ECLESIASTÉS 5 - Quichua Chimborazo Bible

Manaraj alli yuyarishpaca ama caita chaitami Diosman cusha ninguichu

1Diospaj huasiman rishpaca, alli yuyarishpa ringui. Ch'ahuancunaca, Diosman animalta cushpa huañuchingapajllami chaimanca rincuna. Chaillata rurashpaca, mana allita rurashcataca mana yuyarincunachu. Chashna ruranapaj randica, chaipi yachachishcata cazuna yuyaihuan ringui.

2Shimihuan cashpapish, shungullapi cashpapish: “Diospaj imata rurashatajmi” ama ninguichu. Diosca jahua pachapimi tiyacun, canca allpapimi cangui. Paimanca can imata rurai tucushcallata ari ningui.

3Yalli yuyajpica, ima muscuipish shamunllami. Ch'ahuan runaca, imatapish yalli rimarinllami.

4Imata ruranata Diosman ari nishpaca, ama uniyashpa pajtachingui. Paica mana pajtachij upa runacunataca mana ricunachinchu. Paipaj imata rurasha nishcataca pajtachinatajmi cangui.

5Imata rurashami nishca jahua mana pajtachinapaj randica, imata mana shimi llujshinami ashtahuan alli.

6Ama cambaj shimillahuantaj juchayuj tucunguichu. Q'uipataca, Diospajta huillajpaj ñaupajpica: “Pandarishpamari chashna rurashcani” ninguimi. Chashna rurashpaca Diostamari p'iñachingui. Pai p'iñarishpaca can rimashcallamantami, can rurashcacunataca tucui chingachinga.

7Muscucuj shina imatapish yalli yuyacujllapica, yanga yuyaicunapish shamunllami. Yalli yallitapish rimachinllami. Ashtahuanpish canca Diostami manchana cangui.

Allita rurashpa causanata p'aquijcuna cashcamanta

8Maijan llajtapica huajchacunata llaquichicujta, cashcata ruranapaj randica, llaquita ruracujta ricushpaca ama mancharinguichu. Shuj mandajtaca paita yalli caj mandajmi ricucun. Chai mandajcunatapish ashtahuan jatun mandajmi ricucun.

9Ashtahuanpish allpapi p'ucushcaca tucuicunapajllatajmi. Jatun mandajpish, chagracunapimi yuyai causan.

10Cullquita yalli c'uyajca, mashnata charishpapish mana cushicunchu. Charinacunata yalli c'uyajpish chaihuanca, paipaj ima allita mana japinchu. Chaipish yangallatajmi.

11Achcata charijpica, micujcunapish achcallatajmi tiyan. Charinacunayuj runaca, ñahuihuan ricushcallahuanmi saquirin.

12Trabajaj runaca ashallata micushpapish, huijsa pajtajta micushpapish sumajta dorminllami. Ashtahuanpish achca charinacuna tiyashpaca, mana dormijta saquinchu.

13Inti achijyachicun cai pachapica, shungu p'aquirishpa llaquirina mana allitami ricuni. Charinacunata jahuanpi jahuanpi huaquichinaca, quiquinpajllataj llaquita apamunllami.

14Ima mana allicunapi tucuchishpaca, huahuacunamanpish imata mana cushpa, chushaj maquillatami saquincuna.

15Mamapaj huijsamanta lluchulla huacharishca shinallataj, chushajllami pambarincuna. Chushajllami shamuncuna, chashnallatajmi tigrancuna. Paicunapaj tucui trabajomantaca, imatapish mana apancunachu.

16Cai pachamanca chushajllami shamunchij, chashnallatajmi rina tucun. Shaicuita trabajashpa causashcamantaca, imata mana surcurinchu. Chashna tucunaca, nanarina jatun llaquimari. Tucui imapish yangallami.

17Ashtahuantajcarin tucui causaipimi llaquihuan, nanaihuan llaquirishpalla trabajashpa causanchij.

18Ñucaca, inti t'itaipi shaicuita trabajashcahuanca ashalla causaita Dios cushcacamaca, micushpa, ubyashpa cushicunallatami alli cajta ricuni.

19Quiquin alli trabajashcamanta cushicunaca, Diosmantami shamun. Diosmari maijanmanpish achca charinacunata cushpa, chaicunamanta cushicunatapish cushca.

20Diosllataj shungupi cushicuita cushcamantami, paipaj causaimantaca mana yalli yuyarishpa cushicushpa causanlla.