OSEAS 4 - Quichua Chimborazo Bible

Mandaj Dios israelcunata llaquichishcami

1Israelcuna, Mandaj Dios rimashcata uyaichij.

Mandaj Diosca cai llajtapi causajcunataca p'iñarishpami rimacun.

Cai llajtapica cashcata rurajcunapish, llaquijcunapish, Diosta rijsijcunapish mana tiyanchu.

2Ashtahuanpish ari nishcata mana pajtachina, llullana, huañuchina, shuhuana, huainayanami tiyan.

Caishuj chaishuj huañuchinacunami tiyan.

3Chaimantami cai llajtaca achca jatun llaquilla canga.

Cai llajtapi causajcunaca tucuicunami fuerza illajlla tucungacuna.

Sacha animalcuna, huairata purij alasyuj animalcunaca huañungami.

Mama cuchapi causaj chalhuacunacamami huañunga.

4¡Cancunaca maijan mana cunanacuipajmari canguichij!

Tucui cambaj cajcunaca curata juchachina yuyaillamari.

5Chaimanta canca achij punllapimi ñitcaringui.

Tutapica profetandijmi ñitcaringui.

Cambaj mamataca chingachishami.

6Ñuca agllashcacunaca yachai illaj cashcamantami chingachishca carcacuna.

Ashtahuanpish cantaca yachaita yanganchishcamantami ñucapajta ruraj cura canamantaca anchuchisha.

Cambaj Taita Dios mandashcatamari cungarircangui.

Ñucapish cambaj huahuacunataca cungarishami.

7Curacuna ashtahuan mirarijpica ashtahuanmari juchallincuna.

Chaimantami ñucapish paicunata alli ninapaj randica pingaichisha.

8Curacunaca ñuca agllashcacuna juchallishcamanta cushcacunatami micuncuna.

Chaimanta ñuca agllashcacuna ashtahuan juchallichunmi yuyancuna.

9Curacunatapish, ñuca agllashcacunatapish paicuna ima shinami juchallirca chai shinallatajmi rurasha.

Paicuna imata rurashca shinallatajmi pagasha.

10Micungacunami, huijsa jundataca mana micungacunachu.

Huainayangacunami, mana miraringacunachu.

Mandaj Diospajta ruranata saquishcamantami chashna tucungacuna.

11Huainayana, vinota ubyana, llullu vinota ubyana yuyaimi alli yuyaitaca anchuchin.

12Ñuca agllashcacunaca, paicunapaj caspi diostami imatapish tapuncuna.

Paicunamanca caspimi imatapish cutichin.

Paicunataca huainayana yuyailla canami pandachirca.

Yallitaj aicha munaita mana jarcari tucushpami Taita Diosmantaca anchurircacuna.

13Urcucuna puntapimi, animalcunata huañuchishpa cuncuna.

Lomacunapimi inciensota rupachincuna.

Encina yuracuna, álamo yuracuna, olmo yuracuna ucupi maipimi sumaj llandujlla caj ucupimi inciensota rupachincuna.

Chaimi cancunapaj ushushicunaca huainayajcuna tucuncuna.

Cancunapaj nueracunaca huainayancuna.

14Chaimanta cancunapaj ushushicuna huainayajcuna tucujpipish, cancunapaj nueracuna huainayajpipish paicunataca mana llaquichishachu.

Huainayashcahuan causaj huarmicunahuan, millai huarmicunahuan tucushpa animalta huañuchishpa shujtaj dioscunaman cushcamantaca cancunallatajmi chingaringuichij.

Chashnami mana entendij gentecunaca paicunallataj chingaringacuna.

15Rurashcalla dioscunahuan israelcuna chashna huainayajpipish, Judaca ama chashna juchallichun.

¡Cancunaca Gilgalmanca ama yaicuichijchu.

Bet-avenmanca ama huichiyaichijchu!

Imata pajtachishatajmi nicushpapish Mandaj Diosca causacunmi ama nichijchu.

16Israelcunaca quita vaquilla shinami caruyarcacuna.

Chashna cajpica ¿Mandaj Diosca paicunataca malta ovejacunata shina ancho pambapi michingachari?

17Efrainca rurashcalla dioscunamanmi curishca.

¡Paitaca saquichijlla!

18Paicunapaj ubyanaca mana pingashpa millaita ruranamanmi chayachirca.

Huainayanataca mana shaicurcacunachu.

Paicunata mandajcunapish, pingachishca canatami c'uyarcacuna.

19¡Paicunataca huairami paipaj alaspi apanga.

Rurashcalla dioscunaman animalcunata huañuchishpa cushcamantaca pingaimi tucungacuna!