1 CRÓNICAS 28 - Quichua Chimborazo Bible

Salomonca paipaj yaya Davidpaj randi mandashcami

1Davidca, israelcunata tucui mandajcunatami Jerusalenpi tandachirca. Aillucunata mandajcunata, jatun mandajpajta rurangapaj quillanta shamuj soldadocunata mandajcunata, 1.000 soldadocunata, patsaj soldadocunata mandajcunatapish, paipaj haciendapi cuidajcunata mandajcunatapish, paipaj imalla charishcacunata, paipaj churicunapaj imalla charishcacunata cuidajcunata mandajcunata, paipaj tucui soldadocunamanta yalli alli nishca ashtahuan c'ari c'ari soldadocunatapishmi tandachirca.

2Chaipi jatun mandaj David shayarishpaca: “Ñuca huauquicuna, ñuca llajtacuna caita uyaichij: Ñucaca Mandaj Dios ñucanchijhuan ari ninacushca quillcata huaquichina arcata ama maiman cuyuchingapaj, ñucanchij Dios paipaj chaquita chaipi churachunpishmi, shuj huasita shayachisha nircani. Chai huasita shayachingapajca ñami tucuita tandachircani.

3Ashtahuanpish ñucataca Taita Diosmari: Canca jatun macanacuicunata rurashpa achca yahuarta jichaj cashcamanta ñuca shuti chaipi cachun huasitaca mana canchu shayachingui nirca.

4Shina cajpipish, israelcunata Mandaj Taita Diosca ñuca yayapaj tucui huasi ucupuramanta agllashpami huiñaipaj israelcunata jatun mandaj cachun churahuashca. Chashna rurangapajca Judá aillutamari tucui Israelcunata mandaj cachun agllashca. Judá aillumantaca ñuca yayapaj huasi ucupuracunatamari agllarca. Ñuca yayapaj huasi ucupuramantaca tucui israelcunata jatun mandaj cachunca ñucatamari munashca.

5(Mandaj Diosca ñucamanca, achca churicunatami cuhuarca). Cunanca chai tucui ñuca churicunapuramantaca, israelcunata mandanapi tiyarichunca ñuca churi Salomontamari agllashca.

6Mandaj Diosca ñucataca: Cambaj churi Salomonmi ñuca huasitapish, chai huasi canllacunatapish ruranga. Paica ñuca churimi canga. Ñucapish paipaj yayami casha.

7Ñuca mandashcacunata, pajtachinguitaj nishcacunata tucui fuerzahuan cunan punllacama pajtachicuj shina pajtachijpica, paipaj mandanataca pi mana anchuchipajtami huiñaipaj churasha nircami.

8Cunanca Mandaj Diospajlla tandanacushca cai tucui israelcunapaj ñaupajpi, Mandaj Dios uyacunpimi cashna nini: Cai sumaj llajtamanta ama anchuchichun, cancunapaj huahua huahuacunapajpish huiñaipaj herenciata saquingapajca, Mandaj Dios ima shina causanata yachachishpa mandashcatami alli ricurashpa pajtachina canguichij.

9Salomón, ñuca huahualla. Cambaj yayapaj Diosmantaca pajta anchuringuiman. Tucui shunguhuan tucui munaihuan paipajta rurangui. Pai Mandaj Diosca tucuicunapaj shunguta callarishpami ricun. Imata ruranata yuyacushcatapish tucuitami yachan. Can paita mashcashpaca japinguimi. Can paimanta anchurijpica paipish cantaca shitashcatami saquinga.

10Riqui, Mandaj Diosmi cantaca paipajlla ch'icanchishca ucupi cachun huasita rurachun agllarca. Chaimanta cunanca tucui fuerzahuan rurailla” nircami.

11Chashna nishpami Davidca, paipaj churi Salomonmanca, Diospaj huasi canlla ladoman caj ucucunata, huaquichina ucucunata, Diospaj huasi muyundijta shayachina altibajoyuj ucucunata, Diospajlla huasi ucutapish juchamanta cushca yahuarta tsirapana ucutapish ima shinalla rurana cashcata dibujashcata curca.

12Shinallataj Mandaj Diospaj huasi canlla muyundijpi ima shinalla rurana cashcata, Diospaj huasi muyundij ucucunapi ima shinalla rurana cashcata, Diospaj huasiman apamushcacunata huaquichina ucucunata ima shinalla rurana cashcata, Diospajlla ch'icanchishcacunata huaquichinapaj ima shinalla rurana cashcata yuyarishcata dibujashcatami curca.

13Mandaj Diospaj huasipi Diospajta rurangapaj huashan huashan shamuj curacunapaj, levitacunapaj ucucunatapish, Mandaj Diospaj huasipi Diospajta rurangapaj imalla charinacunata huaquichina ucucunata rurachunpishmi dibujashcata curca.

14Shinallataj Diospaj huasipi Diospajta rurangapaj tucui laya charinacunata rurachunpish curita, cullquitaca pajtatami pizashpa curca. Curimanta rurana cashcapajca curita, cullquimanta rurana cashcapajca cullquitami pizashpa curca.

15Candelerocunatapish, chaipi churana lamparacunatapish rurana curitaca pizashcatami curca. Cullqui candelerocunata, chaipi churana lamparacunata rurachunpish cullquitaca, jatun candelerocunapajpish, uchilla candelerocunapajpish mashna yaicunata pizashcatami curca. Cada candeleropi mashna lámpara tiyanata ricushpami, pajtanata pizashpa curca.

16Shinallataj Diospajlla ch'icanchishca tandata churana mezacunata rurachunpish, cada mezapaj mashna yaicuna cashcata pizashpami curita curca. Cullqui mezacunata rurachunpish cullquitaca pizashcatami curca.

17Trinchecunatapish, lavacaracunatapish, tazacunatapish, copacunatapish curillamantataj rurachunmi ashtahuan alli curita pizashcata curca. Curi tazacunapajpish, cullqui tazacunapajpish cada tazapaj mashna yaicunatami curitapish, cullquitapish pizashcata curca.

18Chashnallataj inciensota rupachina altarta rurachunpish, Mandaj Dioshuan ari ninacushca quillcata huaquichina arcata alashuan tapashpa tiyaj querubincunapaj carrota rurachunpish, tucuimanta yalli alli curitami pizashpa curca.

19Shina nishpaca Davidca: “Tucui caicunata ima shinalla ruranataca, Mandaj Diosmi paipaj maquihuan rurashpa ñucamanca ricuchirca. Paimi ima shinalla ruranata alli yachachishpa ñucaman curca” nircami.

20Davidca paipaj churi Salomontaca cashnapishmi nirca: “Ama mana rurai tucushachu yuyangui. Tucui fuerzahuan rurai callarilla. Ama manchangui. Ama shaicungui. Mandaj Diosca canhuanmi canga. Mandaj Dios ñuca Diosca paipaj huasita tucui can rurangacama cantaca mana saquingachu. Canmantaca mana anchuringachu.

21Mirga mirga ch'icanchishca curacunapish, levitacunapish Diospaj huasiman huashan huashan shamushpa Diospajta rurangapajca cambaj maquipimi. Paicunaca tucui imata ruranapipish canhuanmi canga. Shinallataj tucui imatapish ruranata yachaj, alli yuyaiyujcunapish tiyanmi. Tucui mandajcunapish, tucui israelcunapish tucuicunami can mandashcata rurangacuna” nircami.