JEREMÍAS 5 - Quichua Chimborazo Bible

Judá runacunataca cusata shitaj huarmihuan ch'imbapurashcamanta Jerusalenpi causajcunaca tucuicuna millai cashcamanta

1“Shuj runallapish cashcata ruraj, ima millaita ruranata mana munaj tiyangapishchari. Tucui Jerusalén pueblo callecunapi, tandanacuna pambacunapi callarishpa mashcashpa ricuichigari. Shuj runallapish chashna tiyajpica, Jerusalentaca mana llaquichishachu.

2Maijancuna: Mandaj Dios ricucunmi nishpapish, yangallami chashna nincuna” ninmi.

3Mandaj Dioslla, canca mana llullaj cachunmari munangui. Paicunaca macajpipish, mana nanachincunaca. Imata jarcashpa llaquichichunpish, manataj munancunaca. Rumita yalli sinchi shungucunamari tucuncuna. Manataj cambajman tigrarishun nincunachu.

4Shina cajpipish ñucaca cashnami yuyarcani: Cai huajcha runacunallami yuyai chingarishca shina causacungacuna. Caicunallamari paicunata Mandaj Dios mandashcatapish, ima shina causachun pai munashcatapish mana yachangacuna.

5Cunanca yachajcunapajman rishpa paicunata rimasha. Paicunaca paicunata Mandaj Dios mandashcatapish, ima shina causachun pai munashcatapish yachangacunami yuyarcanimi. Ashtahuanpish paicunapish yugota p'aquircacunami, yugushca angucunata p'itircacunami.

6Chashna cashcamantaca, sachamanta león llujshishpa huañuchingatajmi. Shitashca pambapi causaj atuj shamushpa tucuchingatajmi. Leopardomari paicunapaj pueblo muyundijta chapanga. Maijanpish pueblomanta llujshijpica, japishcahuan micungallami. Paicunallataj Diosta yallitaj mana cazushpa, paimanta ashtahuan ashtahuan caruyashcamantamari chai llaquica japinga.

7“Paicunapaj huahuacunapish ñucamanta anchurishpami, manapish Dios cajta ñucanchij Dios nincuna. Ñuca paicunaman sajsajta carashpa charijpica, ashtahuanpish paicunaca chai dioscunahuanmari huainayancuna. Tandanacushpamari huainayaj huarmicunapaj huasiman rincuna. Chai juchamantaca ¿maitataj mana ima nishpa saquishallari?

8Huirayashca caballocuna huacarishpa caticuj shinami, shujtajcunapaj huarmicunata catincuna.

9Cashna juchamantaca ¿manachu llaquichina cani imatagari? Chashna millai runacunataca ¿manachu p'iñarishpa ñacachisha imatagari? Mandaj Diostajmi chashna nini.

10Cai pueblo muyundij pircacunaman huichiyashpa t'unichij. Chai pircacunaca mana ñucapajchu, jahua umamanta callarishpa urmachichijlla. Shina cashpapish ama tucui chingachichijchu.

11Israelcunapish, Judá runacunapish paicunapaj yuyaimantatajmi ñucataca mana cazurcacuna” ninmi Mandaj Diosca.

Judá runacunataca yantata rupachij shinami llaquichisha nishcamanta

12Mandaj Diosca mana tiyanchu nishpami cashna nincuna: “Mandaj Diosca mana tiyanchu. Ñucanchijtaca ima llaqui mana japingachu. Pi mana espadahuan huañuchingapaj shamungachu, yaricaipish mana tiyangachu.

13Ashtahuanpish Dios ima nishcata huillajcunarajmi huaira shina chingaringacuna. Paicunaca manapish Dios huillanaman cachajpimi, imatapish llullancuna. Chaimantami paicunaraj, paicuna huillashca shinallataj chingaringacuna” nincunami.

14Chaimantami tucuita Mandaj Diosca cashna nin: “Paicuna chashna nishcamantaca, cunanca ñuca nishcata can huillashca shimicunataca ninatami rurani. Paicunataca yantatami rurani. Cai shimicunaca paicunataca, yantata shinatajmi tucuchinga” ninmi.

15Mandaj Diosca cashnapishmi nin: “Israelcunalla, cancunata llaquichichunca caru llajta runacunatami pushamugrini. Chaicunaca ñaupamanta causaj, fuerzasapa jatun runacunami. Cancuna mana uyashca rimaita rimajcunapishmi. Paicuna imata rimajpipish, imata nicushcataca mana yachanguichijchu.

