1Llajtacunapi causajcuna, tandanacumuichij.
Uyangapaj c'uchuyamuichij.
Tucui cancuna uyaichigari.
Allpapish, chaipi imalla causajcunapish uyaichigari.
Cai pachapish chaipi imalla tiyajcunapish uyaichigari.
2Mandaj Diosca p'iñarishcamari.
Tucui llajtacunahuanmari p'iñarishca.
Tucui llajtacunapaj soldadocunahuanpishmari p'iñarishca.
Tucuchingamari, huañuchijcunapaj maquipimari churanga.
3Chaipi huañushcacunaca shitashcamari saquiringa.
Chai aichacunaca manchanayajtami ashnanga.
Urcucunaca chaicunapaj yahuar tapashcami canga.
4Jahua pachapi imalla tiyajcunapish, yacuyangami.
Jahua pachaca, quillcana cara pillurij shinami pilluringa.
Jahua pachapi imalla tiyajcunaca, uva p'anga urmaj shina, higo p'anga urmaj shinami urmanga.
5Ñuca espadaca jahua pachapimi yahuarsapa tucunga.
Ñuca llaqui tucushca canman ninapaj cashca Edom llajta jahuamanmi uriyamunga.
6Mandaj Diospaj espadaca, yahuarhuan junda, huirahuan jundami.
Malta c'ari ovejacunapaj, chivocunapaj yahuarpi pambashca shina, carnerocunapaj riñón huirapi pambashca shinami canga.
Mandaj Diosca Bosra pueblopica sacrificiotami ruranga.
Edom llajtapica achca gentecunatami huañuchinga.
7Paicunahuanca búfalo huagracunapish, c'ari huagracunapish, bizicunapishmi huañunga.
Paicunapaj llajtaca chai yahuarcunahuanmi junda canga.
Ñutu allpacunapish chai huiracunahuan jundami canga.
8Sión urcupi causajcunata llaquichishcamantaca Mandaj Diosca paicunatapish llaquichina punllapimi llaquichinga.
Mandaj Diosca paicunatapish tigra llaquichina huata chayamujpimi llaquichinga.
9Edom llajta huaicu yacucunaca, breami tucunga.
Ñutu allpaca azufremi tucunga.
Paicunapaj llajtaca breahuan rupacujmi tucunga.
10Tutapish punllapish mana huañungachu.
Cushnipish llujshicungallami.
Huahua huahuacunacama shitashcami saquiringa.
Chaitaca manataj nunca ñanpi puringachu.
11Chai llajtataca tucuchij cordelta chutashpami tucuchinga.
Chushajta saquij nivelhuan nivelashpami chushajta saquinga.
Chai llajtataca pelicanocuna, erizocunallami dueño canga.
Lechuzacuna, cuervocunallami chaipica causacungacuna.
12Jatun mandajcuna nishca cashpapish mandana illajllami cangacuna.
Jatun nishcacunapish imata mana rurai tucuipajcunallami canga.
13Mandajcuna mandashpa tiyana huasicunapica cashacunami huiñanga.
Paicunapaj muyundij pircacunapica, chinicuna, sacha q'uihuacunami huiñanga.
Chai ucucunaca chacal animalcuna causanami tucunga.
Huasi canllaca avestruzcunapaj huahua pollocuna causanami canga.
14Shitashca pambapi causaj manchanana animalcunami hiena animalcunahuan tupanacucungacuna.
Sacha chivocunallami caishuj chaishuj cayanacucungacuna.
Chushijcuna miticunami chaipica canga.
Chushijcunaca paicuna samarinataca chaipimi japishca carca.
15Chushijca chaipi tazinta rurashpa luluncunata huachashpami, huahua pollocunata llujshichishpa paipaj alas ucupi tandachishpa ugllanga.
Angacunapish c'arindij huarmindijmi chaipi tandanacungacuna.
16Mandaj Diospaj librota japishpa alli ricuichij.
Paipaj shimipi nishca shinaca chai animalcunaca shujllapish mana illangachu.
Tucuicunami huarmindij huarmindij cangacuna.
Paipaj shimihuantaj mandashpami, paipaj Espirituhuan tandachirca.
17Paipaj maquihuan cordelta chutashpami maillapi cana cashcapi churarca.
Chaipica paicunapaj cachunmi huiñai huiñaipaj japinga.
Huahua huahuacunami chaipi causangacuna.
Who We AreWhat We EelieveWhat We Do
2025 by iamachristian.org,Inc All rights reserved.
