JEREMÍAS 25 - Quichua Chimborazo Bible

Canchis chunga huatata Babiloniapi prezu causanamanta

1Judá llajtata Josiaspaj churi Joacim, ña chuscu huatata mandacujpimi, jatun mandaj Nabucodonosorca, Babilonia llajtata mandai callarirca. Pai mandanata callari huatami, Mandaj Diosca pai agllashca tucui Judá runacunaman imallata nichun Jeremiasman huillarca.

2Chai shimicunataca, Dios ima nishcata huillaj Jeremiasca tucui Judá runacunamanpish, Jerusalenpi causajcunamanpish cashna nishpami huillarca:

3“Amonpaj churi Josías Judá llajtata chunga quimsa huatata mandacui huatamanta cunancamaca, ña ishqui chunga quimsa huatami. Mandaj Diosca chai huatamanta callarishpa cunancamami ñucataca huillachirca. Chai tucui huatacuna ñaupamantami cancunataca rimashcani, mana upalla cashcanichu. Shina cajpipish, cancunaca manataj uyarcanguichijchu.

4Mandaj Diosca ashtahuan ñaupamantapachami, paita servij, pai ima nishcata huillajcunata cachashpa, cancunaman huillachishca. Paica mana upalla cashcachu. Shina cajpipish cancunaca manataj cazurcanguichijchu, mana uyashun nircanguichijllapishchu.

5Paicunataca cancunamanca cashnami huillachij carca: Millai causaita, millai ruranacunata saquishpa ñucaman cutirichij. Chashna cutirishpaca cancunapaj ñaupa yayacunamanpish, cancunamanpish ñuca cushca cai llajtapica huiñaita causacunguichijllami.

6Shujtaj dioscunataca ama catichijchu. Chai dioscunataca ama cungurichijchu, ama paicunata servichijchu. Ama cancunapaj maquillahuantaj rurashca chai dioscunata cungurishpa, ñucata p'iñachichijchu. Mana p'iñachijpica ñucapish cancunataca mana ima llaquita rurashachu nishpami, huillachij carca.

7Mandaj Diosca cashnapishmi nin: Chashna huillachijpipish cancunaca manataj ñucata cazurcanguichijchu. Ashtahuanpish cancunapaj llaquipajllatajmi quiquin maquillahuantaj rurashca dioscunata cungurishpa ñucata p'iñachircanguichij ninmi.

8Chaimantami tucuita Mandaj Diosca cashnapish nin: Ñuca rimashcataca manataj uyarcanguichijchu.

9Chaimanta cunanca tucui janaj lado llajtacunapi causaj ch'ican ch'ican aillucunatapish, Babilonia llajtata jatun mandaj ñucata servij Nabucodonosortapishmi caiman pushamugrini. Paitami cai llajtapi causajcunatapish, cai muyundij tucui llajtacunatapish llaquichishpa tucuchichun churagrini. Chashna huiñaipaj shitashcata saquishpami, chanzata rurashpa asinata rurasha. Ñuca Mandaj Diostajmi chashna nini.

10Tucui cai llajta runacunamantaca jatunta cushicushpa cantanatapish, cushicuihuan caparirinatapish, cusayuj huarmiyuj tucushca punlla cantanatapish chingachishami. Shinallataj cutana rumipish mana uyaringachu, tutacunapish lámpara achijyachishca mana ricuringachu.

11Cai tucui llajtami mancharina jatun llaqui tucunga. Cai llajtacunapi causajcunaca, canchis chunga huatatami Babilonia llajtata jatun mandajta servishpa causangacuna.

12Chai canchis chunga huata pajtashca q'uipami, Babilonia llajtata jatun mandajtapish, chai llajtapi causajcunatapish paicuna millaita rurashcamanta llaquichisha. Chai caldeocunapaj llajtataca huiñaitami shitashcata saquisha.

13Chai llajtapajca, imalla llaquicunata cachanata huillachishcatami cachasha. Chai llajtatapish, tucui shujtaj llajtacunatapish ñuca ima shinalla llaquichinata Jeremías huillashca shimicunaca, pai huillashcata quillcashca cai libropimi tiyacun.

14Paicunataca pitapish mishaj jatun mandajcunayuj, shujtaj achca llajtacunami mishashpa mandangacuna. Chashnami paicunatapish millaita rurashcamantaca llaquichisha ninmi” nircami.

Cai copamantaca shujtaj llajtacunapi causajcunamanpish ubyachi nishcamanta

15Israelcunata Mandaj Diosca ñucataca cashnami nirca: “Ñuca p'iñarishpa ubyachina vinohuan tiyacuj copata ñuca maquimanta japi. Cai vinotaca ñuca maijan llajtacunallapi causajcunaman ubyachigrichun nishcacunaman ubyachigri.

16Caita ubyashpaca, ñuca paicunapaj llajtacunaman espadahuan cachajpimi, chujchushpa musparingacuna” nircami.

17Mandaj Dios chashna nijpica, paipaj maquimanta chai copata japishpami, ubyachigri nishpa pai mandashca llajtacunaman ubyachircani.

