1 SAMUEL 24 - Quichua Chimborazo Bible

Saulta En-gadi urcupi David mana huañuchishcami

1Filisteocunahuan macanacushpa Saúl tigramujpica: “Davidca En-gadipi caj shitashca c'acacunapimi” nishpami huillarcacuna.

2Chaimi Saulca tucui israelcunapuramanta, 3.000 agllashca runacunata pushashpa, Davidtapish, paipaj runacunatapish sacha chivocuna causana c'acacunapi mashcanaman rirca.

3Chaipica ñan c'uchullapi tiyaj ovejacunapaj corralman chayashpami, Saulca chai c'uchullapi tiyaj jutcupi mapangapaj yaicurca. Chai jutcu ucu c'uchumanca Davidpish, paihuan caj runacunapishmi tiyacurcacuna.

4Chaipimi Davidhuan caj runacunaca:

–Riqui, canta p'iñajtaca cambaj maquipimi churashca. Paitaca can munashca shina imatapish ruranguilla nishpa Mandaj Dios nishca punllami pajtashca– nijpimi, Davidca jatarishpa upajlla rishpaca, Saulpaj jahua churana mirgata p'itirca.

5Davidca Saulpaj jahua churana mirgata p'itishcamantaca paipaj shungupica achcatami llaquirirca.

6Chaimi paihuan caj runacunataca:

–Ñuca amota cancuna nishca shina llaquichichunca Mandaj Dios ñucataca huaquichichun. Paica Mandaj Dios churashca jatun mandajmari. Paitaca Mandaj Dios churashca jatun mandaj cashcamantaca ñuca maquihuanca imata mana rurashachu– nirca.

7Chashna rimashpami Davidca, paipaj runacuna jatarishpa Saulta llaquichichunca mana saquirca. Saulca, chai jutcumanta llujshishpaca paicuna ricushcaman rircallami.

8Davidpish chaimanta jatarishpa jutcumanta llujshishpami Saultaca:

–¡Jatun mandaj, ñuca amito!– nishpa caparirca.

Saúl tigrarishpa ricujpica, Davidca pambaman tupajta cumurishpami paita alli nishcata ricuchirca.

9Chaipimi Davidca Saultaca:

–Riqui, Davidca canta huañuchisha nicunmi nishpa yanga huillajcunataca ¿ima nishpataj uyanguillari?

10Riqui, cunan cai jutcupi Mandaj Dios canta ñuca maquipi churashcataca cambaj ñahuihuantajmi ricungui. Cantaca huañuchichun nircacunami. Ashtahuanpish ñucaca canta perdonashpami: Ñuca amotaca ñuca maquihuanca mana imata rurashachu. Paica Mandaj Dios churashca jatun mandajmi nircani.

11Riqui, ñuca yayito. Cambaj jahua churana mirgata p'itishcata ñuca maquipi charicujta ricuyari. Ñucaca canta mana huañuchina yuyaihuan cashpami, canta mana huañuchishpa cambaj jahua churana mirgallata p'itircani. Chaita ricushpaca, canta ima mana allita ruranapish, canta huashalla imata ruranapish, canta llaquichishpa juchallina yuyaipish ñucapica mana tiyashcata ricuyari. Ashtahuanpish canmari ñucata japishpa huañuchina yuyai puricungui.

12Cantapish, ñucatapish ima shina cashcataca Mandaj Diosllataj ricuchichun. Ñucata llaquichishcamantaca Mandaj Diosllataj canta llaquichichun. Ñuca maquihuanca cantaca manataj llaquichishachu.

13Ñaupa yayacunapaj nishcacunapica: Diosta mana rijsijcunami millaitaca rurancuna ninmi. Chaimanta ñuca maquica cantaca manataj llaquichingachu.

14Israelcunata jatun mandajca ¿Pita mashcashpataj llujshimurcari? ¿Pitataj llaquichingapaj caticungui? ¿Huañushca allcuta, mana cashpaca, shuj piquitachu llaquichingapaj caticungui?

15Imalla rurashcata ricuchijca Mandaj Dios cachun. Canpish ñucapish imalla rurashcataca paimi ricuchinga. Ñuca ima shina cashcataca Mandaj Dios ricushpa, cambaj maquimantapish pai ñucata mitsachun– nircami.

16David chai shimicunata Saulta nijpimi Saulca:

–Ñuca huahua David. Cai shimicunataca canllatajchu rimacungui– nishpa Saulca sinchita caparishpa huacashpami,

17Davidtaca:

–Canca ñucata yalli cashcata rurajmari cangui. Ñuca canta llaquichicujpipish, canca ñucapajca allita rurashpamari ricuchingui.

18Mandaj Dios cambaj maquipi ñucata churajpipish, ñucata mana huañuchishpami, ñucahuan alli cashcata ricuchishcangui.

19¿Maijan runataj paita p'iñajta japishpaca imata mana rurashpa, ima mana tucushca quishpirishpa richun saquinmanlla? Can chashna ñucapaj allita rurashcamantaca, Mandaj Dios canmanca allicunata cuchun.

20Cunantajca israelcunata can mandana cashcata yachanimi. Israelca can mandacun maquipi cashpaca pi mana cuyuchipaj sinchimi canga.

21Can mandaj tucushpaca ñuca huahua huahuacunata ama chingachinata, ñuca yayapaj huasi ucupuramantapish ñuca shutita ama anchuchinata, Mandaj Diospaj ñaupajpi cunantaj ari nihuayari– nircami.

22Chaimi Davidca Saulmanca can nishcataca chai shinatajmi rurasha nirca. Chai q'uipaca Saulca, paipaj huasiman rircallami. Davidpish paipaj runacunandijmi miticushpa tiyacushca peña jutcuman huichiyarca.