1 CORINTIOS 10 - Quichua Chimborazo Bible

Rurashcalla dioscunata adorajcunata sinchita cunashcacunami

1Huauquicuna, ñucanchij yayacunaca tucuicuna p'uyu pacashca cashcata, mama cuchatapish tucuicuna ch'imbashcataca mana yachashca shina cachunca mana munanichu.

2Moiseshuan tandalla cangapajca tucuicunami p'uyupi, mama cuchapipish bautizarircacuna.

3Tucuicunami Dios cachashca micunallatataj micurcacuna.

4Tucuicunami Dios cachashca ubyanallatataj ubyarcacuna. Dios cachashca paicunahuan puricuj rumimantami ubyarcacuna. Chai rumica Cristomi carca.

5Ashtahuanpish paicunamanta chaupi yallica, Dios munashcataca mana rurarcacunachu. Chaimantami paicunaca shitashca pambapi huañurcacuna.

6Tucui caicunaca ñucanchij ricushpa, paicuna ima mana allicunata munashca shina, ñucanchijpish ama munachunmi chashna tucurca.

7Paicunamanta maijancuna shina, rurashcalla dioscunata ama adorajcuna caichijchu. Cashnami quillcashca tiyacun: “Tucuicunami micungapaj, ubyangapaj tiyarircacuna, pugllangapajpishmi jatarircacuna” ninmi.

8Paicunamanta maijancuna shina ama huainayajcuna cashunchijchu. Chashnacunaca shuj punllallapimi, 23.000 huañurcacuna.

9Paicunamanta maijancuna Jatun Diosta rimashca shinapish ama rimashunchij. Chashnacunaca culebracuna canishcami huañurcacuna.

10Paicunamanta maijancuna shina ama huashalla rimajcuna caichijchu. Chashnacunataca tucuchijpaj maquimi huañuchirca.

11Tucui caicunaca ñucanchij ricuchunmi chashna tucurca. Cai tucuri punllacunapi ñucanchij causacujcunata sinchita cunangapajmi, chashna quillcashca tiyacun.

12Maijanpish sinchi cashcata yuyajca, ama urmangapajca alli ricurangui.

13Shujtajcunata japij millai munaicunallatajmi cancunatapish japirca, ashtahuan yallica mana japircachu. Ashtahuanpish Diosca pajtachij cashcamantami, chai millai munaicunataca cancuna apai tucunallata saquinga. Paillatajmi chai millai munaimanta llujshichun mishachinga.

14Chaimanta ñuca c'uyashcacuna, rurashcalla diosta adorajcunamanta caruyaichij.

15Cancunataca alli yuyaiyujcuna cajpimi rimani. Cancunallataj ñuca nishcataca alli yuyarichij.

16Dios cushca copamanta pagui nishpaca ¿manachu Cristopaj yahuarmanta shujlla canchij? Tandata chaupishpaca ¿manachu Cristopaj cuerpomanta shujlla canchij?

17Shujlla tanda cajpipish, ñucanchijca achcacuna cashpapish, tucuicuna chai tandallamantataj micushpaca, shujlla cuerpomi canchij.

18Israelcuna ima shina ruraj cashcata ricuichij: Diosman cushpa rupachinapaj cushcacunata micujcunaca ¿manachu altarmanta japijcunahuan shujlla?

19Caihuanca ¿imatataj nisha nini? ¿Rurashcalla diosca imallapish canchu, mana cashpaca rurashcalla dioscunaman rupachinapaj cushcaca imallapish canchu?

20Diosta mana rijsijcunaca supaicunamanmi cuncuna, Diosmanca mana cuncunachu. Cancunataca supaicunahuan tandanacujcuna cachunca mana munanichu.

21Mandaj Jesuspaj copamantapish, supaicunapaj copamantapish mana ubyai tucunguichijchu. Mandaj Jesuspaj mezamantapish, supaicunapaj mezamantapish mana micui tucunguichijchu.

22¿Mandaj Jesús p'iñarishpa llaquichingacamatajchu chashna rurashun? ¿Ñucanchijca paita yalli poderyujchari canchij?

Tucui imata rurashpapish Diosta jatunyachingapaj ruraichij

23Tucui imatapish rurai tucunimi, ashtahuanpish chaica mana tucui allichu. Tucui imatapish rurai tucunimi, ashtahuanpish chaica mana tucui sinchiyachinchu.

24Pipish quiquinpaj allipajllaca ama mashcachun, ashtahuanpish shujtajpaj allipaj mashcachun.

25Aicha c'atupica yuyai mapayanata ama yuyashpa, ama imata tapushpa, tucui c'atushcata micunguichijlla.

26Cai pachapish, chaipi tucui ima tiyajcunapish Jatun Diospajmi.

27Maijan mana crij cancunata cayajpi rishpaca, cancunaman tucui ima carashcataca yuyai mapayanata ama yuyashpa, ama imata tapushpa micunguichijlla.

28Ashtahuanpish cancunaman maijan: “Caica rurashcalla dioscunaman rupachinapaj cushcami carca” nijpica, ama micunguichijchu. Huillajmantapish, yuyai mapayanamantapish ama micunguichijchu. Cai pachapish, chaipi tucui imalla tiyajcunapish Jatun Diospajmi.

29Caishujpaj yuyai mapayanamantami chashna nini, mana canmantachu chashna nini. Shujtajpaj yuyai chashna tucunallamantaca, ñuca imatapish rurai tucuipajtaca ¿ima nishpataj jarcashca casha?

30Diosta pagui nishpami micurcani. ¿Imamantataj chashna pagui nishpa micushcamantaca, juchachishpa rimashca casha ningachari?

31Micushpapish, ubyashpapish, tucui imata rurashpapish, Diosta jatunyachingapaj ruraichij.

32Judiocunapajpish, mana judiocunapajpish, Diospaj tandanacushca crijcunapajpish ama ñitcana caichijchu.

33Ñucapish chashnallatajmi tucui imapipish tucuicunata cushichini. Achcacuna quishpirishca cachunmi, mana ñucapajlla mashcashpa, ashtahuanpish paicunapaj allipaj mashcani.