18Puntaca Jerusalenpi, Judá llajtapi caj tucui caishuj pueblocunapi causajcunaman, paicunata jatun mandajcunamanpish, caishuj mandajcunamanpish ubyachishpami, jatun llaquipi churarcani. Chaita ubyashpami, chanzata rurashpa asina, shujtajcunatapish paicuna shina tucushca alli cachun nishca canapaj saquirircacuna. Cunancamami chashna causacuncuna.

19Shinallataj Egipto llajtata jatun mandaj faraonmanpish, pai churashca mandajcunamanpish, paita servijcunamanpish, paipaj tucui runacunamanpishmi ubyachircani.

20Chaipi causaj tucui shujtaj shujtaj runacunamanpish, Uz llajtata tucui jatun mandajcunamanpish, Filistea llajtapi caj Ascalón shuti, Gaza shuti, Ecrón shuti pueblocunata tucui jatun mandajcunamanpish, Asdod pueblopi saquirishcacunamanpishmi ubyachircani.

21Shinallataj Edom, Moab, Amón llajtapi causajcunamanpishmi ubyachircani.

22Tiro, Sidón shuti pueblocunata tucui jatun mandajcunamanpish, mama cucha uripi caj tucui llajtacunata jatun mandajcunamanpishmi ubyachircani.

23Dedán, Tema, Buz shuti aillucunamanpish, ñahui pata millmata rasparij runacunamanpishmi ubyachircani.

24Arabia llajtata tucui jatun mandajcunamanpish, shitashca pambapi causaj ch'ican ch'ican aillu runacunata tucui jatun mandajcunamanpish,

25Zimri, Elam, Media shuti llajtacunata tucui jatun mandajcunamanpishmi ubyachircani.

26Janaj ladoman caj tucui llajtacunata jatun mandajcunamanmi ubyachircani. C'uchullapi cajcunaman, carupi cajcunaman tucui cai pacha llajtacunallamantajmi huasha, huasha ubyachircani. Tucuicunapaj q'uipaca, Babilonia llajtata jatun mandajmi ubyanga.

27Mandaj Diosca ñucataca cashnami mandarca: “Tucui paicunataca cashna ningui: Tucuita Mandaj, israelcunapaj Diosca cashnami nin: Caita ubyashpa machaichij, shungu tigrashpa pambaman urmaichij. Ñucaca cancunata huañuchichunca, espadahuanmi cachagrini. Cutinca ña mana jataringuichijchu ninmi” ningui.

28Cambaj maquimanta mana chai copata japishpa ubyasha nijpica, cashna ningui: “Tucuita Mandaj Diosca cashnami nin: Ubyanatajmi canguichij.

29Ñucapajlla ch'icanchishca pueblopi causajcunatarajmi llaquichi callarirca. ¿Ashtahuanpish cancunatachu saquingami yuyanguichij? Cai llaquimantaca pi mana saquiringuichijchu. Tucui cai pachapi causajcunatami espadahuan huañuchigrini ninmi tucuita Mandaj Diosca ningui.

30Tucui paicunapaj llaqui shamunata cashna huillangui: Mandaj Diosca jahuamantami c'ulun nishpa uyaringa. Jucha illaj Diosca, pai causana huasimantami sinchita rimanga. Paipaj cashcamantami cai llajtataca p'iñarishpa caparinga. Tucui cai pachapi causajcunatami uvata sarujcuna cantanata cantaihuan llaquichinga.

31Tucui maipi tiyaj llajtacunamanmi c'ulun nishca uyaringa. Mandaj Diosca tucui cai pachapi causajcunapaj Juez cashpamari, tucui llajtacunapi causajcuna ima rurashcata ricugrin. Paita mana manchajcunataca espadahuan huañuchijcunamanmi cusha ninmi” Mandaj Diosca.

32Tucuita Mandaj Diosca cashnapishmi nin: “Cai pacha tucurimantami jatun acapana shina jatarishpa llaquichinga. Llajtan, llajtanmi jatunta llaquichishpa ringa.

33Chai punllapica, Mandaj Dios ñuca huañuchishcacunaca, shuj ladomanta caishuj ladocama, tucui cai pachapimi shitashca siricunga. Chai huañushcacunamantaca pi mana huacangachu, pi mana tandashpa pambangallapishchu. Majada shinami allpa jahuapi shitashca saquiringa.

34Michijcuna, caparirishpa huacaichigari. Oveja canllacunata pushajcuna, llaquirishpa allpapi singuichigari. Cunan punllami cancunataca cungata p'itishpa, tsirapana pajtashca. Sumaj vasota p'aquishca shinami saquiringuichij.

35Chai punllaca shuj michijllapish mana miticui tucungachu. Oveja canllacunata pushajcunaca pi mana quishpiri tucungachu.

36Mandaj Diosca michina pambacunataca tucuimari chingachishca. ¡Chaimantamari michijcunaca caparirishpa huacacuncuna! ¡Oveja canllacunata pushajcunamari jatunta huacacuncuna!

37Mandaj Diosca jatunta p'iñarishpamari, michina sumaj pambacunataca tucui chingachinga.

38Shuj león paipaj jutcumanta llujshishca shinami rurarca. Paicunata p'iñajcuna shamushpami, tucui llajtata llaquichirca. Jatunta p'iñarishpami, tucuchirca ninmi nishpa huillai” nircami.