EZEQUIEL 27 - Quichua Chimborazo Bible

1Mandaj Diosca ñucamanca cashnapishmi nirca:

2“Huañujlla aichayuj runalla, Tiro pueblomantaca yupashpa yupashpa huacayari.

3Mama cucha yacu uripi tiyaj pueblocunahuan c'atunacushpa, randinacushpa causaj Tiro pueblomanca cashna ningui: Mandaj Jatun Diosmi cashna nin: Tiro pueblolla, canca tucuimanta yalli sumajmari cani nircanguimi.

4Canca mama cucha chaupipimi tiyacungui. Canta rurajcunami sumajta rurashpa tucuchircacuna.

5Cantaca Senir urcumanta haya caspicunahuanmi rurarcacuna. Barcopi shayachina jatun caspita rurangapajpish, Líbano urcumantami cedro yurata apamurcacuna.

6Barcota purichina caspicunatapish, Basán llajtamanta encina caspicunatami rurarcacuna. Tiyarinacunataca, Quitim llajta c'uchumanta apamushca pino caspicunapi mirga marfilcunata churashpami rurarcacuna.

7Barcota purichingapaj huairata japina linsoca, Egipto llajtapi bordashca alli linsomi carca. Toldotapish, mama cucha uripi caj Elisa pueblomanta azul linsohuan, amsa puca linsohuanmi rurarca.

8Cambaj barcota purichij runacunaca Sidón shuti, Arvad shuti pueblocunapi causajcunami carca. Tiro pueblolla, barcota purichijcunaca yachaisapa runacunami carca. Paicunami barcocunataca purichircacuna.

9Barcota ruranata alli yachaj yuyaj runacunapish, barco chijtarishcacunata sumajta allichijcunapish Gebal pueblomantami carcacuna. Tucui barcoyujcunapish, chaicunata purichijcunapishmi c'atungapaj randingapaj shamurcacuna.

10Cambaj soldadocunaca, Persia llajtamanta, Ludpaj huahua huahuacunapuramanta, Futpaj huahua huahuacunapuramanta macanacunata alli yachajcunami carca. Canmanca escudocunatami apachircacuna, fierro cascocunatami churachircacuna. Paicunamantami canca achij nicuj cangui.

11Shinallataj Arvad pueblomanta runacunaca cambaj soldadocunandijmi, pata jahuacunapi muyundijta shayarircacuna. Torrecunapica gamadeocunami chapacurcacuna. Paicunapaj escudocunataca cambaj muyundij pirca jahuacunapimi huarcurcacuna. Chashnami paicunaca cantaca sumajta allichircacuna.

12Tarsis pueblomanta c'atujcunapish, randijcunapish can yallitaj charij cashcamantami, cullquihuan, fierrohuan, estañohuan, plomohuan cambaj c'atuna plazacunapi randinaman shamurcacuna.

13Javán shuti, Tubal shuti, Mesec shuti pueblocunamanta c'atujcunapish randijcunapish, can imalla charishcacunatami cambaj c'atuna plazacunapica runacunahuan, broncemanta rurashca charinacunahuan randinaman shamurcacuna.

14Togarma llajtapi causajcunapish cambaj c'atuna plazacunapica caballocunahuan, macanacuicunapi alli callpaj caballocunahuan, machocunahuan randinaman shamurcacuna.

15Dedanpaj huahua huahuacunapish canhuanmi c'atushpa, randishpa causarcacuna. Mama cucha yacu uripi causajcunaca, achca c'atunacunatami canmanta japircacuna. Paicunaca marfilhuan, ébano caspihuanmi imatapish randircacuna.

16Edom llajtapi causajcunapish cambaj c'atuna plazacunapica canpi imalla charishcacunataca perlas rumicunahuan, amsa puca linsocunahuan, bordashca churanacunahuan, tucuimanta yalli alli lino linsocunahuan, coralcunahuan, rubíes rumicunahuanmi randinaman shamurcacuna.

17Judá llajtapi causajcunapish, tucui israelcunapish canhuanmi c'atushpa randishpa causarcacuna. Paicunaca cambaj c'atuna plazacunapica Minit shuti, Panag shuti pueblocunamanta trigohuan, sacha chuspi huachashca mishquihuan, aceitehuan, resinahuanmi randijcuna carca.

