NÚMEROS 22 - Quichua Chimborazo Bible

Jatun mandaj Balac, Balaam runata cayachishcami

1Israelcuna chaimanta rishpaca, Jericó pueblo ch'imbapurapi caj Jordán yacu c'uchu, Moab llajtapimi carpa huasicunata shayachishpa tiyarirca.

2Zipor runapaj churi Balacca, israelcuna amorreocunata tucui imallata rurajtami ricurca.

3Moabitacunaca israelcuna yallitaj achca cajta ricushpami, jatun manchaihuan carca. Chashnami moabitacunaca yallitaj llaquilla carca.

4Chaimi moabitacunaca Madián llajtapaj cunaj yuyajcunataca: “Riquichigari, chai gentecunaca shuj huagra chagra q'uihuata tucui millpuj shinallamari, ñucanchij llajtataca tucuchigrin” nircacuna.

Chai punllacunapica Moab llajtataca, Ziporpaj churi Balacmi mandacurca.

5Paimi Beorpaj churi Balaamta cayamuchun cacharca. Balaamca, paipaj llajtapuracuna causan jatun yacu c'uchupi caj Petor pueblopimi causarca. Chai pueblomanmi Balacca, Balaamta cayamuchun cashna nishpa cacharca: “Egiptomanta llujshimuj gentecuna shamushpami cai llajtacunapi jundashpa, ñuca llajta ch'imbapurapi causacun.

6Chai gentecunaca ñucata yalli c'ari c'aricunamari. Chaimanta paicunata ima llaquipish tucuchun ningapaj can shamuchunmi rogani. Can chashna rurajpica, chai gentecunata huañuchishpa cai llajtamanta chingachishapishchari. Maijanta can alli cashca cachun nijpipish, maijanta can imapish tucushca cachun nijpipish chashna tucuj cashcataca yachanimi. Chaimantami can shamuchun rogapani” nichunmi cacharca.

7Chaimi moabitacunata cunaj yuyajcunapish, madianitacunata cunaj yuyajcunapish adivinashcamanta cungapaj convidanacunata apashpa rircacuna. Balaampajman chayashpaca, Balac imallata nishcatami huillarca.

8Chaimi Balaamca:

–Cunan tutaca caipi samarichij. Mandaj Dios ñucaman ima nishcata cancunaman huillashami– nijpimi, moabitacunata pushajcunaca Balaamhuan saquirircacuna.

9Chai tutami Taita Diosca Balaamman ricurishpaca:

–¿Canhuan caipi cajcunaca picunataj?– nishpa tapurca.

10Balaamca, Taita Diosmanca cashnami nirca:

–Zipor runapaj churi Moab llajtata jatun mandaj Balacmi, ñucata cashna ninaman cachashca:

11Egiptomanta llujshimuj gentecunamari tucui cai llajtacunapi jundashpa causacun. Chaimanta cunanca paicunata imapish tucushca canman ningapaj shamui. Can chashna nijpica paicunahuan macanacushpa, paicunata mishashpa caimanta llujshichishpa cachashapishchari nichunmi cachashca– nirca.

12Chaimi Taita Diosca Balaamtaca:

–Chai runacunahuanca ama richu. Chai gentecunataca imapish tucushca canman ama nigringuichu. Paicunaca ñuca alli nishcacunami– nirca.

13Shina nijpi Balaamca cayandij tutamanta utcata jatarishpa Balac cachashca pushajcunamanca:

–Cancunapaj llajtaman tigraichijlla. Ñucataca Mandaj Diosmi cancunahuanca ama richun nin– nircami.

14Chaimi moabitacunata pushajcunaca Balac maipi canman tigrashpaca:

–Balaamca ñucanchijhuanca mana shamusha ninchu– nijpi

15Balacca, cutinllataj shujtaj achca pushajcunata cacharca. Paicunaca ñaupaman cachashcacunata yalli ashtahuan alli nishcacunami carca.

16Paicunapish Balaampajman rishpaca, cashnami nircacuna:

–Ziporpaj churi Balacca cashnami nin: Ñucapajman shamunataca ama mana shamusha nichu. Shamupailla nishpami rogani.

17Canmanca tucuimanta yalli allicunatami cusha. Can imata rurachun nishcatapish rurashami. Chaimanta cunanca chai gentecunata imapish tucushca canman ningapaj shamupailla ninmi– nircacunami.

18Chaimi Balaamca, Balacpajta rurajcunataca cashna nirca:

–Jatun mandaj Balac, paipaj huasi ucu junda cullquita, curita ñucaman cujpipish mana imata ruragri tucunichu. Ñucata Mandaj Dios ama rurangui nishcataca ashalla cachunpish, achca cachunpish mana ruragri tucunichu.

19Chaimanta cancunataca cunan tutaca caipi samarichunmi rogani. Mandaj Dios ñucaman imata nijta cutin uyasha– nirca.

20Chai tutami Taita Diosca Balaamman ricurishpaca:

–Cai runacuna canta pushashataj nijpica, jatarishpa paicunahuan rilla. Paicunahuan rishpapish ñuca ima nishcallatami rurana cangui– nirca.

