1 JUAN 4 - Quichua Chimborazo Bible

Diospaj Espiritumantapish Cristota p'iñajpaj espiritumantapish

1C'uyashcacuna, cai pachapica achca llulla profetacunami ricurishca. Chaimanta ama tucui huillajcunata crichijllachu, Diospaj Espirituhuanchu nishpa alli ricuichij.

2Diospaj Espirituhuan cajtaca caipi rijsichij: Jesucristoca runa aichayuj tucushpami shamushca nishpa huillajca, Diospaj Espirituhuanmi.

3Jesucristoca mana runa aichayuj tucushpachu shamushca nishpa maijanpish nijca, mana Diospaj espirituhuanchu. Chaica, Cristota p'iñajpaj espirituyujmi. Chai shamuna cashcatami, cancunaca uyarcanguichij. Chaica ñamari cai pachapi.

4Huahuacuna, cancunaca Diospajmi canguichij. Cancunapi causacujca, cai pachapi cajta yallimi. Chaimantami paitaca ña mishashcanguichij.

5Paicunaca cai pachapajmi. Chaimantami cai pachapajllata rimancuna. Cai pachapaj cajcunami paicunataca uyancuna.

6Ñucanchijca, Diospajmi canchij. Diosta rijsijmi, ñucanchijtaca uyan. Mana Diospaj cajca, ñucanchijtaca mana uyanchu. Chaipimi mana llulla Espirituhuan cashcata, mana cashpaca pandachij espirituhuan cashcatapish rijsinchij.

Diosca c'uyajmi

7C'uyashcacuna, Dios c'uyaita cushcamanta caishuj chaishuj c'uyanacushunchij. Maijanpish c'uyajca Diosmanta huacharishcami, Diostapish rijsinmi.

8Maijanpish mana c'uyajca, Diostaca manaraj rijsishcachu. Diosca c'uyajmari.

9Diosca paipaj shujlla Churimanta ñucanchij quishpirichunmi cai pachaman cacharca. Chashnami pai c'uyaj cashcataca ricuchirca.

10Mana ñucanchijchu Diostaca c'uyashcanchij, ashtahuanpish paimari ñucanchijta c'uyashpa ñucanchij juchacunamanta huañushpa juchacunata anchuchichun paipaj Churitaca cacharca. Chashnami pai c'uyashcataca ricuchishca.

11C'uyashcacuna, Dios chashna c'uyashcamantaca ñucanchijpish caishuj chaishuj c'uyanacunamari canchij.

12Diostaca manataj pi ricushcachu. Caishuj chaishuj c'uyanacushpami, Dios ñucanchijpi causacushcataca yachachij. Chashnami Diospaj c'uyai ñucanchijpi cashcataca ricuchinchij.

13Paipaj Espirituta ñucanchijman cushcamantami, Diosca ñucanchijhuan, ñucanchijpish paihuan shujlla caticushcataca yachanchij.

14Cai pachapi causajcunata Quishpichij cachun, Yayaca paipaj Churita cachashcatami ricurcanchij. Chaitami ñucanchijca huillacunchij.

15Dios paipi causacujpi paipish Diospi causacushpallami, Jesustaca Diospaj Churimi nishpami huillai tucun.

16Chaimantami Dios ñucanchijta c'uyashcataca yachanchij, crinchij. Diosca c'uyajmi. Maijanpish c'uyajca Dioshuan shujllami, Diospish paihuanca shujllami.

17Jesucristo cai pachapi causacushpa ima shina c'uyaj cashca shinallataj ñucanchijpish c'uyashpa causashpaca, imalla rurashcata Dios ricuchicui punllapica imata mana manchashunchu.

18C'uyai tiyajpica, ima manchai mana tiyanchu. Ashtahuanpish c'uyaica manchaita anchuchijmi. Manchaica llaquipimi churan. Maijanpish manchajca, c'uyana cashca shinatajca manaraj c'uyanchu.

19Ñucanchijca pairaj c'uyashcamantami, paitaca c'uyanchij.

20Maijanpish: “Ñucaca Diostami c'uyani” nishpapish, paipaj huauquita p'iñajca llullami. Chaimanta maijanpish ricushca huauquita mana c'uyajca ¿ima shinataj mana ricushca Diostacarin c'uyangari?

21Ñucanchijca cashna mandashcatami, Jesucristomantaca charinchij: “Maijanpish Diosta c'uyajca, paipaj huauquitapish c'uyachun” ninmi.