GÁLATAS 5 - Quichua Chimborazo Bible

Cacharichishcapi sinchicuna caichij nishcami

1Cristo cacharichishcamanta, quishpichishcapi sinchi caichij. Esclavota rurajpaj yugopica ama cutin huatashca caichijchu.

2Ñuca, Pablotajmi cancunamanca cashna nini. Circuncisionta rurachijcunaca, Cristomantaca imata mana japingacunachu.

3Maijanpish circuncisionta rurachijmanca, tucuicunamanmi cutin huillani. Paica tucui Mandashcatami pajtachinataj tucun.

4Mandashcata rurashcamanta justificashca tucusha nijcunaca Cristomanta anchurishpami, mana c'uyaipajta c'uyashca canamanta anchurishcanguichij.

5Ñucanchijca Espiritumanta crishcamantami, cashcata rurajta rurashca canchij. Chaimantami chai yuyailla canchij.

6Cristo Jesushuan shujlla tucushca cajpica, circuncisionta rurachishca cashpapish, mana rurachishca cashpapish ima mana canchu. Ashtahuanpish crishcamanta c'uyaihuan ruranami alli.

7Cancunaca allitami ruracurcanguichij. Mana llullata ama cazuchunca ¿pitaj jarcarcari?

8Mana cazunaca, cancunata cayaj Diosmantaca mana shamunchu.

9“Ashalla levadurami tucui masata p'unguillichin”.

10Cancuna shujtaj shina yuyanataca, Mandaj Jesusmantami mana manchani. Ashtahuanpish cancunata pandachijca, maijan cashpapish llaquitami apanga.

11Huauquicuna, circuncisionta ruranallatataj ñuca huillacushca cashpaca, mana chashna p'iñashpa llaquichishca caiman carcanichu. Chaita huillacushca cashpaca, cruzpi Cristo llaquita apashcatami yanganchiman carcani.

12¡Cancunata pandachijcunaca paicunallataj tucui p'itirishpachari alli canman!

13Cancunaca huauquicuna, ama huatashca cachun Dios agllashcacunami canguichij. Cacharichishcami canchij nishpaca, ñataj aicha munaita ruranguichijman. Ashtahuanpish c'uyaimantaca, caishujpaj chaishujpaj allita ruraichij.

14Tucui Mandashcami: “Quiquin c'uyarij shinallataj shujtajcunatapish c'uyangui” nishca shimipi pajtan.

15Ashtahuanpish caishuj chaishuj caninacushpa micunacushpaca, ricungui cancunallatajmi caishuj chaishuj chingaringuichij.

Aichapaj ruraicunapish Espiritupaj granopish

16Cashnami nini: Espíritu nishca shina purichij. Aicha munaicunapica, ama cushicuichijchu.

17Aichapaj munaica, Espirituta p'iñanmi. Espiritupish, aicha munaitaca p'iñanmi. Chaicunaca quiquin munashcata, ama rurachunmi caishuj chaishuj macanacun.

18Ashtahuanpish cancunaca, Espíritu pushashcacuna cashpaca, Mandashca ucupica ña mana canguichijchu.

19Aichapaj ruraicunaca ricunalla, caicunami: Huainayana, apanacushpa causana, imapish millananata rurana, aicha munaita mana jarcarina,

20rurashcalla dioscunata adorana, brujiana, p'iñanacushcalla causana, c'amina, huañurina, jahualla p'iñarina, p'iñanacuicuna, ch'icanyarinacuna, panda yachachicuna,

21envidiaicuna, huañuchicuna, machaicuna, maipish cachun fiestacuna, imapish chai shina ruraicunapishmi tiyan. Chaicunamantaca ñaupaman ña huillashca shinallatajmi, cancunataca mandani. Chaicunata rurajcunaca, Dios mandacujpi cana cajca mana cai tucunchu.

22Ashtahuanpish Espiritupaj granoca c'uyaimi, cushimi, sumaj causaimi, mana utca p'iñarinami, alli shungumi, alli cajmi, crijmi,

23manso shungumi, quiquinllataj jarcarijpishmi. Chaicunataca, Mandashcaca mana imata ni tucunchu.

24Ashtahuanpish Cristopaj cajcunaca paicunapaj aichataca ruraicunandij, munaicunandijmi chacatashca.

25Espiritumanta causacushpaca, Espiritullahuantaj purishunchij.

26Caishuj chaishuj p'iñachinacushpa, caishuj chaishuj envidianacushpa yanga jatunyarinataca, ama mashcashunchij.