1 CORINTIOS 7 - Quichua Chimborazo Bible

1Quillcashpa ñucata tapushcamantami cutichisha nini: C'arica, huarmipi mana chayarinaca allimi canman.

2Shina cajpipish huainayana munaicuna tiyashcamanta, c'arica quiquin huarmita charichun, huarmipish quiquin cusata charichun.

3Cusaca quiquin huarmiman cuna cashcata cuchun, shinallataj huarmipish quiquin cusaman cuna cashcata cuchun.

4Huarmica paipaj cuerpotaca mana paillatajca cushichinchu, cusami cushichin. Shinallataj cusapish paipaj cuerpotaca mana paillatajca cushichinchu, huarmimi cushichin.

5Caishujpish chaishujpish ama mitsarinacuichijchu. Tucui yuyaihuan Diosta mañangapajlla, ishquindij shuj yuyailla tucushpa ashacama jarcarichij. Mana unita jarcari tucujpica, mana alli yuyaita Satanás ama cuchun cutin tandanacuichijlla.

6Ashtahuanpish caitaca mana mandanichu, allimi canman ninillami.

7Tucuicuna ñuca shina cachun munaimanchari. Ashtahuanpish cada quiquinmanmi Diosca ch'ican ch'ican canata cushca, shujmanca shujta, caishujmanca shujtaj shina canatami cushca.

8Mosocunata, viudacunatapish ñuca shina saquirishpaca allimi canman ninimi.

9Ashtahuanpish jarcari tucunata Dios cushcata mana charishpaca, cazarachunlla. Ruparicunapaj randica, cazaranami alli.

10Cazarashpa shujlla tucushcacunaca ama ch'icanyarinacuchun. Mana ñucachu mandani, Mandaj Jesusmi mandan. Huarmica cusata ama shitachun.

11Shitashpapish ama cazarachun, mana cashpaca quiquin cusahuan cutin alli tucuchun. Shinallataj cusapish paipaj huarmitaca ama shitachun.

12Shujtajcunataca ñucami nini, mana Mandaj Jesuschu nin: Maijan huauquipaj huarmi mana crij cashpapish, paihuan causasha nijpica ama shitachun.

13Shinallataj maijan huarmi mana crij cusata charishpapish, paihuan causasha nijpica, ama shitachun ninimi.

14Mana crij cusaca crij huarmimantaca, jucha illajta rurashcami. Shinallataj mana crij huarmipish crij cusamantaca chashnallatajmi. Mana chashna cajpica, cancunapaj huahuacunaca mapacunami canman. Ashtahuanpish cunanca, paicunapish jucha illajcunami.

15Shina cajpipish maijan mana crij shitajpica shitachunlla. Chaipica crij huauqui cashpa, pani cashpapish, ña mana huatashcachu. Ashtahuanpish ñucanchijtaca, Diosca sumajta causachunmi cayarca.

16¿Huarmipish, cambaj cusata ima shinamanta quishpichi tucunguichu? ¿Shinallataj c'aripish, cambaj huarmita ima shinamanta quishpichi tucunguichu?

17Ashtahuanpish cada quiquinman Mandaj Jesús ima rurai tucunata chaupishca shina, Taita Dios cancunata cayai punlla ima shinami carcanguichij, chai shinallataj causaichij: Mai llajtapi cashpapish tandanacushca crijcunataca chashnami mandani.

18¿Maijantaca circuncisionta rurashcatachu cayarca? Chashnallataj saquirichunlla. ¿Maijantaca mana circuncisionta rurashcatachu cayarca? Chaipish circuncisionta ama rurachichun.

19Circuncisionta rurashcapish, mana circuncisionta rurashcapish ima mana canchu. Dios mandashcacunata huaquichinamari tucuimanta yalli.

20Cada quiquinta ima shina cajpi cayashca cashpaca chaillapitaj catichijlla.

21¿Huatashca shina ruraj cashpachu cayashca carcangui? Ama chai yuyailla caichu. Huatashcamanta llujshina cajpica llujshinguilla.