18Damasco pueblopi causajcunapish, cambaj achca alli imalla charishcacunataca Hesbón pueblomanta vinohuan, yuraj millmahuanmi randircacuna.

19Shinallataj Dan pueblopi causajcunapish, Javán pueblomanta c'atushpa, randishpa purijcunapishmi cambaj c'atuna plazacunapica, labrashca fierrohuan, mirra yacuhuan, mishquijllaman ashnaj huiruhuan randinaman shamurcacuna.

20Dedán pueblopi causajcunaca, carretacunapi churana achca cullqui valij pañocunatami canmanca c'aturcacuna.

21Arabia llajtapi causajcunapish, Cedar pueblomanta mandajcunapish cambaj c'atuna plazacunapica, malta ovejacunahuan, carnerocunahuan, c'ari chivocunahuanmi randinaman shamurcacuna. Cai tucuitami canca randishpa c'atushpa causarcangui.

22Sabá llajtamantapish, Raama pueblomantapish tucuimanta yalli mishquijllata ashnacujcunahuan, tucui laya sumaj rumicunahuan, curihuanmi cambaj c'atuna plazacunapi randinaman shamurcacuna.

23Harán shuti, Cane shuti, Edén shuti pueblocunapi causajcunapish, Sabá shuti, Asiria shuti, Quilmad shuti llajtacunapi causajcunapishmi canhuan imatapish c'atunacungapaj, randinacungapaj ari nircacuna.

24Paicunaca azul churanacunahuan, bordashca churanacunahuan cajón junda sumaj churanacunahuan, cordoncunata sirashca churanacunahuan, cedro caspicunahuanmi can imalla charishcacunataca randircacuna.

25Tarsis pueblomanta achca barcocunami can imalla randishcacunata apamurcacuna. Chaimantami canca yallitaj charij tucurcangui. Mama cucha yacu chaupipica canllamari yallitaj charijyarcangui.

26Barcota purichijcunami cantaca achca yacu chaupiman pusharca. Jatun acapana shamushpami, mama cucha yacu chaupipi cantaca tucui ñuturca.

27Canta llaquichi punllallatajmi can randishcacunatapish, c'atunacunatapish barcota purichijcunatapish, pushajcunatapish, barco chijtarishcacunata allichijcunatapish, c'atujcunatapish, soldadocunatapish, cambaj tucui runacunatapish, mama cucha chaupipi chingachisha.

28Shinallataj yacupi purinata yachajcuna sinchita caparishcata uyashpami, cucha uripi causajcunapish chujchungacuna.

29Caspicunahuan barcocunata purichijcunapish barcocunamanta uriyangacunami. Caspihuan purichijcunapish, mama cuchapi barcota purichijcunapish allpapimi saquiringacuna.

30Canmantaca manchanayajta caparirishpami huacangacuna, uma jahuapipish allpatami churaringacuna, ushpapipish singuringacunami.

31Ajchatapish ruturingacunami, cañamazutami churaringacuna. Canmantaca shungu ucupi nanarishpami, yupashpa yupashpa huacangacuna.

32Paicunaca canta ricushpa llaquirishpami: Mama cucha chaupipi chingarishca Tiro pueblo shinaca pi mana tiyarcachu nishpa, yupashpa yupashpa huacangacuna.

33Jatun barcocunapi apamushca imalla c'atunacunatapish achca llajtacunamanmi c'atushpa cacharca. Llajtata jatun mandajcunataca cambaj charinacunahuan, cambaj c'atunacunahuanmi achcata charijyachircangui.

34Canta mama cucha yacu chaupipi llaquichi punllallatajmi, cambaj c'atunacunatapish, cambaj tucui runacunapish cambaj chaupillapitaj urmangacuna.

35Canta chashna llaqui tucujta ricushpami, mama cucha uripi tiyaj pueblocunapi causajcunapish mancharingacuna. Paicunata jatun mandajcunapish, mancharishpa chujchungacunami. Paicunapaj ñahuicunapish, quillu quillumi tucungacuna.

36Shujtaj pueblomanta c'atujcunapish, can llaqui tucushcata ricushpaca silbangacunami, canca jatun mancharinami tucungui, huiñaipajmi chingaringui” nircami.