ruraj, Mandaj Diospish ricucunmi. Cantaca manataj huañuchishachu. Canta huañuchishun nishpa shuyacuj mandajcunamanpish manataj cushachu– nircami.

17Shina nijpimi Jeremiasca, Sedequiastaca cashna nirca:

–Tucuita Mandaj Diostaj, israelcunapaj Diostajmi cashna nin: Babilonia llajtata jatun mandaj cachashca mandajcunapajman rishpa, cunantaj paicunapaj maquipi yaicushpaca mana huañunguichu. Canpish, cambaj familiapish mana huañunguichijchu. Cai pueblopish mana rupachishca cangachu.

18Ashtahuanpish Babilonia llajtata jatun mandaj cachashca mandajcunapajman mana canllataj llujshishpa paicunapaj maquipi yaicujpica, cai puebloca caldeocunapaj maquipi churashca cangami. Paicunaca ninata japichishpa tucuimi rupachingacuna. Canpish paicunapaj maquimantaca, manataj quishpiringuichijchu ninmi– nircami.

19Shina nijpimi jatun mandaj Sedequiasca, Jeremiastaca cashna nirca:

–Caldeocunapajman rishpa, paicunapaj maquipi yaicushca Judá runacunapaj maquipi ñucata churanatami manchani. Paicunapaj maquipi churajpica, ñucataca jatuntamari llaquichingacuna– nircami.

20Shina nijpimi, Jeremiasca cashna nirca:

–Mana paicunapaj maquipi churangacunachu. Ñucaca Mandaj Dios huillachun nishcatamari huillani, chaita uyayari. Chaita uyashpaca mana ima tucunguichu, allimi causangui.

21Ashtahuanpish mana canllataj paicunapaj maquipi yaicugrijpica, cashna tucunatami ñucamanca huillarca:

22Judá llajtata jatun mandajpaj huasipi caj tucui huarmicunami, Babilonia llajtata jatun mandaj cachashca mandajcunapaj llujshichishca cangacuna. Chai huarmicunallatajmi cashna ningacuna: “Canhuan alli apanacujcunamari cantaca umashpa mishashcacuna. Cambaj chaquicunata lodopi pambashpaca, huashaman tigranllacunamari” ningacunami.

23Cambaj tucui huarmicunatapish, huahuacunatapishmi caldeocunaca caimanta llujshichishpa apangacuna. Canpish paicunapaj maquimantaca manataj quishpiringuichu. Ashtahuanpish Babilonia llajtata jatun mandajpaj maquipi japi tucunguitajmi. Cai pueblopish tucui rupachishca cangatajmi– nircami.

24Chashna huillajpi Sedequiasca, Jeremiastaca cashnami nirca:

–Cai shimicunataca amalla pi yachashca cachun. Pi mana yachashpaca cantaca mana huañuchingacunachu.

25Mandajcuna ñuca canhuan parlanacushcata yachaj chayashpa, cambajman shamushpaca: ¿Imatataj jatun mandajhuan parlanacurcangui, jatun mandajca cantaca imatataj nirca? Tucuita ñucanchijman huillai. Imata mana pacashpa huillajpica, mana huañuchishunchu ningacunami.

26Shina nijpica: Jatun mandajtaca mana chai Jonatanpaj huasipi huañusha ninica, ama chaiman cutin tigrachishpa cachahuaichu nishpallami mingacurcani ningui– nircami.

27Q'uipallataca, jatun mandaj nishca shinatajmi tucurca. Tucui mandajcuna shamushpami, Jeremiastaca imata parlanacucushcata tapurcacuna. Paicuna tapujpica, Jeremiasca jatun mandaj yachachishca shinatajmi cutichirca. Chaimantaca Jeremiasta saquishpa rircacunallami. Jatun mandajhuan Jeremías imallata parlanacushcataca, imata mana yachaj chayashcacunachu carca.

28Chashnami Jeremiasca, caldeocuna Jerusalén pueblota japingacama, chai prezuna huasi canllapi saquirirca.