JOSUÉ 12 - Quichua Chimborazo Bible

Maijanlla jatun mandajcunata Moisés mishashcami

1Jordán yacumanta inti llujshin ladoman causajcunata jatun mandajcunataca caicunatami israelcunaca mishashpa paicunapaj allpacuna cachun japirca. Chaicunaca caicunami: Arnón yacumanta callarishpaca, Hermón urcucama, inti llujshin lado Arabá pambacunandijmi tucuita japircacuna.

2Amorreocunata jatun mandaj Sehonca, Hesbón pueblopimi causarca. Paica Arnón yacu uri pugru pambapi tiyaj Aroer pueblomanta callarishpaca, chaupi Galaad llajtatapish Amón llajtahuan tupanacuj Jaboc yacucamami mandacurca.

3Inti llujshin ladoman caj Arabá pambatapish, Cineret mama cuchacama, chaimantaca ura ladotaca Cachisapa cuchacama, Bet-jesimot ñan ura chaqui quinritaca ashtahuan urata Pisga shuti urcu chaqui quinricamami paillataj mandacurca.

4Og shuti jatun mandajca, Basán llajtatami mandacurca. Paica refaitacunapuramanta saquirishcami carca. Paica Astarot, Edrei pueblocunapimi causarca.

5Og shuti mandajca, Hermón urcupi caj llajtatapish, Salca llajtatapish, tucui Basán llajtahuan, Gesur llajtahuan, Maaca llajtahuan tupanacuncama, chaupi Galaad llajtatapish, Hesbón pueblota jatun mandaj Sehón mandacun llajtahuan tupanacun llajtacamami mandaj carca.

6Tucui chai llajtacunata mandajcunatami, Mandaj Diospajta ruraj Moiseshuan, israelcunahuanca misharcacuna. Chai tucui llajtacunataca, Mandaj Diospajta ruraj Moisesca Rubenpaj ailluman, Gadpaj ailluman Manasespaj chaupi aillumanpishmi ña curca.

Maijanlla jatun mandajcunata Josué mishashcami

7Jordán yacumanta inti huashicun ladoman causajcunata jatun mandajcunataca Josuehuan israelcunahuanca, caicunatami misharcacuna: Líbano pambapi caj Baal-gad llajtamanta callarishpaca, Seir urcuman huichi rina Halac shuti urcucamami japircacuna. Chai allpacunataca Israel aillucunapaj cachunmi Josueca mashnapura cajpipish, pajtanata chaupishpa curca.

8Chai allpacunaca Arabá pambacuna, urcucuna, pugru pambacuna, Neguev llajta, chai muyundij shitashca pambacuna, quinri allpacunapishmi carca. Chai llajtacunapica heteocuna, amorreocuna, cananeocuna, ferezeocuna, heveocuna, jebuseocunami causaj carca.

9Tucui cai pueblocunata jatun mandajcunatami israelcunaca huañuchircacuna: Bet-el pueblo c'uchullapi caj Jericota jatun mandajta, Haita jatun mandajta,

10Jerusalenta jatun mandajta, Hebronta jatun mandajta,

11Jarmutta jatun mandajta, Laquista jatun mandajta,

12Eglonta jatun mandajta, Gezerta jatun mandajta,

13Debirta jatun mandajta, Gederta jatun mandajta,

14Hormata jatun mandajta, Aradta jatun mandajta,

15Libnata jatun mandajta, Adulamta jatun mandajta,

16Macedata jatun mandajta, Bet-elta jatun mandajta,

17Tapuata jatun mandajta, Heferta jatun mandajta,

18Afecta jatun mandajta, Saronta jatun mandajta,

19Madonta jatun mandajta, Hazorta jatun mandajta,

20Simron-merenta jatun mandajta, Acsafta jatun mandajta,

21Taanacta jatun mandajta, Meguidota jatun mandajta,

22Cedesta jatun mandajta, Carmelo urcu c'uchupi caj Jocneamta jatun mandajta,

23Dor llajtapi caj Dorta jatun mandajta, Gilgalpi caj Goimta jatun mandajta,

24Tirsata jatun mandajtapishmi huañuchircacuna. Tucuimantaca quimsa chunga shuj jatun mandajcunatami huañuchircacuna.