2 CRÓNICAS 24 - Quichua Chimborazo Bible

Judá llajtata Joás mandashcami(2 R 12.1-21)

1Joasca mandai callarinapajca canchis huatayujmi carca. Paica chuscu chunga huatatami, Jerusalenpi mandarca. Paipaj mamaca, Beersebamanta Sibia shutimi carca.

2Joasca Joiada curapaj tucui causaipimi Mandaj Diospaj ñaupajpica ima pandata mana rurashpa causarca.

3Joiadaca Joastaca, ishqui huarmihuanmi cazarachirca. Chai huarmicunahuanmi paica churicunata, ushushicunata charirca.

4Ña unita mandacushpami, Joasca Mandaj Diospaj huasita allichinata yuyarirca.

5Chaita allichingapajmi curacunata, levitacunata tandachishpa cashna nirca: “Judá llajtapi caj tucui pueblocunaman richij. Cancunapaj Diospaj huasita allichingapajca, chai pueblocunapi causaj israelcunata cullquita mañashpa tandachigrichij. Caitaca utca ruraichigari” nircami. Chashna mandajpipish levitacunaca, mana utca rircacunachu.

6Chaimantami jatun mandajca, curacunata mandaj Joiada curata cayashpa cashna nirca:

–Mandaj Diospajta ruraj Moisesca tucui israelcunatami, Dioshuan ima shinalla causanata yachachishca quillca tiyana carpa huasipajca, cullquita cuchun mandashcata churashca carca. Chashna cuna cashca cullquitaca ¿imamantataj Judá llajtapi causajcunatapish, Jerusalenpi causajcunatapish mañashpa apamuchun levitacunataca mana cachangui?

7Mandaj Diospaj huasipica, ima mana tiyanchu. Diosta mana manchaj Atalía huarmimi paita catijcunahuan tucushpa, chai huasipi tiyaj tucui charinacunataca, paicunapaj rurashcalla dioscunapaj tucuita apashcacuna– nircami.

8Chashna nishpami jatun mandajca, shuj arcata rurachirca. Chai arcataca Mandaj Diospaj huasi ñaupaj canlla ladomanmi pungu c'uchupi tiyachircacuna.

9Chai q'uipaca tucui Judá llajtapipish, Jerusalenpipishmi: “Mandaj Diospajta ruraj Moisesca, shitashca pambapimi israelcunataca Mandaj Diosman cullquita cuchun mandashca. Pai mandashca shinallataj, mashnata cuna cashcata apamuichij” nishpa huillarcacuna.

10Chashna nijpica tucui mandajcunapish, tucui caishujcunapishmi cuna cashcata cushicuihuan cugrishpa, chai arcapi jundachijcuna carca.

11Chashna jundajpimi levitacunaca, jatun mandajpaj quillcajpajman chai arcata apajcuna carca. Chashna apashpa ricuchishpami, curacunata mandaj curallataj chaita ricuchun churashca quillcaj runaca, chai arcamantaca cullquita llujshichij carca. Chai ishquindij runacuna ricushpa cullquita llujshichishca q'uipaca, chai arcataca tiyanallapitajmi saquijcuna carca. Punllanta chashna rurashpami, achca cullquita tandajcuna carca.

12Jatun mandajhuan, Joiada curahuanmi chai cullquitaca, Mandaj Diospaj huasita allichichicujcunaman cujcuna carca. Chai cullquihuanca paicunaca rumicunata labrajcunatapish, carpinterocunatapish apamushpami, Mandaj Diospaj huasita allichichircacuna. Fierromanta, broncemanta ima charinacunata ruranata yachajcunatapish apamushpami, chai huasita allichichircacuna.

13Diospaj huasita allichichun mingashcacuna ña allichi callarishpaca, utcami tucuchircacuna. Tucuitami alli allichishpa, mushujta shinallataj saquircacuna. Chashnami tucuita allichishpa saquircacuna.

14Ña tucui allichijpi mana tucurishca cullquitaca, jatun mandajman, Joiada curapajmanmi apamurcacuna. Chai cullquihuanca paicunaca Mandaj Diospaj huasipi charingapajmi charinacunata rurachircacuna. Diospaj huasipi Diospajta rurangapajpish, animalcunata Diosman cushpa tucui rupachinapi charinacunatapishmi rurachircacuna. Mortero nishcacunata, cucharacunata, vasocunatami curimantapish, cullquimantapish rurachircacuna. Joiada cura causacujpica, Mandaj Diospaj huasipi animalcunata Diosman cushpa tucui rupachinataca mana saquircacunachu.

