2 CRÓNICAS 36 - Quichua Chimborazo Bible

Judá llajtata Joacaz mandashcami(2 R 23.31-35)

1Josías huañujpica, Judá llajtapi causajcunaca, paipaj churi Joacaztami Jerusalenpica, paipaj randi jatun mandaj cachun churarcacuna.

2Joacazca Judá llajtata mandai callarinapajca, ishqui chunga quimsa huatayujmi carca. Paica quimsa quillallatami, Jerusalenpi mandarca.

3Paitaca Egipto llajtata jatun mandajmi, Jerusalenpi mandacunmanta anchuchirca. Chashna anchuchishpaca, Judá llajtapi causajcunataca, patsaj talento cullquita, shuj talento curitami huatanta impuestota pagachirca.

4Egipto llajtata jatun mandajca Judá llajtata, Jerusalenta jatun mandaj cachunca Joacazpaj huauqui Eliaquimtami churarca. Paitaca Eliaquim cajpipish, Joacim shutitami shutichirca. Paipaj huauqui Joacaztaca, Necaomi Egipto llajtaman prezu aparca.

Judá llajtata Joacim mandashcami(2 R 23.36–24.7)

5Joacimca Judá llajtata mandai callarinapajca ishqui chunga pichca huatayujmi carca. Paica chunga shuj huatatami Jerusalenpi mandarca. Paica paita Mandaj Diospaj ñaupajpica, millaitami rurarca.

6Babilonia llajtata jatun mandaj Nabucodonosorca, paihuan macanacungapaj huichiyashpami, cadenacunahuan huatashpa Babilonia llajtaman prezu aparca.

7Babilonia llajtata jatun mandaj Nabucodonosorca, Mandaj Diospaj huasipi tiyaj charinacunamanta achcata apashpami Babiloniapi, paipaj diospaj huasipi churarca.

8Joacim paipaj causaipi ashtahuan imallata rurashcata, yallitaj millananata rurashpa Diosta p'iñachishcata, pai imalla llaqui tucushcata ashtahuan yachasha nishpaca Israel llajtata jatun mandajcuna, Judá llajtata jatun mandajcuna imallata rurashcata quillcashca libropimi ricuna. Joacim huañujpica, paipaj randica paipaj churi Joaquinmi mandarca.

Joaquintaca Babiloniaman prezu apashcami(2 R 24.8-17)

9Joaquinca, Judá llajtata mandai callarinapajca pusaj huatayujmi carca. Paica quimsa quilla, chunga punllallatami Jerusalenpi mandarca. Paica Mandaj Diospaj ñaupajpica, millaitami rurarca.

10Babilonia llajtata jatun mandaj Nabucodonosorca, ña huata tucucujpica, Mandaj Diospaj huasipi tiyaj ashtahuan sumaj charinacunandijmi, Joaquintaca Babilonia llajtaman apachun apajcunata cacharca. Paita apashpaca, Joaquinpaj huauqui Sedequiastami Judá llajtatapish, Jerusalén pueblotapish jatun mandaj cachun churarcacuna.

Judá llajtata Sedequías mandashcami(2 R 24.18-20; Jer 52.1-3)

11Sedequiasca, Judá llajtata mandai callarinapajca ishqui chunga shuj huatayujmi carca. Paica chunga shuj huatatami Jerusalenpi mandarca.

12Sedequiasca paita Mandaj Diospaj ñaupajpica, millaitami rurashpa rurarca. Mandaj Dios ima nishcata huillaj Jeremiasca, paimanca Diosllataj huillachun nishcatami huillaj carca. Shina cajpipish, paica mana llaquirircachu.

13Jatun mandaj Nabucodonosortapish c'ariyarcami. Chai jatun mandajca paihuan tandalla canata shuj yuyailla cachunca, Diospaj shutipimi paitaca ari nichishca carca. Chashna ari nishca jahuami, mana pajtachirca. Shinallataj ch'ahuan shungu tucushpami, israelcunata Mandaj Diosmanca manataj cutirisha nirca.

