DANIEL 6 - Quichua Chimborazo Bible

Leoncunapaj jutcupi Danielta shitashcami

1Darioca pai mandacun tucui llajtacunata alli mandangapajca 120 satrapacunata churajpi alli cana cashcata ricushpami tucui llajtacunapi churarca.

2Satrapacunata mandachunca quimsa mandajcunatami churarca. Chai quimsa mandajcunapuramanta shujca Danielmi carca. Satrapacunaca paicuna imalla rurashcataca chai quimsa mandajcunamanmi ricuchina carca. Jatun mandajca imapipish paita ama llaquichichunmi chashna churarca.

3Danielca tucuimanta yalli espíritu paipi cashcamantami satrapacunatapish, jatun mandaj churashca mandajcunatapish yalli yachaj ricurirca. Chaimi jatun mandajca Danieltaca tucui llajtacunata mandaj cachun churanata yuyacurca.

4Chaimi chai ishqui mandajcunapish, satrapacunapish Danielta ima shinapish juchachingapaj pai ima shina mandajta chaparacurcacuna. Ashtahuanpish paicunaca ima juchachinata, ima mana allita mana japircacunachu. Danielca tucui imatapish cashcata ruraj cajpimi, paipica ima mana allitapish, ima juchachinatapish mana japircacuna.

5Shina cajpimi chai mandajcunaca: “Cai Danieltaca pai mandacunpica ima mana allitapish, ima juchachinatapish mana japishunchu. Ashtahuanpish paipaj Taita Dios mandashcacunallapimi japi tucushun” nircacunami.

6Shina nishpami mandajcunapish, satrapacunapish tandanacushpa jatun mandajpajman rishpaca cashna nircacuna:

–¡Jatun mandaj Dario, cambaj causaica huiñaita cashca cachun!

7Can churashca tucui mandajcunapish, juezcunapish, satrapacunapish, mandajcunapish, soldadocunata mandajcunapish tandanacushpami cashna mandashcata churashpa pajtachichichuntaj nishpa yuyarinacurcanchij. Maijanpish cunanmanta manaraj quimsa chunga punlla tucujpi mana can jatun mandajllata adorashpa ashtahuanpish shujtaj diosta, mana cashpaca cambaj randica shujtaj runata adorajtaca, leoncunapaj jutcupi shitashca cachun nishpa can jatun mandaj mandachunmi shamunchij.

8Jatun mandajlla cai mandashcataca can allimi nishpa pi ama shujtajyachichun firmapai. Chashna rurajpimi cai mandashcataca Media llajta, Persia llajta mandashcapi tiyaj shinallatataj mana anchuchinga– nircacunami.

9Chaimi jatun mandaj Darioca chai mandashcaca chashnataj cachun nishpa firmarca.

10Chashna mandashcataca allimi, chashnataj cachun nishpa jatun mandaj firmashcata yachashpami Danielca, paipaj huasiman yaicushpaca, pai ima shina mañaj cashca shinallataj Jerusalén ladoman ricuna ventanata pascashpa, punllapi quimsa cutin paipaj Taita Diospaj ñaupajpi cungurishpa, mañashpa pagui nirca.

11Chai mandajcuna tandanacushpa rishpaca Danieltaca paipaj Taita Diosman mingarishpa, mañacujtami japirca.

12Chaimi chai mandajcunaca jatun mandajpajman rishpa, pai churashca mandashcata yuyachishpa cashna nircacuna:

–Maijanpish cunanmanta manaraj quimsa chunga punlla tucujpi mana can jatun mandajllata adorashpa ashtahuanpish shujtaj diosta, mana cashpaca cambaj randica shujtaj runata adorajtaca, leoncunapaj jutcupi shitashca cachun nishca mandashcapimi chashnataj cachun nishpa firmarcangui. ¿Chaitaca yuyaringuichu?– nijpimi jatun mandajca:

–Ari, chashnatajmi carca. Media llajta, Persia llajta mandashcata shinallataj chaitaca pi mana anchuchi tucunchu– nircami.

13Shina nijpimi, paicunaca jatun mandajmanca cashna nircacuna:

–Judamanta prezu apamushcacunapuramanta caj Danielca, can jatun mandajtaca mana cazunchu. Can chashnataj cachun nishpa churashca mandashcatapish mana cazunchu. Ashtahuanpish punllapi quimsa cutinmari, paipaj Taita Diosta mañan– nircacunami.