15Joiada curaca, 130 huatayuj, yallitaj yuyaj cashpami huañurca.

16Pai dormijpica Davidpaj pueblopimi, jatun mandajcunata pambashca c'uchupi pambarcacuna. Paica israelcunapajpish, Diospajpish, Diospaj huasipajpishmi allita rurarca. Chaimantami paitaca chaipi pambarcacuna.

17Joiada cura huañushca q'uipaca, Judá llajtata mandajcuna jatun mandajpajman shamushpami, tucuicuna paita cazunata ari nircacuna. Paicuna shamushpa cunashcataca jatun mandajca cazurcallami.

18Paicunapaj ñaupa yayacunata Mandaj Taita Diospaj huasitaca shitashpami saquircacuna. Chaimantaca Asera huarmi diostajllacunatapish, shujtaj rurashcalla dioscunapajtapishmi rurarcacuna. Chashna millaita rurashcamantami, Mandaj Diosca Judá llajtapi causajcunahuanpish, Jerusalenpi causajcunahuanpish p'iñarirca.

19Chashna p'iñarishpapish Mandaj Diosca, paiman cutirichun nishpa huillachunmi, profetacunata cacharca. Ashtahuanpish paicunaca profetacuna huillashcataca mana cazurcacunachu.

20Chaimantami Joiada curapaj churi Zacariasca, Diospaj Espíritu japijpi rishpaca, tucuicuna ricunallapi shayarishpa cashna nirca: “Mandaj Taita Diosca cashnami nin: ¿Ima nishpataj ñuca mandashcacunata mana cazunguichij? ¿Ima nishpataj cancunallataj llaquita mashcanguichij? ¡Cancuna ñucamanta anchurishcamantaca, ñucapish cancunamanta anchurishami! ninmi” nircami.

21Chashna huillajpica, ashtahuanpish paicunaca tucuicunami paita llaquichinata yuyarinacurcacuna. Chashna yuyarinacushpaca, jatun mandaj huañuchichun nijpimi, Mandaj Diospaj huasi canllapi Zacariastaca rumicunahuan shitarcacuna.

22Zacarías ña huañushpaca: Cashna rurahuashcataca “Mandaj Dios ricuchun, paillataj imatapish nichun” nircami. Jatun mandaj Joasca, Zacariaspaj yaya Joiada paihuan tucuipi alli cashcataca mana yuyarishpa, Zacariastaca huañuchircallami.

23Huata callari quillami, Siria llajta soldadocunaca jatun mandaj Joashuan macanacunaman shamurcacuna. Judá llajtaman yaicushpa Jerusalenmanpish ña chayamushpaca, Judá llajtapi causajcunata tucui mandajcunatami huañuchircacuna. Chai q'uipaca imalla tiyajta quichushpami, Damascota jatun mandajpajman cacharcacuna.

24Judá llajtamanca Siria llajta soldadocunaca, shuj mirgallami shamushcacuna carca. Shina cajpipish Mandaj Diosca, Judá llajtapi causajcuna paimanta anchurishcamantami, paicunataca achca soldadocunata chai ashalla soldadocunapaj maquipi churarca. Chashnami Joastaca, paita llaquichina cashca shinallataj jatunta llaquichircacuna.

25Chai siriocunaca, Joastaca achcata chugrichishpa anchatami saquircacuna. Chashna saquijpica, pai churashca mandajcunallatajmi huashalla yuyarinacushpa, paipaj camallapitaj huañuchircacuna. Joiada curapaj churi Zacariasta huañuchishcamantami, chashna huañuchircacuna. Chai q'uipaca, Davidpaj pueblopimi pambarcacuna. Shina cashpapish, mana jatun mandajcunata pambashcapi pambarcacunachu.

26Huashalla yuyarinacushpa paita huañuchijcunaca: Amonitapura caj Simeatpaj churi Zabadhuan, moabitapura caj Simritpaj churi Jozabadhuanmi carca.

27Joaspaj churicunamantapish achca impuestocunata japishcamantapish, Diospaj huasita allichishcamantapish, jatun mandajcuna imallata rurashcata quillcashcapimi tucui quillcashca tiyacun. Joaspaj randica paipaj churimi Amasiasmi mandarca.