14Chashnallataj Judá llajtapi causajcunapish, curacunapish, tucui shujtajcunapishmi Diosta manataj cazushpa paimanta anchurircacuna. Tucuicunami shujtaj llajtacunapi causajcuna shinallataj ashtahuan millaita rurarcacuna. Diospaj huasillapitajmi jatun millaita rurarcacuna. Jerusalenpi caj chai huasitaca, Mandaj Diosmi ñaupamanca paillata yuyarinapaj cachun chasquishca carca.

15Paicunapaj ñaupa yayacunata Mandaj Diosca, pai agllashca cashcamanta paicunatapish, paipaj huasitapish llaquishcamantami, paicuna mana allita ruracujpica, pai ima nishcata huillajcunahuan cutin cutin huillachishpa jarcacurcalla.

16Chashna huillajpipish paicunaca, Dios cachashca huillajcunataca asircacunami. Paipaj shimicunata p'iñashpami, pai ima nishcata huillajcunataca chanzata rurashpa asircacuna. Mandaj Diosca, pai agllashcacuna chashna rurashpa yallitaj p'iñachijpimi, mana jarcai tucuipajta p'iñarishpa llaquichirca.

Diospaj huasita urmachishpa judacunata prezu apashcami(2 R 25.8-21; Jer 39.8-10; 52.12-30)

17Mandaj Diosca yallitaj p'iñarishca cashpami, Judapi causajcunata llaquichichun caldeocunata jatun mandajta cacharca. Pai shamushpami q'uipa huiñaicunataca, Diospaj huasi ucullapitaj espadacunahuan huañuchirca. Mosocunatapish, solteracunatapish, yuyajcunatapish, ungushcacunatapishmi tucuicunata chai jatun mandajpaj maquipi churarca.

18Mandaj Diospaj huasipica uchillapish, jatunpish achca charinacunami tiyarca. Chai tucui charinacunatapish, chai huasillapitaj tiyaj curita, cullquitapish, jatun mandajpaj curita, cullquitapish, caishuj mandajcunapaj curita, cullquitapishmi chai jatun mandajca paipaj llajtaman aparca.

19Shinallataj Diospaj huasitapish rupachircacunami, Jerusalén muyundij jatun pircatapish urmachircacunami. Mandashpa tiyana huasicunatapish ninata japichishpa tucui rupachircacunami. Chai huasicunapi imalla ashtahuan alli tiyashcataca, tucuimi tucuchircacuna.

20Chashna rurashca q'uipami, mana huañuchishcacunataca, Babilonia llajtaman prezu aparcacuna. Chai llajtapimi Judá llajtamanta apashcacunaca, Nabucodonosorpajtapish, paipaj churicunapajtapish rurashpa huatashca shina causarcacuna. Persia llajtapi causajcuna chai llajtata mishashpa mandangacamami, chashna causarcacuna.

21Mandaj Diosca, paicunata chashna llaquichinataca, Jeremiashuanmi huillachishca carca. Chaica chashnatajmi pajtarca. Paicunata chai llajtaman apajpimi Judá llajtaca samarirca. Paicuna chai llajtapi canchis chunga huatacunata prezu causacui tucui huatacunami, allpacunaca sumajta samaricurcalla.

Ciroca judiocunataca quiquin llajtaman tigrachun mandashcami(Esd 1.1-4)

22Mandaj Diosca Jeremiasman pai huillachishcata pajtachingapajca, Persia llajtata jatun mandaj Ciro chai llajtata mandai callari huatami jatun mandaj Ciroman yuyaita cujpi, paica huillajcunata cachashpa pai mandacun tucui llajtacunapi cashna huillachirca:

23“Persia llajtata jatun mandaj Ciroca cashnami nin: Jahua pacha Mandaj Diosmi tucui cai pachata mandanacunataca ñucaman cun. Judapi caj Jerusalenpipish shuj huasita shayachichunmi mandan. Chaimanta cancunapurapi Dios agllashcacuna maijan tiyajpica Mandaj cambaj Diosca paihuan cachun. Paica Judapi caj Jerusalenman huichiyachunlla”.