Mandaj Diospaj angelpish Balaampaj burropish

21Taita Dios shina nijpimi, Balaamca cayandij tutamanta utcata jatarishpa, paipaj burrota parejashpa Moab llajtata pushajcunahuan rirca.

22Balaam rijpimi Mandaj Diosca nina sindirij shina p'iñarishpa, paipaj angelta cacharca. Chai angelca Balaam ricun ñanpimi Balaamta jarcashpa shayarirca. Balaamca paipaj burropi tiyarishca paipajta ruraj ishqui runacunatapish pushashcami ricurca.

23Balaampaj burroca Mandaj Diospaj ángel, espadata maquipi aisashca chaupi ñanpi shayacujta ricushpami, ñanmanta llujshishpa chagra jahuata rirca. Chaimi Balaamca ñanman tigrachingapaj burrotaca azotishpa macarca.

24Chaipicarin Mandaj Diospaj angelca, uva chagra chaupita rina ashtahuan quichqui ñanpimi shayarigrirca. Chai ñanca ishquindij ladota patacunami carca.

25Mandaj Diospaj angelta chai burro cutinllataj ricushpaca pata c'uchuman pegarishpami, Balaampaj chaquitaca patapi llapichijpi, Balaamca cutinllataj azotishpa macarca.

26Mandaj Diospaj angelca, paicunata ashtahuan ñaupashpa rishpami alli ladomanpish, lluqui ladomanpish mana llujshipaj tucuimanta yalli ashtahuan quichqui ñanpi shayarigrirca.

27Mandaj Diospaj angelta chai burro ricushpaca, Balaamta aparishcallatajmi pambapi siririrca. Chaimi Balaamca p'iñarishpa burrotaca shuj caspihuan garrotishpa macarca.

28Chaipimi Mandaj Diosllataj rimachijpi, chai burroca Balaamtaca:

–¿Imatataj rurashcani? ¿Ima nishpataj ñucataca caihuanca ña quimsa cutin macangui?– nirca.

29Chaimi, Balaamca chai burrotaca:

–¿Ima nishpataj ñucataca chanzata rurangui? Shuj espadata ñuca maquipi charicushpaca cunantajmi huañuchiman– nirca.

30Ashtahuanpish, burroca Balaamtaca:

–¿Manachu ñucaca cambaj burro cani? Canca ñucata charishca punllamanta cunancamami ñucapi tiyarishpa puringui. Chashna cashcamanta maipitaj cunan shina mana cazushcaniyari– nijpimi Balaamca:

–Ari chashnami– nirca.

31Mandaj Dios Balaampaj ñahuita pascajpimi, Balaamca Mandaj Diospaj ángel espadata maquipi aisashca chaupi ñanpi shayacujta ricurca. Chaimi Balaamca cungurishpa pambaman tupajta cumurirca.

32Chaipimi Mandaj Diospaj angelca Balaamtaca:

–¿Ima nishpataj cambaj burrotaca azotishpa quimsa cutin macangui? Ñucami cantaca jarcanaman shamurcani. Can millaita ruranaman ricujpimi chashna jarcarcani.

33Burromari ñucata ricushpa, quimsa cutin ladoyan. Chai burro mana ladoyashca cajpica, cantaca ñami huañuchiman carcani. Paitaca mana huañuchimanchu carcani– nirca.

34Chaimi Balaamca, Mandaj Diospaj angeltaca:

–Ñucaca juchallishcanimari. Cai ñanpi quiquin ñuca ñaupajpi jarcacushcataca mana yachashcanichu. Ashtahuanpish cunanca ñuca chaiman rina quiquinpi mana alli cajpica tigrashalla– nirca.

35Ashtahuanpish Mandaj Diospaj angelca Balaamtaca:

–Cai runacunahuan rilla. Paicunahuan rishpapish, ñuca imatami rimai nini chaillata rimangui– nijpica, Balaamca Balac cachashca pushajcunahuanmi rirca.

36Balacca Balaam shamucun nijta uyashpami, Moab pueblopi tupanaman rirca. Chai puebloca Moab llajta linde, Arnón jatun yacu c'uchullapimi carca.

37Chaipimi Balacca, Balaamtaca:

–Ñuca canta cayanaman cachashcataca ¿manachu crircangui? ¿Ima nishpataj ñucapajmanca mana shamusha nircangui? ¿Manachu ñucaca can imalla nishcata cui tucuipaj cani?– nirca.

38Chaimi Balaamca Balactaca:

–Riqui, ñucaca ñami cambaj ñaupajman shamuni. Shina cashpapish ñuca quiquin yuyaillamantaca imata mana rimashachu. Ashtahuanpish Taita Dios imata rimachishcallatami rimasha– nirca.

39Chaimantaca Balacca, Quiriat-huzot pueblomanmi Balaamta pushashpa rirca.

40Chaipimi Balacca huagracunata, ovejacunata huañuchichishpa Balaammanpish paihuan caj pushajcunamanpish caranaman cacharca.

41Cayandij punllaca Balacca Balaamta pushashpami, Bamot-baal shuti urcuman huichiyarca. Chai urcumantami israelcuna carpa huasicunata shayachishpa tiyacun shuj mirgata ricunalla carca.