2 CORINTIOS 8 - Quichua Chimborazo Bible

Diospajlla cajcunaman ofrendashcamanta

1Macedoniapi tandanacushca crijcunaman Dios mana c'uyaipajta c'uyashpa, imallata cushcatami huauquicunapish yachaj chayachun nipanchij.

2Paicunaca crijtaj cashcata ricuchij jatun llaqui shamujpipish, achcatami cushicurcacuna. Ashtahuanpish imata mana charishpapish, mana llaquishpa achcata cujcuna carca.

3Paicuna cui tucushca shina, chaita yalli yallitapish cushicushpa cushcataca, ñucallataj ricushcamanta huillajmi cani.

4Jucha illaj cajcunamanca ñucanchijpish cushun nipanchijca nishpa cutin cutin nicujllapimi, cuchun saquircanchij.

5Mana ñucanchij yuyashca shinallachu, ashtahuanpish yallitamari curcacuna. Dios munashca shinami paicunallataj Mandaj Jesusmanraj curircacuna, chai q'uipaca ñucanchijmanpishmi curircacuna.

6Chashnami Titotaca, pai ña callarishca shinallataj cancunapurapipish, cancuna c'uyashpa imalla cushcacunataca tucuringacama tandachichun animachircanchij.

7Cancunaca alli crijcuna, alli yachachijcuna, alli yuyaiyujcuna, imatapish cushicushpa rurana yuyaiyujcuna, ñucanchijta c'uyajcunapishmi canguichij. Chashnallataj cancunaca yallitaj cujcuna caichij.

8Chashna nishpaca, mana mandanichu. Ashtahuanpish shujtajcuna achcata cushicushpa cushcata yachachun, tucui shunguhuan cancuna c'uyashcata ricuchingapajpishmi chashnaca nini.

9Ñucanchijta Mandaj Jesucristo, mana c'uyaipajta c'uyaj cashcataca yachanguichijmi. Paica achcata charij cashpapish, cancunata c'uyashcamantami imata mana charij huajcha tucurca. Pai huajcha tucushcamantami, cancunaca achcata charij tucushcanguichij.

10Cancunapaj allipajmi, caitaca yuyachigrini: Cancunaca, sarun huatamanmi cullquita tandachinataca callarircanguichij. Mana chaita rurashun nircanguichijllachu, ashtahuanpish rurana munaitatajmi charircanguichij.

11Cunanca, cancuna callarichishcataca rurashpa catichijlla. Imallata cui tucushca shina tucui munaihuan pajtachichijlla.

12Maijanpish tucui shunguhuan ima charishcata cujpica, Diosca chasquinllami. Diosca imata mana charishcataca mana mañanchu.

13Caita nishpaca shujtajcunaca charijyachun, cancunaca imapish illajlla tucuchun mana chashna ninichu.

14Ashtahuanpish cancunapish caishujcuna shinallataj cachun nishpami, chashnaca nini. Cunan cancuna paicunapaj ima illashcata cujpica, paicunapish cancunapaj ima illashcataca cungallami. Chashna rurashpami, cancunapish paicuna shinallataj canguichij.

15Cashnami quillcashca tiyacun: “Achcata tandajpish, mana yallitaj charircachu. Shinallataj ashallata tandajpish, mana ashallata charircachu” ninmi.

Pablo cachashcacunami

16Cancuna yuyailla ñuca cashca shinallataj, Titomanpish yuyaita cushcamantami, Diostaca pagui nini.

17Titotaca ripai nishpa ñuca cunajpica, ari rishallami nircami. Paica cancunata ricugrina munaihuan cashcamantaca, tucui shunguhuanmi cancunapajmanca shamucun.

18Alli huillaita huillacushcamanta, tucui llajtacunapi tandanacushca crijcuna alli nishca huauquitapishmi paihuan cachanchij.

19Mana chaillapishchu, ashtahuanpish cushca cullquita apashpa ñucanchijhuan purichunmi, tucui llajtapi tandanacushca crijcunaca paitaca agllarcacuna. Ñucanchijca Mandaj Jesusta jatunyachingapaj, cancuna alli shunguhuan cushcata ricuchingapajpishmi chashna alli cuidashpa apacunchij.

20Cai achca cullquita cushcacunata tandashcataca, pipish ama yanga juchachichun nishpami, chashna alli cuidashpa apacunchij.

21Ñucanchijca mana Mandaj Jesuspaj ñaupajllapi ashtahuanpish, runacunapaj ñaupajpipish, pi mana juchachishca cangapajmi alli apana yuyailla ruracunchij.

22Paicunahuanca, shujtaj huauquitapishmi cachanchij. Paica, imapipish chai yuyailla pajtachij cashcatami tauca cutin ricurcanchij. Cancunapi shunguta churashcamantaca cunancarin ashtahuan chai yuyaillami tucun.

23Titoca ñucahuan purij cashcamanta, cancunapaj allicunata rurajmi. Caishuj huauquicunaca Cristota jatunyachingapaj tandanacushca crijcuna cachashca huillajcunami.

24Maipipish caj tandanacushca crijcunamanca, c'uyaj cashcata ricuchichij. Chashna cajpimi, ñucanchij cancunata allicunami nishcamantaca jatunyarishun.