22Maijanpajta ruraj cajpi Mandaj Jesús cayashca cajpica, Mandaj Jesús cacharichishcami tucun. Chashnallataj maijanpajta mana ruraj cajpi cayashca cashpaca, Cristopajta rurajmi tucun.

23Achca valijhuan randishcacunami canguichij. Chaimanta ama pipaj huatashcacuna tucuichijchu.

24Huauquicuna, cada quiquin ima shina cajpi agllashca cashpaca, chaillapitaj catishpa Diospajta ruraichijlla.

25C'arita manaraj rijsijcunapajca, Mandaj Jesús mandashcataca mana charinichu. Ashtahuanpish Mandaj Jesús llaquishcata chasquishcamantami, ñuca yuyashca shina tucuicunapaj alli cana cajllata cunani.

26Ñuca yuyaipica cai llaqui punllacunapi cashcamanta, ima shina cashca cashpapish chai shinallataj saquirishpami allita ruranman.

27¿Cazarashcachu cangui? Shinashpaca ama huarmita shitanata yuyangui. ¿Manaraj cazarashcachu cangui? Shinashpaca ama cazaranata yuyangui.

28Cazarashpapish mana juchallinguichu. Shinallataj soltera cazarashpapish, mana juchallinchu. Shina cajpipish cazarashcacunaca, paicunapaj causaipimi llaquita charingacuna. Ñucaca chai llaquicunata ama charichunmi chashnaca nini.

29Ashtahuanpish huauquicuna, caitami nini: Punllacunaca quichquiyamucunmi, cunanmantaca huarmita charijcunaca mana charishca shina cachun.

30Shinallataj huacajcunaca mana huacashca shina cachun. Cushicujcunaca mana cushicushca shina cachun. Imata randijcunaca mana charishca shina cachun.

31Shinallataj cai pachamanta cushicujcunaca, mana cushicuj shina cachun. Cai pachamanta cajcunaca ricurishpa chingarijllami.

32Cancuna ama caita chaita yuyachunmi munani. Mosolla cashpaca, ima shinapish Mandaj Jesusta cushichina yuyailla cashpami, Mandaj Jesuspajta rurana yuyailla.

33Ashtahuanpish huarmiyujca huarmita ima shinapish cushichingapajmi, cai pachapi tiyajcuna yuyailla.

34Shinallataj cusayujpish, solterapish ch'ican ch'icanmi. Solteraca cuerpopish, espiritupish jucha illajlla cangapajmi, Mandaj Jesuspajta rurana yuyailla. Ashtahuanpish cusayujca, cusata ima shinapish cushichingapajmi cai pachapi tiyajcuna yuyailla.

35Caitaca cancunapaj allipajmi nini, mana jarcasha nishcamantachu, ashtahuanpish tucuipi alli caj, alli ruraj cajpi pi mana jarcashca, Mandaj Jesuspajman c'uchuyachunmi cashna nini.

36Ashtahuanpish maijanpaj ushushi mana cazarashpa payayacushcata yuyashpaca, cazaranataj cajpica, pai yuyashca shina rurachunlla. Mana juchallinchu, cazarachichunlla.

37Ashtahuanpish paipaj shungupi chashnataj cana cashcata yuyajca, cazarachingapaj pihuan ari nishcata mana charishpaca, paipaj ushushita c'arita mana rijsij canami alli yuyajca allitami ruran.

38Shina cajpipish ari nishca cashpaca paipaj ushushita cazarachijca allitami ruran, mana cazarachijcarin ashtahuan allitami ruran.

39Cazarashca huarmica mandashcapi nishca shinaca, cusa causacujpirajca huatashcami. Ashtahuanpish cusa huañujpica, ña mana huatashca cashcamanta maijanhuanpish cazarai tucunmi. Ashtahuanca Mandaj Jesuspi cajlla cachun.

40Ashtahuanpish ñuca yuyaipica, maijanpish mana cazarashpa saquirishpami ashtahuan cushijlla canman. Ñucapish Diospaj Espirituta charishcatami yuyani.