OSEAS 7 - Quichua Chimborazo Bible

Israelcuna millaita rurashcapish c'ariyashcapish

1Israelta ñuca jambicujpica, ashtahuanpish Efrainpaj millaita rurashcami ricurirca.

Samariapi causajcuna mana allita rurashcami ashtahuan ricurirca.

Paicunaca umanatami alli yachancuna.

Huasiman yaicushpa shuhuanatami yachancuna.

Ñanta ricujcunata quichunatami yachancuna.

2Paicuna millaita rurashcacunata ñucaca yuyaipi charicuna cashcataca mana yuyancunachu.

Ashtahuanpish paicuna millaita rurashcacunallatajmi ñuca ñaupajpica tucuita ricuchicunga.

3Paicuna millaita rurashcahuanmi jatun mandajtaca cushichincuna.

Paicuna llullashcahuanmi mandajcunataca cushichincuna.

4Tucui paicunami huainayajcuna.

Rupajyachishca horno shinami.

Tandata ruraj harinata chapushpa chai chapu p'unguilliringacama samarij shinallami pararincuna.

5Ñucanchij jatun mandajpaj fiesta punllapica, pai churashca mandajcunaca vinota ubyashpami ungurcacuna.

Jatun mandajpish chashnallataj cashpami paita chanzata ruracujcunapajman maquita chutarca.

6Hornota rupachijca tucui tutapaj yantata churashpami, dormij siririn.

Hornoca cayandij tutamantapajca, yallitaj rupaj pucanicujmi pacarin.

Chai shinallatajmi paicunapish, paicuna rurasha nishcata rurangapaj yuyarishpa pacarin.

7Tucui paicunami rupacuj horno shina yallitaj millaita ruranahuan junda tucuncuna.

Chashna cashpami paicunapaj juezcunataca millpuncuna.

Tucui paicunata jatun mandajcunaca tucuicunami urmashcacuna.

Paicunapurapi ñucata mañajca pi mana tiyanchu.

8Efrainca shujtaj gentecunahuanmi chagrurishca.

Efrainca shuj ladollata cusashca tortilla shinami.

9Mana rijsishca gentecunami paipaj fuerzataca millpushcacuna.

Chaitaca paica mana yachanchu.

Paica ñami puzu uma tucushca.

Chaitaca mana yachanchu.

10Israelcuna jatun tucushcaca paicuna ima shina cashcatami ricuchinga.

Chashna cashpapish paicunaca Mandaj Diospajmanca mana cutirinchu.

Paicunapaj Taita Diostaca mana mashcanchu.

11Efrainca yuyai illaj paloma shinami.

Ima alli cashcata, ima mana alli cashcata mana yachanchu.

Egiptota ayudata mañashca jahuapish, Asiriahuanmi tandanacun.

12Paicuna chaiman ricujpimi, paicunapaj jahuapica ñuca linchita shitasha.

Jahuata purij alasyuj animalcunata shinami urmachisha.

Paicunapaj tandanacuicunapi huillachishca shinallatajmi llaquichisha.

13Ñucamanta anchurijcunalla ¡aij, imachari tucunga!

Ñucata c'ariyashcamantaca paicunapaj jahuamanca tucuchij llaquimi shamunga.

Ñuca quishpichisha nijpipish paicunallatajmi ñucata c'ariyashpa llullata rimancuna.

14Camapi siricushpa, aij nishpa capariricushpapish ñucataca mana tucui shunguhuan mañarcacunachu.

Trigota, vinota cuchun mañangapajllami tandanacurcacuna.

Chashnami ñucataca p'iñachincuna.

15Paicunataca ñucamari yachachircani.

Ñucamari sinchi rigracunayujta rurarcani.

Chashna jahuamari ñucata p'iñachingapajlla millaita ruranata yuyarinacuncuna.

16Cutirircacunami.

Jahua pacha Taita Diosmanca mana cutirircacunachu.

Huishtu arco shinami tucurcacuna.

Paicunata mandajcunaca espadapimi huañurcacuna.

Millai shimicunata rimashcamantami chashna tucurca.

Chashna cashcamantami Egipto llajtapica, paicunataca chanzata rurangacuna.