16Paicunaca tucuicuna c'ari c'aricunami. Carapi aparishca puntajlla caspicunahuanca pambana jutcucunata jundachijcunami.

17Paicunami cancunapaj chagracunamanta tandashca granocunata, ovejacunata, huagracunata, uvata, higota micushpa tucuchingacuna. Cancunapaj churicunatapish, ushushicunatapish tucuchingacunami. Cancuna shunguta churashca jatun pircayuj pueblocunatapish urmachishpami, espadahuan huañuchishpa chushajta saquingacuna” ninmi.

18Mandaj Diosca caitapishmi nin: “Chai llaqui punllacuna chayamujpipish, tucuitajca mana chingachishachu.

19Chai punllacunapica: Ñucanchijta Mandaj Diosca ¿imamantataj ñucanchijtaca cashna llaquichinchu imamí? ningacunami. Chashna nijpica cashna ningui: Cancunallatajmari Mandaj Diosta saquishpa, cancunaman pai cushca llajtapi shujtajcunapaj dioscunata adorarcanguichij. Chai shinallatajmari cancunaca mana rijsishca runacunata servishpa paicunapaj llajtapi causagringuichij ningui” ninmi.

Mandaj Diosca tucui israelcunata rimashcamanta

20“Caitaca yaya Jacobpaj tucui huahuacunaman yachaj chayachichigari. Tucui Judá runacunaman cashna huillaichigari:

21Shungu illaj ch'ahuanyashca runacuna, cancunaca ñahuita charishpapish, mana ricunguichijchu. Rinrinta charishpapish, mana uyanguichijchu. Cunanca caita uyaichigari:

22Mandaj Diosca cashnami nin: Ñucataca manamari manchanguichijchu, manamari ñuca ñaupajpica chujchunguichijchu. Ñucamari mama cucha maicama canatapish churarcani. T'iyullatamari huiñaita yacu muyundijta tiyachun churarcani. Shina cajpipish, ñuca mandashcamantaca mana pasanchu. Jatun huairahuan yacu huajiashpa jatarishpapish, mana maitapish rinllachu. Mana chai t'iyumanta pasanchu.

23Ashtahuanpish cancunaca llulla, mana cazuj millai shungucunami canguichij. Ñucamanta anchurishpa maitapish ringuichijllami.

24Cancunapaj shungupica: Cunanca ñucanchijta Mandaj Diosta manchashpa causashunchij. Paimari punta tamyatapish, q'uipa tamyatapish tamyana punllacunapitaj cachan. Chagracuna tandana tucuchunpish paimari usyachin ninallatapish mana yuyaringuichijchu.

25Cancuna chashna millaicuna tucushcamari chai allicuna shamunata jarcarca. Cancunapaj juchallatajmari chai allicunataca cancunamanta anchuchirca nichigari.

26Ñuca agllashcacunapurapimari, ñucata mana manchajcuna tiyan. Linchita churaj shinamari caishujcunataca tucuchincuna. Ima shinapish chapashpami, pitapish urmachincuna.

27Umashpa quichushpami, jatun charijcuna tucuncuna. Chashna japishca charinacunahuanca, paicunapaj huasica jaulapi pajarocuna jundachishca shinami tiyacun.

28Caruman achij nicujtami huirayancuna. Chashna millaicuna tucushpami, yallitaj llaquicunata rurancuna. Yaya mama illaj huahuacunapajca, ima allita mana rurancunachu. Huajchacunata llaquichicujpipish, mana mitsancunachu. Ashtahuanpish tucui paicunata quichushcahuanmi charijyancuna.

29Chashna rurashcamantaca ¿manachu llaquichisha imatagari? Chashna millai runacunamanca ¿manachu paicuna chasquina cashcata cusha imatagari? Mandaj Diostajmi chashna nini.

30Cai llajtapica mancharina, mana ricuipaj millaitamari rurancuna.

31Huillajcunapish, llullashpallami huillancuna. Curacunapish, paicuna munashca shinami yachachincuna. Ñuca agllashcacunapish chaitamari munancuna. Chashna cashcamantaca, llaqui chayamui punllaca ¿imatataj ruranguichigari?” ninmi.