2 CORINTIOS 10 - Quichua Chimborazo Bible

Pabloca apostól cashcatami ricuchishca

1Ñucaca Pablomi cani. Cristo llaquij alli shungu cashca shinami ñucapish, cancunataca uyapaichij nini. Ñucaca cancunahuan cashpaca, mana jatun tucushca carcanichu. Ashtahuanpish cancunamanta carupi cashpaca, c'ari c'arimi tucushcani.

2Paicunaca aicha munaitami rurashpa puricun nijcunataca ñuca shamushpa, p'iñarishpa achcata rimana yuyai cashca shina ama rimana tucuchun, cancunallataj ricupaichijlla nipanimi.

3Cai aichapi causacushpapish, aicha munashca shinaca mana macanacucunchijchu.

4Ñucanchijca mana cai pachapaj macanacunahuanchu macanacucunchij, ashtahuanpish Dios cushca imatapish rurai tucuj macanacunahuanmi jarcacuj pirca shinacunata urmachinchij.

5Chashnami Diosmanta ama yachachun nishpa jatun tucushpa jarcaj yuyaicunataca chingachinchij. Cristota cazungapajmi ñucanchij tucui yuyaicunataca paiman curinchij.

6Cancuna cazujcunataj tucujpipish, tucui mana cazujcunataca llaquichinapaj allichishcami canchij.

7Imatapish ñahui ricushcallatami ricunguichij. Maijanpish Cristopajmi cani nishpaca, pai Cristopaj cashca shinallataj ñucanchijtapish Cristopaj cashcata yuyachun.

8Mandaj Jesús cushca mandanata charinimi nishpa, ashahuan jatun tucushpa rimacushpapish, mana pingarinichu. Mana cancunata chingachichunchu cai mandanataca ñucanchijmanca curca, ashtahuanpish crishcapi ashtahuan sinchiyachichunmi curca.

9Quillcacunata cachashpaca, cancunata yallitaj manchachingapaj cachashcataca ama yuyanguichijchu.

10Ñuca quillcashcacunataca, cashnami nincuna. Paica yallitajmi sinchita rimashpa quillcan. Paitaj caipi cashpaca, irqui shinami carca, pai rimashcapish pita mana cazuchipajmi carca nicun nijtami uyani.

11Maijanpish chashna nicujca, caita yuyaipi charichun. Ima shinami carupi cashpa quillcashpa rimanchij, shinallatajmi cancunahuan cashpapish rurashun.

12Ñucanchijca allimi canchij mana ninchijchu, shujtajcuna shinapish mana cashun ninchijchu. Paicunallataj allimi canchij nijcunaca shujtajcuna shina cashun nijcunaca, yuyai illajcuna cashcatami ricuchin.

13Chaimanta ñucanchijca maipish cachun mana jatun tucunchijchu. Ashtahuanpish ñucanchijman imalla ruranata Dios cushca shinallami ruranchij. Paillatajmi cancunapajcamapish chayachirca.

14Chaimi cancunapajpi cashpaca mana yalli mana carcanchij. Ñucanchijraj cancunapajman mana chayashca cajpica ima shinachari canguichijman carca. Ashtahuanpish ñucanchijmi Cristomanta alli huillaita huillangapajca, cancunapajman punta chayarcanchij.

15Shujtajcuna trabajashcallapi satirishpaca, mana jatun tucunchijchu. Ashtahuanpish cancuna crishcapi huiñajpi, cancunapurapi ashtahuan yachachishpa jatunyarina yuyaillami canchij. Chaimi ñucanchij yuyaica.

16Chashnami cancunapaj llajtamanta ashtahuan caru llajtacunapipish, alli huillaitaca huillashun ninchij. Shujtajcuna rurashcallapi ama jatun tucungapajmi ña shujtajcuna, huillashpa callarichishcapica mana yaicurishun ninchij.

17Pipish jatun tucusha nishpaca, Mandaj Jesuspi jatunyarichun.

18Paillataj allimi cani nirijca manapish alli nishcachu, ashtahuanpish Diosllamari alli nijca.