14Shina nijta jatun mandaj uyashpaca, yallitaj llaquirishpami Danielta ima shina quishpichinata inti huashicungacama yuyacurcalla.

15Ashtahuanpish chai runacunaca jatun mandajpaj muyundijta shayarishpami:

–Jatun mandajlla, Media llajta, Persia llajta mandashcapica: Jatun mandaj firmashpa imata huillachishcata, imata mandashcataca manataj shujtajyachina cashcatami nicun. Chaitaca canllataj yachanguimi– nircacuna.

16Shina nijpimi jatun mandajca Danielta apaj cachashpa leoncunapaj jutcupi shitachun mandarca. Jatun mandajca Danieltaca:

–Canca cambaj Taita Diospajtaca punllantami rurangui. Cantaca pai quishpichishca cachun– nircami.

17Chaipica shuj jatun rumita apamushpami, jutcu punguta tapachirca. Chai rumitaca jatun mandajca paipaj sortijashuanpish, pai churashca mandajcunapaj sortijashuanpishmi sellashpa churarca. Tucuicuna yuyarinacushpa chaipi shitashcamanta, Danielta ama pi llujshichichunmi chashna rurarca.

18Chai q'uipaca jatun mandajca mandana huasiman rishpami, imata mana micushpa dormij siririrca. Tocanacunapipish mana tocachircachu. Tucui tuta mana dormircachu.

19Cayandijtaca jatun mandajca utcata jatarishpami, leoncunapaj jutcuman utca rirca.

20Jutcuman c'uchuyashpaca, llaquijllata rimashpami Danieltaca cashna nishpa cayarca:

–Causaj Taita Diospajta ruraj Daniel, can punllata paipajta rurana cambaj Taita Diosca ¿leoncunamantaca quishpichircachu imatagari?– nirca.

21Shina nijpimi Danielca jatun mandajtaca cashna nirca:

–¡Jatun mandajlla, cambaj causaica huiñaita cashca cachun!

22Ñucataca Taita Diosca ima millaita mana ruraj cashcatami ricushca. Cambaj ñaupajpipish ima millaita mana rurashcanichu. Chaimantami ñuca Taita Diosca leoncuna ñucata ama micuchun paipaj angelta cachashpa leoncunapaj shimitaca huichcarca– nircami.

23Chaita uyashpaca jatun mandajca Danielmanta jatunta cushicushpami, jutcumanta Danielta llujshichichun mandarca. Danielta jutcumanta llujshichijpica, paipaj Taita Diospi shunguta churajpi paipaj Taita Dios cuidajpi ima mana tucushcatami ricurca.

24Chai q'uipaca jatun mandajca Danielta juchachij mandajcunata pushamushpa paicunapaj huahuacunandij, paicunapaj huarmicunandij leoncunapaj jutcupi shitachun mandajpimi shitarcacuna. Paicuna chai jutcu ucujman manaraj chayajpimi, leoncunaca tullucunata p'aquishpa micurcacuna.

25Chaimi jatun mandaj Darioca, tucui cai pachapi causaj gentecunaman, llajtacunaman, ch'ican ch'ican rimaita rimajcunaman cashna nishpa quillcarca:

“Cancunapica sumaj causai mirarishca cachun.

26Ñucatajmi cancunataca caita mandani: Ñuca mandacun tucui llajtacunapica tucuicuna Danielpaj Taita Diosta alli nishpa manchachuncuna, nishpami cashna nirca:

Paica causaj Taita Diosmi.

Huiñai huiñaita causajmi.

Pai mandanaca manataj chingachishca cangachu.

Pai mandanaca huiñaitami canga.

27Paica quishpichijmi, llaquimanta llujshichijmi.

Paica jahua pachapipish, cai pachapipish ricuchinacunata, mancharinacunata rurajmi.

Paimi Danieltaca quishpichirca.

Leoncunapaj shimimantami quishpichirca” nishpami quillcarca.

28Danielca Darío mandacui huatacunapipish, Persia llajtamanta caj Ciro mandacui huatacunapipish ashtahuan ashtahuan alli pushashpami catirca.